ROM 7
7
A gato tavalu huri na lagiana
1Retueku ko i rehaqeku, igimiu doluegi neu ilo na Leohora noi mosis. Siu igimiu neu ilo vage ve a Leohora mo mamalu goro na sinobu lo taro hi ram mwaso tau mosigei. 2A mataleleogi mwere ngaha, a vavine u legi vin toga gogona mei tamai netune lo tarogi hi mo mwaso. Nge tare ve i tamai netune mo mate, ingeie he toga vau tea lo tauleo huri na lagiana. 3Nge tare ve a vavine mo lagi mena mwera wagineu lo taro hi i tamai netune mo mwaso mosigei, tauleo hi mo veveginie huri ve u vagasile. Nge tare ve i tamai netune mo mate, ingeie u meriqe dena tauleo huri na lagiana. Siu tare ve a vavine hi mo lagi mena mwera wagineu, ingeie he vagasile tea lo tauleo huri na bakabaka. 4Siu lo matahala mwere hi, retueku ko i rehaqeku igimiu neu mate, ko nem mariqe dena tauleo lo tarabesi Kraes. U vei mwere ngaha huri igimiu nein toga lo vavai tangaloi wagineu. A tangaloi i Jisas nge hi u maraga taligu dena mateana, ko huri ve igide dain tabanagi lei lo tabana noi God. 5Tuei lune igide dau toga lo doridorinai tangaloi hogosie. A tauleo hi mo vai gide dam tarani garagaragi na gineu esi ingere hi a domide mo taranire, giniehi, a lalakogi mwere hi mo tomuegi gide sulo mateana. 6Tuei a tauleo u wiribibi gide mwere na tangaloi hi ram toga lo garo vauveu, nge a doridori tatuei hi u mate, igide dam mariqe dena tauleo hi. Siu siseri ngaha igide dam tabana lawe God lo matahala garaqa mena Vui ko hate lo tauleo tatuei hi rau uli bibire
A noda qaloana goro na galegaleasi
7Bataha igimiu nem lado ve ineu nam veve huri ve a tauleo mena galegaleasi ingere a gineu gatagale. Nge hi hatie hogo. Nge a tauleo a matahala hogosie mo vaieu nam ilo na domianai galegaleasi, ineu nain he ilo na iloilogi tea huri ve nain vei huri na gineu nona tangaloi wagineu, ve mwere a tauleo he veve tea vena, Goin mese vai huri na gineu noi rehavamu. 8Nge a vevenagi a Leohora hi, a galegaleasi mo haqe na turegi ve na hibi raga na taratarani esi doluegi lolo loloku. Ko tavala varea dena Leohora a galegaleasi hatie nona huireana. Tavala varea dena Leohora, a galegaleasi a gineu mategi. 9Ineu nam mwaso tavala varea dena Leohora, nge lune a Leohora u vanai a galegaleasi mo tavuigi mo mwaso. 10Siuineu nau mate. A Leohora hi huri ve vin lei na mwasoana, nge mo bete na mateana. 11Lo Leohora hi, a galegaleasi mo haqe na matahala ve na kalieu ko na uevagamateau.
12Siu a Leohora u gogona, ko a Leohora mo veve u garea, u vovohoi ko u garea. 13?Wa ngaha a iloilogi huri ve a gineu garea mo bete na mateana laweau? Hatie, nge a galegaleasi mo dorigi na gineu nge hi u garea vena bete na mateana laweau? Mo vai mwere ngaha huri ineu nain leo vurugegi na galegaleasi ve u mwere na havai. A Leohora mo domiginie vena haharaginie huri ve a galegaleasi u esi garagara.
A domiana gairue lolo loloda rom vuiqalogi
14Igide dau ilo huri ve a Leohora a gineu talo Vui, nge ineu hatie talo Vui huri a galegaleasi mo huqegi goroau mwere ve ineu a nona tangaloi tabana vurogi. 15Ineu nahe ilo vurugegi na gineu tea ngerehi nam vaire. Nahe vai na gineu tea ngerehi nam tarani ve na vaire. 16Siu tare ve ineu nahe tarani tea ve nain vei na gineu esi ngerehi nau veire, ngehi a iloilogi hurive nam lado bubugi mena Leohora huri ve u garea. 17Nge hate hogo ve ineu nam vai na gineu esi ingere ngaha, a galegaleasi hi mo toga luku ingeie hi mo vai na gineu ingere ngaha. 18Io, ineu nau ilo vurugegi ve a gineu garea he toga te luku. Nam veve mwere ngaha ve a gineu garea he toga te luku a vevenagi nam toga lolo urei galegaleasi. Ineu nam tarani ve nan vai na gineu ngerehi rau garea, nge nahe vaire tea. 19Ineu nahe vai na gineu garea tea ngerehi nam tarani ve nain veire, nge nam vai na gineu esi ngerehi nahe tarani tea ve nain veire. 20Tare ve nam vai na gineu ngerehi nahe tarani tea ve nain veire, siuineu nahe vaire tea. Nge a galegaleasi hi mo toga luku mo vai na gineu ngerehi.
21Ineu nau lado hikehike lo Leohora ngaha, lune nam tarani ve na vai na gineu garea, a galegaleasi nge tahi mo toga meieu. 22Lolo domiku, ineu nam havuhevu mena Leohora noi God. 23Nge ineu nam lehi na tau leo tuegi mo tabana meieu ngehi mo vuro lolo domiku. A tauleo ngaha mo qoragi na vuro. Mo vaieu nam voragi tangaloi tabana vurogi lawe na galegaleasi hi mo toga lolo loloku. 24Ineu a tangaloi toga hahagavi? Ihine vin vagamwasoieu dena tarabesigi ngaha mo bete na mateana laweau? 25Ineu nam veve gareagi God huri u vagamwasoieu lui Jisas Kraes noda Huqe.
Siu lolo domiku ineu a tangaloi tabana vurogi lawe na Leohora noi God, nge lo noku galegaleasi siboku, ineu nam voragi tangaloi tabana-vurogi lawe na tauleo nona galegaleasi.
ទើបបានជ្រើសរើសហើយ៖
ROM 7: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
