Uluaki tohi a Paulo ki te kau KOLINITO 14
14
Fakaaoga o te u meaofa i te Ekelesia
1Kotou kumi te ofa. Kotou holi ki te u meaofa fakalaumalie, kae tafito ki ae o te tala fakapolofeta.
2Koteuhi, ko ae e palalau i te u lea kehekehe e mole palalau ia ki te u tagata, kae ki te Atua, koteuhi e mole mahino he tahi kia ia, pea e palalau ia aki te Laumalie ki he u misitelio. 3Kae ko ae e tala fakapolofeta e palalau ia ki te u tagata, ke faufau ai natou, mo fakalotomalohi ai natou, mo fakafimaliei ai natou. 4Ko ae e palalau i te u lea kehekehe e ina fakamalohi pe ia ia; kae ko ae e tala fakapolofeta e ina faufau te Ekelesia.
5E au fakaamu ke kotou palalau fuli i te u lea kehekehe, kae e toe lelei age ke kotou tala fakapolofeta. E lahi age ae e tala fakapolofeta i ae e palalau i te u lea kehekehe, gata pe mo kapau e i ai he tahi ke ina fakamatala tana palalau ke faufau ai te Ekelesia. 6Pea koeni, u tehina, kotea anai toku aoga kia koutou mo kapau e au alu atu kia koutou o palalau atu i ni lea kehekehe, kae e mole au palalau atu kia koutou i he levelasio*, pe i he iloilo, pe i he tala fakapolofeta, pe i he akonaki?
7Kapau ko te u mea e mole mauli o hage ko te fakatagi pupuhi mo te ukalele, ae e natou tahi tuku tona musika totonu, e mole natou tuku he foi nota e mahino lelei, pe e feafeai anai ke iloi kehekehe naua? 8Pea kapau e mole mahino te tagi o te fakatagi pupuhi, ko ai e teuteu anai ki te tau? 9E tatau foki mo koutou, kapau e mole kotou tuku aki tokotou alelo he folafola e mahino, pe e feafeai anai te iloi te mea e kotou fakaha? Koteuhi e kotou palalau anai i te aele.
10Koia e logo pe e mau he u lea kehekehe i te malamanei, e mole pe he palalau e tahi e mole hona uhiga; 11kapau leva e mole au iloi te uhiga o he palalau, e au hage anai ko he matapule ki ae e palalau, pea ko ae e palalau i te lea aia e hage anai ia ko he matapule kia au. 12E feia foki mo koutou, kapau e kotou holi mooni ki te u meaofa fakalaumalie, ke kotou kumi te mea ae e aoga ki te faufau o te Ekelesia.
13Koia ko ae e palalau i te u lea kehekehe, ke ina kole ke ina mau te meaofa o te fakamatala. 14Koteuhi kapau e au faikole i te u lea kehekehe, e faikole toku laumalie, kae e nofo paa toku atamai. 15Kotea anai ke fai? E au faikole anai aki te laumalie, kae e au toe faikole foki aki toku atamai; e au hiva anai aki te laumalie, kae e au toe hiva foki aki toku atamai. 16Koteuhi, kapau e ke fakafetai pe aki te laumalie, pe e feafeai anai ke tali atu ae e fakalogo: Ameni! Mo kapau e mole ina iloi te mea ae e ke fakaha? 17E mooni e ke fai ni fakafetai lelei osi, kae e mole faufau tou tehina. 18E au fakafetai ki te Atua i taku palalau i te u lea kehekehe o lahi age ia koutou fuli, 19kae i te Ekelesia, e lelei age kia au taku puaki ni kupu e nima aki toku atamai, ke akoi ai foki natou ake ae, i ni kupu e hogofulu afe aki te u lea kehekehe.
20U tehina, aua naa kotou fakatamaliki o uhiga mo te fakakaukau; kae ke kotou hage ko ni toe liliki o uhiga mo te agakovi, pea kotou hage ko ni tagata kua katoa o uhiga mo te fakakaukau. 21Kua tohi i te lao:
Ko ni tagata o he lea kehe, pea mo ni laugutu o ni matapule,
Ae e au palalau ai anai ki te hahai aeni,
Pea e mole natou fakalogo mai anai kia au i ai foki, e ui e te Aliki.
22Koia, ko te u lea kehekehe ko he fakailoga, mole ki te kau tui, kae ki te kau hee tui; kae ko te tala fakapolofeta, ko he fakailoga aia ki te kau tui, kae mole ki te kau hee tui.
23Kapau anai, i he fakatahi a te Ekelesia katoa, e palalau fuli aki te u lea kehekehe, kae e ulu mai ni ihi ae e mole mahino pee ko ni ihi ae e mole tui, pe e mole natou ui anai kua kotou vavale? 24Kae kapau e kotou tala fakapolofeta fuli, kae ulu mai he tahi ae e mole tui, pee ko he tagata e fia logo, e malave anai akotou palalau i tona loto, pea e fakamaaui anai ia e koutou fuli, 25pea e fakaha anai te u manatu fakapulipuli o tona loto; pea e fakamapee anai ia ki te kele, o atolasio ki te Atua, mo fakaha e nofo mooni te Atua ia koutou.
Ko te fai o te u meaofa i te Ekelesia
26Kotea anai ke fai, u tehina? I akotou fakatahi, ka mau anai e ihi he katiko, he akonaki, he levelasio*, he lea kehekehe mo tona fakamatala; ke fai te u mea fuli ke faufau ai te Ekelesia. 27Kae kapau e palalau ni ihi aki te u lea kehekehe, ke palalau he tokolua pee ko he toko tolu, o tahi mo ia tona lakaga, kae ke fakamatala e he tahi; 28kae kapau e mole mau he tahi ke ina fakamatala, ke fakalologo i te Ekelesia, pea ke palalau kia kita totonu mo te Atua. 29O uhiga mo te kau polofeta, ke palalau he tokolua pee ko he tokatolu, kae ke fakamaaui e natou ake ae; 30kapau e mau e he tahi e nofo i lalo he levelasio, ke fakalologo te uluaki. 31Koteuhi e feala ke kotou tala fakapolofeta fuli o fakahoahoa, ke akoi mo fakalotomalohi ai te tagata fuli. 32E fakalogo te u laumalie o te kau polofeta ki te kau polofeta; 33koteuhi ko te Atua e mole ko he Atua o te maveuveu, kae ko te Atua o te tokalelei.
O hage i te u Ekelesia fuli o te kau sagato, 34ke fakalologo te u fafine i te u fakatahi, koteuhi e mole gafua ke natou palalau i ai; kae ke natou fakamalalo, o hage ko tona fakaha foki e te lao. 35Kapau e natou fia iloi he mea, ke natou fehui ki onatou ohoana i onatou api, koteuhi e fakaufiufi te palalau a te fafine i te Ekelesia. 36Pe nee hau te folafola a te Atua maia koutou? Pe ko koutou pe nee kaku atu ki ai te folafola?
37Kapau e manatu he tahi ko ia ko he polofeta pe ko he tagata kua matua i te fakalaumalie, ke ina fakamooni ia ko te mea aeni e au tohi atu kia koutou ko he fakatotonu aia mai te Aliki. 38Kapau e fakapouli he tahi ki te mea aena, ke aua naa tokaga ki ai.
39Koia, u tehina, kotou holi ki te tala fakapolofeta, pea aua takotou taofi te palalau i te u lea kehekehe. 40Kae ke fai te u mea fuli i te fakaapaapa mo te fakatokatoka.
ទើបបានជ្រើសរើសហើយ៖
Uluaki tohi a Paulo ki te kau KOLINITO 14: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland