Matthew 23
23
Mbrakyerɛfo no na Farisiifo ho Kɔkɔbɔ
(Mark 12.38, 39; Luke 11.43, 46; 20.45, 46)
1Nna Jesus kasaa kyerɛɛ nyimpadodow no nye n’esuafo dɛ, 2Kyerɛwfo nye Farisiifo no tse Moses egua do: 3dɛm ntsi adze nyina a wɔbɛhyɛ hom no, hom ndzi do, na hom nyɛ: mbom mma hom nnyɛ hɔn ndzeyɛɛ bi: osiandɛ hɔn dze, wɔka naaso wɔnnyɛ. 4Na wɔkyekyer ndzesoadze durdur a no soa yɛ yaw na wɔdze to nyimpa kɔn ho, na hɔn dze, wɔmmpɛ dɛ wɔdze hɔn nsatseaba mpo suo mu. 5#Mat 6.1; Deut 6.8; Nka 15.38 Na hɔn ndwuma nyina wɔyɛ ama nyimpa eehu: wɔyɛ dza wɔkyerɛw nyamesɛm hyɛ mu bobɔ hɔn enyim no atɛtɛr, na woyi hɔn ntar ano ndwow akɛse, 6na wɔpɛ mpanyin tsenabea wɔ edzidzi ase, nye mpanyin ngua wɔ nhyiamudan mu 7nye gua do nkyiakyia, na dɛ nyimpa bɛfrɛ hɔn Rabae (Kyerɛkyerɛfo). 8Na hom dze, mma wɔmmfrɛ hom Rabae; na ɔbaako na ɔyɛ hom kyerɛkyerɛfo, na hom nyina yɛ enuanom. 9Na mma hom mmfrɛ obi hom egya wɔ asaase do: na ɔbaako nye hom Egya, ɔno nye nyia ɔwɔ sor no. 10Eso mma wɔmmfrɛ hom akwankyerɛfo: na ɔbaako nye hom kwankyerɛfo, ɔnye Kraest no. 11#Mat 20.26, 27; Mar 9.35; 10.43, 44; Luk 22.26 Na nyia ɔyɛ kɛse wɔ hom mu no, ɔbɛyɛ hom somfo. 12#Luk 14.11; 18.14 Na obiara a ɔbɛma noho do no, wɔbɛbrɛ no adze, na obiara a ɔbɛbrɛ noho adze no, wɔbɛma no do.
Jesus Kasa Tsia Hɔn Ndabraba
(Mark 12.40; Luke 11.39-42, 44, 52; 20.47)
13 Hom ndue! Akyerɛwfo nye Farisiifo, ndabrabafo! Na hom tow ɔsor ahenman mu wɔ nyimpa enyim, naaso homankasa hom nnkɔ mu, eso hɔn a wɔrokɔ mu no hom mma hɔn kwan mma wɔnnkɔ mu.
14 (Hom ndue, Akyerɛwfo nye Farisiifo, ndabrabafo! Hom na hom bɔ ekunafo epoo, na hom petuw bɔ mpaa atsentsen kyerɛ: dɛm ntsi hom benya afɔdzi kɛse.) #23.14 Tsetse Akyerɛwfo binom mmfa nkyekyɛmu 14 yi nnka ho.
15 Hom ndue, Akyerɛwfo nye Farisiifo, ndabrabafo! Dɛ hom bɔ po ho nye asaase do aprɔw kɛyɛ nyimpa baako hom fɛkuwnyi; na sɛ ɔyɛ dɛm a, hom ma ɔyɛ amandzehu kurow mu ba mbɔho ebien kyɛn homankasa.
16 Hom ndue! Enyifurafo akwankyerɛfo a hom se dɛ, Obiara a ɔbɛka asɔrfi no ntam no nnyɛ hwee; na obiara a ɔbɛka sika a ɔwɔ asɔrfi no mu no ho ntam dze, ɔda no do. 17Nkwasea nye enyifurafo! No mu dza ɔwɔ hen na ɔso, sika no anaa asɔrfi no a ɔtsew sika no ho no a? 18Na obiara a ɔbɛka afɔrmbukyia no ntam no, ɔnnyɛ hwee; na obiara a ɔbɛka ayɛyɛdze a ɔwɔ do ho ntam no, ɔda no do. 19Enyifurafo! Dza ɔwɔ hen na ɔso? Ayɛyɛdze no anaa afɔrmbukyia a ɔtsew ayɛyɛdze no ho no a. 20Dɛm ntsi nyia ɔka afɔrmbukyia no ntam no, ɔka ɔno nye dza ɔwɔ do no nyina. 21Na nyia ɔka asɔrfi ntam no, ɔka ɔno nye nyia ɔtse mu no. 22#Isa 66.1; Mat 5.34 Na nyia ɔka ɔsor ntam no, ɔka Nyankopɔn n’ahengua nye nyia ɔtse do no.
23 #
Lev 27.30
Hom ndue, Akyerɛwfo nye Farisiifo, ndabrabafo! Na hom yi eme nye nunum nye mprɛgowamba mpo ho ebupɛn du du ma, naaso hom egyaa mbra no mu dza ɔsom bo yie no a ɔyɛ atsɛmbu, ehumbɔbɔr nye gyedzi no; iyi na ɔsɛ dɛ hom yɛ, ber a hom nndan nkaa no so nngya. 24Enyifurafo akwankyerɛfo a hom sɔn ntonton do, naaso hom men efupɔnkɔ!
25 Hom ndue, Akyerɛwfo nye Farisiifo, ndabrabafo! Hom twuw nkɔɔpow nye mprɛtse ekyir, naaso no mu dze, apempensi nye edzifodze ahyɛ ma. 26Farisiinyi onyifurafo, dzi kan twuw kɔɔpow nye prɛtse mu, ama n’ekyir so eefir.
27 #
Ndwu 23.3
Hom ndue, Akyerɛwfo nye Farisiifo, ndabrabafo! Na hom tse dɛ nda a wɔahoa ho, na n’ekyir pue fɛfɛɛfɛw, na no mu dze efun mbiew ɔnye fi nyina ahyɛ ma. 28Dɛmara so naaso hom yɛ dɛ nyimpa tsenenee wɔ nyimpa enyim na hom mu dze, ndabraba nye emumuyɛ nyina ahyɛ ma.
29 Hom ndue, Akyerɛwfo nye Farisiifo, ndabrabafo! Osiandɛ hom tow nkɔnhyɛfo nda do, na hom hyehyɛ nyimpa tsenenee abodan no, 30na hom ka dɛ, Sɛ yɛwɔ hɛn egyanom aber do a, nkyɛ yɛnye hɔn ammbɔ mu wɔ nkɔnhyɛfo no bɔgyaa ho. 31Iyi ntsi hom dzi homho dase dɛ hɔn a wokum nkɔnhyɛfo no hɔn mba nye hom. 32Ntsi hom nhyɛ hom egyanom etwadze no ma. 33#Mat 3.7; 12.34; Luk 3.7 Hom mbowatsena, nhurutsia mba! Hom bɛyɛ dɛn eguan efi amandzehu kurow atsɛmbu no mu? 34Dɛm ntsi hwɛ, morosoma nkɔnhyɛfo nye enyansafo nye Akyerɛwfo wɔ hom hɔ, na hom boku hɔn mu bi, na hom abɔ hɔn mbeamudua mu; na hɔn mu bi so hom bɛka hɔn mpire wɔ hom nhyiamudan mu, na hom atseetsee hɔn efi kurow mu akɔ kurow mu; 35#Gye 4.8; 2 Mbe 24.20, 21 ma bɔgya tsenenee a wɔaka egu asaase yi do nyina eegu hom do, ofitsi tseneneenyi Abel bɔgyaa do kesi Barakia ba Zekaria a hom kum no wɔ asɔrdan nye afɔrmbukyia no ntamu no bɔgyaa do. 36Mese hom nokwar mu dɛ, Yinom nyina bɛba ɔsantsen yi do.
Dɔ a Jesus dɔ Jerusalɛm
(Luke 13.34, 35)
37 Ao! Jerusalɛm, Jerusalɛm, ɔwo a iku nkɔnhyɛfo no, na isiw hɔn a wɔasoma hɔn wo nkyɛn abo, mpɛn ahen na mepɛɛ dɛ moboaboa wo mba ano, dɛ mbrɛ akokɔtan boaboa ne mba ano wɔ ne ntsaban ase, naaso hom ammpɛ! 38#Jer 22.5 Hwɛ, woegyaa wo fie ato hɔ pan ama hom. 39#Dwom 118.26 Na mese hom dɛ, Ofitsi sesei yi hom runnhu me ara dze akɛpem dɛ hom bɛse dɛ, Nhyira nye nyia ɔnam Ewuradze ne dzin mu reba no.
ទើបបានជ្រើសរើសហើយ៖
Matthew 23: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
