Uluaki tohi a Paulo ki te kau KOLINITO 16
16
Tanaki meaofa
1O uhiga mo te tanaki meaofa ki te kau sagato, kotou fai, e koutou foki, o hage ko te mea nee au fakatotonu ki te u Ekelesia o Kalatia. 2I te uluaki aho o te vahaa, kotou tahi tuku kehe i okotou api, te mea ae e kotou tahi fealagia, o mulimuli ki tona mau koloa, koteuhi ke aua naa talitali ki taku kaku atu ke tanaki ai te u meaofa. 3Pea ka au kaku atu anai, e au fekaui anai mo ni tohi, natou ae e kotou filifili anai, ke natou ave akotou meaofa ki Selusalemi. 4Kapau e lelei ke au alu totonu, e natou folau anai mo au.
5E au alu atu anai kia koutou moka au fakalaka anai i Masetonia, koteuhi e au fakalaka anai i Masetonia. 6E lagi au nofo anai mo koutou, i te temi momoko katoa, koteuhi ke kotou kauga fagona anai mo au ki te kogamea ae e au alu anai ki ai. 7E mole au loto i te faiaga aeni ke au fakalaka o sio pe kia koutou, kae e au amanaki ke au nofo o fualoa mo koutou, mo kapau e fakagafua ia e te Aliki. 8Kae e au nofo anai i Efeso o kaku ki te Penikosite; 9koteuhi kua avahi mai kia au he matapa lahi mo aoga, pea e kaugamalie te kau fehagai.
10Kapau e kaku atu anai ia Timoteo, kotou faiga ke aua naa nofo tuania ia ia koutou, koteuhi e gaue ia o hage ko au ki te gaue a te Aliki. 11Ke aua naa fakanoai ia e he tahi. Ke kotou tokoni kia ia ke folau mai kia au i te tokalelei, koteuhi e au talitali kia ia mo te u tehina. 12O uhiga mo te tehina ko Apolosio, nee au kole malohi kia ia ke alu atu kia koutou mo te u tehina, kae nee mole loto ia ke alu atu i te temi nei; hoki alu atu anai ia moka ina mau he faigamalie.
13Kotou alaala, kotou tuu mau i te tui, kotou hage ko ni tagata, kotou malohi. 14Kotou fai te u mea fuli i te ofa.
15Pea koeni he tahi kole e au toe fai kia koutou, u tehina: E kotou iloi ko te famili o Setefanasi ko te u uluaki fua aia o Akaia, pea nee tokaga aupito te famili aia ki te tauhi o te kau sagato. 16Ke kotou fakaapaapa foki ki te tai tagata fena, pea mo natou fuli e gaue mo kakava fakatahi mo natou.
17E au fiafia i te kaku mai a Setefanasi, mo Folotunatusi, pea mo Akaikusi; e natou fetogi koutou ae e nonofo mamao, 18koteuhi nee natou fakafimaliei toku loto pea feia foki mo koutou. Koia ke kotou poto i te fakamauhigai o te tai tagata fena.
19E fakaalofa atu kia koutou te u Ekelesia o Asia. E fakaalofa lahi atu kia koutou i te Aliki ia Akilasi mo Pelesila, pea mo te Ekelesia e fakatahi i tona fale. 20E fakaalofa atu kia koutou te u tehina fuli. Ke kotou fefakaalofaaki ia koutou i he uma maonioni.
21E au fakaalofa atu kia koutou, ia au Paulo, i toku nima totonu.
22Kapau e mole ofa he tahi ki te Aliki ko Sesu-Kilisito, ke malaia ia! Malanata, hau la Aliki. 23Ke nofo te kalasia o te Aliki Sesu mo koutou! 24E nofo toku ofa mo koutou fuli ia Sesu-Kilisito.
ទើបបានជ្រើសរើសហើយ៖
Uluaki tohi a Paulo ki te kau KOLINITO 16: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland