ROM 6
6
Igide dam bulu mei Kraes
1?Siu igide dain vei wuraha? Wa dain vano tuturedu lo galegaleasi huri God vin bete na nona hogogi lawe gide? 2!Hatie vohogi! Igide dau mate lo galegaleasi tatuei, ?Siu igide dain vano tuturedu lo noda galegaleasi mwerehilogo? 3?Wa neu geluvegi ve igide doluegi ngaha dau voragi na rosorosoi Kraes lune dau lei na garuhigogona? Igide dau bulu lo nona mateana lune dau garuhigogona. 4Lune dam lai na garuhigogona, mo tulegi bubugi gide meie, dam bulu gatagale meie lo nona mateana. Siu mwerehi, i Kraes u maraga taligu lo huireana noi Mama, igide vage dain toga lo mwasoana garaqa.
5Siu igide dau bulu bubugi meie lo noda mateana mwerehi ingeie u mate, ko ngaha igide dain maraga taligu dena mateana, mwere hi ingeie u maraga taligu. 6Ko igide dau ilo huri ve a mwasoada tatuei hi u mate bubugi mei Kraes lo, nona gai saroutu huri na noda galegaleasi vin he huire te lai ve na huqegi goro gide, siu igide dain he toga vau tea lo galegaleasi. 7Lune igide dam mate, dam mariqe dena huireanai galegaleasi. 8Tare ve dam mate mei Kraes, igide dam ilo vage ve dain mwaso meie. 9Siu i Kraes u maraga taligu dena mateana, igide dau ilo huri ve vin he mate lai tea taligu. A mateana vin he qoragi laie tea 10Io, lune i Kraes u mate, u mate huri ve vin qoragi na huireanai galegaleasi vagatagale hogosie, u tatarise mena taro doluegi. Siserigi ngaha ingeie mo toga lo mwasoana garaqa, ko a nona mwasoana garaqa hi mo toga mei God. 11Siu lo matahala mwerehi, igimiu nein lehi gimiu taligu sibomiu ve igimiu neu mate lo huireanai galegaleasi, ko nem mwaso mei God lui Jisas Kraes.
12Siu nein mese siregi ve a galegaleasi vin huqegi goro na mwasoamiu lo ure huri ve goin vei na gineu ingere hi a nomu taratarani esi mo taranie. 13Nein mese siregi na tarabesimiu ve na vai na galegaleasi, mwere lo gineu ingere hi rau esi. Nge igimiu neu siregi gimiu lawe God mwere na sinobu ingere hi rau mate ko siserigi ngaha ingere ram mwaso. Nen siregi na tarabesimiu lawe God ve na vai na gineu rau garea. 14A galegaleasi vin he huqegi goro gimiu tea a vevenagi igimiu nehe toga tea lo vavai Leohora, nge nem toga lo vavai dom tabetabe lawua noi God.
Gide dau mwere na tangaloi tabana ingeie u vovohoi mo leo goro gide
15?Siu igide dain vei mwerehilogo? ?Wai gide dain galegaleasi huri hi dahe toga tea lo vavai Leohora, nge dam toga lo vavai dom tabetabe lawua noi God? !Hatie vohogi! 16Igimiu neu ilo vurugegi huri neu siserigi gimiu sibomiu mwere na tangaloi tabana vurogi ve na ronghuri hine tea, siu a hogo igimiu a tangaloi tabana vurogi lawe na tangaloi hi. Igimiu nein huri na galegaleasi, ngehi a mwasigi a mateana talo Vui sige a ronghuri, a mwasigi nge hi a tangaloi ram vovohoi lo nagoi God. 17Tuei igimiu neu tabana vurogi lawe na galegaleasi, a galegaleasi u huqegi goro gimiu. Nge a veve garea lawe God, huri neu tabe vurugegi na Leohuhui huri na gineu ingere hi u betera lawe gimiu. 18Siu igimiu neu meriqe dena galegaleasi, ko siserigi ngaha igimiu a tangaloi tabanagi lawe na gineu garea. 19Ineu nam vai na mataleleogi ngaha a vevenagi u gona huri ve igimiu nein rongo hogosie. Tuei igimiu neu siregi na tarabesimiu ve na tabanagi vurogi lawe na galegaleasi ko a gineu rau esi, nem toga huri na asigi hogosie, siu lo matahala mwere tau hi igimiu nein siregi gimiu sibomiu ve nein tabana vurogi lawe na gineu garea.
20Lo taro tuei igimiu neu tabana vurogi lawe na galegaleasi, ko a gareana he huqegi goro gimiu tea. 21Igimiu neu vei na gineu rau esi, ko siserigi ngaha igimiu nem maemae huri. A gineu ingere hi a mateana lure. 22Nge siserigi ngaha igimiu neu meriqe dena galegaleasi ko igimiu ira tangaloi tabanagi noi God. A mwasoamiu doluegi neu betera lawe God, a mwasigi nge hi a mwasoana tavagituei. 23Lune a sinobu ram galegaleasi ram lai na gaitawe nge hi a galegaleasi mo betea, a gaitawe hi a mateana. Nge i God a nona hogogi lawe gide nge hi a mwasoana tavagituei lui Jisas Kraes a noda Huqe.
ទើបបានជ្រើសរើសហើយ៖
ROM 6: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
