Uluaki tohi a Paulo ki te kau KOLINITO 15
15
Ko te toe tuuake a Sesu-Kilisito
1E au fakamanatu atu kia koutou, u tehina, te Evaselio nee au akonaki atu kia koutou, ae foki nee kotou tali, pea nee kotou puke mau, 2ae foki nee kotou haofaki ai, mo kapau e kotou taofi ia o hage ko taku akonaki atu ia kia koutou; ka e kailoa, nee kotou tui noa.
3Nee au akonaki atu kia koutou ko te uluaki mea i te u mea fuli, o hage ko taku tali foki ia mai te Aliki: Nee mate Kilisito o uhiga mo atatou agahala, o mulimuli ki te Tohi; 4pea nee tanu ia, pea nee toe tuuake ia i te aho tolu, o mulimuli ki te Tohi; 5pea nee ha ia kia Kefasi, pea mo te toko hogofulu ma lua. 6Pea nee ha ia ki te u tehina e toko nimageau tupu i te temi e tahi, pea e kei mauli nei te tokolahi ia natou, kae kua mamate te toko sii. 7Pea nee ha leva ia kia Sakopo, pea mo te kau apositolo fuli. 8Pea hili ia natou fuli, nee ha leva ia kia au, o hage ki he fanau nee to; 9koteuhi e au veliveli osi i te kau apositolo, pea e mole tonu ke fakahigoa au ko te apositolo, koteuhi nee au fakatagai te Ekelesia o te Atua. 10Kae aki te kalasia o te Atua, kua au liliu o fenei, pea nee mole tonoa tona kalasia kia au, mamao osi, nee au gaue lahi age ia natou fuli, kae nee mole ko au toko tahi, kae ko te kalasia o te Atua ia au. 11Koia, pe ko au, pe ko natou, koena te mea e matou akonaki, pea koena te mea nee kotou tui ki ai.
Ko te mauhiga o te toe tuuake o Kilisito
12Pea koeni, kapau e akonaki kua toe tuuake Kilisito mai te kau mate, kotea e ui ai e ihi o kotou e mole toe tuuake te kau mate? 13Kapau e mole toe tuuake te kau mate, pea nee mole toe tuuake foki ia Kilisito; 14pea kapau nee mole toe tuuake ia Kilisito, e noa anai tamatou akonaki, pea e noa foki mo takotou tui. 15E matou liliu foki ko ni tagata fakamooni loi ki te Atua, koteuhi nee matou fakamooni loi nee fakatuuake ia Kilisito e te Atua, kae ta la nee mole ina toe fakatuuake ia, mo kapau e mole toe tuuake te kau mate. 16Koteuhi kapau e mole toe tuuake te kau mate, pea nee mole toe tuuake foki ia Kilisito. 17Pea kapau nee mole toe tuuake ia Kilisito, e mole aoga takotou tui, kei kotou nofo i akotou agahala, 18pea kua pulinoa foki natou nee mamate ia Kilisito. 19Pea kapau e tou amanaki lelei kia Kilisito i te mauli aeni, ko tatou ko te kau fakaofaofa i te u tagata fuli.
Sesu-Kilisito ko te uluaki nee toe tuuake
20Kae i te lakaga nei, kua toe tuuake mooni ia Kilisito mai te kau mate, pea kua hoko ia ko te uluaki fua o natou kua mamate. 21Koteuhi nee hau te mate mai he tagata e tahi, pea nee hau foki te toe tuuake mai he tagata e tahi. 22Pea nee mamate te u tagata fuli ia Atama, e tatau foki, e mauli anai te u tagata fuli ia Kilisito, 23kae e tahi nofo anai i tona tuuaga: Ko te uluaki fua ko Kilisito, pea osi ko natou ae e kau mo Kilisito i tana toe liliu mai. 24Pea e hoko anai te fakaosi, moka e ina tuku anai te puleaga ki ae e Atua mo Tamai, i te osi o tana maumaui te u pule fuli, mo te u lagiaki fuli, pea mo te u malohi fuli. 25Koteuhi e tonu ke pule ia o kaku ki tana tuku ona fili fuli ki lalo o ona vae. 26Ko te fili fakamuli e maumaui anai, ko te mate. 27Koteuhi, nee tuku e te Atua te u mea fuli ki lalo o te u vae o Kilisito. Kae i tana ui kua fakamalaloi te u mea fuli kia Kilisito, e mahino mai ko ae nee ina foaki kia ia te u mea fuli, e mole kau i ai. 28Pea ka osi anai te fakamalaloi o te u mea fuli kia Kilisito, e fakamalalo anai te Alo totonu ki ae nee ina tuku te u mea fuli kia ia, koteuhi ke katoa te Atua i te u mea fuli.
Te mooni o te toe tuuake
29Kapau e mole ko ia, kotea e fai anai e natou kua papitema o uhiga mo te kau mate? Kapau e mole toe tuuake te kau mate, kotea e natou papitema ai o uhiga mo te kau mate? 30Pea ko matou, kotea e memehii ai omatou mauli i te u hola fuli? 31I te aho takitahi e fakahaga au ki te mate, e au fakaha atu, u tehina, i te kololia ae e au mau o uhi ko koutou ia Sesu-Kilisito totatou Aliki. 32Kapau ko ni sio fakatagata ae nee au tau ai ki te u manu fekai i Efeso, kotea tona aoga mai kia au? Kapau e mole toe tuuake te kau mate,
Tou kai pea tou inu, koteuhi e tou mate anai i apogipogi.
33Aua naa kotou faihala: E maumaui e te u kaumea kovi te u agalelei. 34Kotou toe liliu mai kia koutou totonu, koena te mea ae e totonu, pea aua naa kotou agahala; koteuhi e mole iloi e ihi o kotou te Atua, e au fakaha ia ke kotou ufiufi ai.
Te sino o natou e toe tuuake
35Kae e ui anai e he tahi: E feafeai anai te toe tuuake a te kau mate, pea ko te u sino feafeai anai ae e hau anai mo natou? 36Ko te vale ia koe! Ko te mea ae e ke nunusi e mole mauli mo kapau e mole mate mua ia. 37Pea ko te mea ae e ke nunusi, e mole ko te sino aena e homo anai; ko he tegai pulapula pe ia, o hage ko he tegai fulumeto, pee ko he tahi ake tegai pulapula; 38pea e foaki anai e te Atua kia ia he sino o mulimuli ki tona loto, pea e ina foaki anai ki te u pulapula takitahi he sino ae e alu totonu mo ia.
39E mole tatau te u kakano fuli; e kehe pe te kakano o te tagata, pea e kehe te kakano o te manu, pea e kehe te kakano o te u manu lele, pea e kehe te kakano o te u ika. 40E i ai foki ni sino fakaaselo, pea mo ni sino fakakele, kae e kehe pe te gigila o te u sino fakaaselo, pea e kehe te gigila o te u sino fakakele. 41E kehe pe te gigila o te laa, pea e kehe te gigila o te mahina, pea e kehe te gigila o te u fetuu; pea e kehe te gigila o te tahi fetuu mai te tahi fetuu.
42E toe fena foki mo te toe tuuake o te kau mate. E nunusi te sino pala, kae e toe tuuake ia e hee pala; 43e to ia e fakalialia; kae e toe tuuake ia e fakakololia; e nunusi ia e vaivai, kae e toe tuuake ia e fonu i te malohi; 44e to ia e fakanatula, kae e toe tuuake anai ia e fakalaumalie. Kapau e i ai he sino fakanatula, e i ai foki he sino fakalaumalie. 45Koia e tuu ai i te tohi: Ko te uluaki tagata, ko Atama, nee liliu ia ko he laumalie mauli, ko te Atama fakamuli, ko Sesu, kua liliu ia ko he Laumalie fakamauli. 46Kae e mole muamua te mea ae e fakalaumalie, ko te mea ae e fakanatula; e mulimuli mai te mea ae e fakalaumalie. 47Ko te uluaki tagata nee too ia mai te kele, e fakakele; ko te lua tagata ko te Aliki e hifo ia mai lagi. 48Ko natou ae e kau ki te kele, e tatau mo ae nee hau mai te kele; kae ko natou ae e kau ki Selo e tatau mo ae nee hau mai Selo. 49Pea e tatau foki mo tatou: Nee tou mau te paaki o te tagata mai te kele, pea kua tou toe mau foki te paaki o ae nee hau mai Selo.
Malo o te toe tuuake mai te mate
50Ko te mea ae e au fakaha, u tehina, e mole feala ke mau tofiga e te kakano mo te toto te puleaga o te Atua, pea e mole feala ke mau tofiga e te u mea pala te u mea e hee pala.
51Koeni, e au fakaha atu kia koutou he misitelio: E mole tou mamate fuli anai, kae e tou fetogi fuli anai, 52i he temi e tahi, i te kemo o te mata, i te pupuhi o te fakatagi fakamuli. E tagi leva te fakatagi pupuhi, pea e toe tuuake anai te kau mate i ni sino hee pala, pea ko tatou, e tou fetogi anai. 53Koteuhi e tonu ke kofu e te sino pala aeni te hee pala, pea ke kofu e te sino mate aeni te mauli heegata.
54Ka kofu anai e te sino pala aeni te hee pala, pea ka kofu anai e te sino mate aeni te mauli heegata, pea e hoko anai te folafola ae e tuu i te Tohi:
Kua folo te mate e te malo.
55 Oi mate, e ifea tou malo?
Oi mate e ifea tou malohi? 56Ko te pule o te mate ko te agahala, pea ko te malohi o te agahala ko te lao. 57Kae ke tuku te fakafetai ki te Atua, ae e ina foaki mai kia tatou te malo i totatou Aliki ko Sesu-Kilisito!
58Koia, oku tehina ofaina, ke kotou tuu malohi mo taofi mau, pea ke kotou kataki aipe i te gaue ke asilisili lelei ki te Aliki, o kotou iloi e mole alunoa anai takotou gaue i te Aliki.
ទើបបានជ្រើសរើសហើយ៖
Uluaki tohi a Paulo ki te kau KOLINITO 15: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland