ROM 5
5
I God mo vai gide dam vovohoi lo nagona
1Siu siserigi ngaha u vei gide dam vovohoi lo nagoi God lo noda ladohogo. A tamwata noi God mo toga mei gide lo henai noda Huqe Jisas Kraes. 2Nge hi u lei gide dam ahu sulo vai garea talo hogogi noi God nge hi mo vai gide dam rongarea. Ko igide dam havu hevu a vevenagi igide dam ladotare ve dain bulu mei God lo nona roroa. 3Lune a gineu esi ram hogosi gide, igide dain hevuhevu huri na gineu esi hi mo vai gide dam labe mo siaga, ko mo vai gide dam rongribi. 4Lune igide dam rongribi, dam lai na doridori garea. A doridori garea hi mo bete na tarantare lawe gide. 5A lado tare vin he vaga maemaegi gide tea, a vevenagi i God u lingi na nona dom tabetabe sulo lolo loloda lo managi noi Vui Gogona ingeie a hogogi noi God lawe gide.
6Lune igide dahe bului lei gide te siboda, i God u leo wahe na taro gatagale ve i Kraes vin mate hurire tangaloi rahe vovohoi tea. 7U mala gona huri ve a tangaloi vin mate lai huri na wai tangaloi. Bataha a tangaloi tea ve vin vei lei vena mate huri na tangaloi garea. 8Nge i God u haharagi na nona tabetabe lawua huri gide lo matahala mwere ngaha. I Kraes u mate huri gide lune dam toga mosigei lo noda galegaleasi. 9Siu igide dain mwaso dena lolo gagasi noi God lui Kraes hogosie, a vevenagi igide dam vovohoi lo nagoi God gena dai Kraes ko a nona mateana. 10Lune igide dau tino mwerena nona tavului vuro, ingeie u vei buluana mei gide lo mateana noi netune. Nge ngaha a hogo, igide dam voragi nona buluana, ingeie vin vaga mwasoi gide gena mwasoai netune. 11Ko hate hogosie hi, nge siserigi ngaha igide dam havuhevu lui God lo henai Jisas Kraes. Lui Kraes hi igide dam voragi buluana noi God taligu.
I Adam tona Jisas Kraes
12Siu a galegaleasi u vonai lolo ure lo lalakogi noi tangaloi gatagale, ko gina galegaleasi hi a mateana mo vonai. Giniehi, a tangaloi doluegi rain mate, a vevenagi ingere doluegi rau galegaleasi. 13A galegaleasi u eno lolo ure tomue siu a Leohora noi Mosis mo bei vonai. Nge i God he valu velu te bugui nora galegaleasi, huri a Leohora he vai te mo sigei. 14Nge lo taro i Adam mo dadari lo taroi Mosis, a tangaloi doluegi rain mate, hate huri ingere rahe galegaleasi tea lo matahala mwere hi Adam u veie, lune u lalakogi vagasile lo tau leo noi God.
I Adam a nunui tangaloi hi i Jisas huri ve vin vonai te tarogi
15A hogogi tabetabegi noi God he mwere na galegaleasi noi Adam tea. A sinobu u sao ram mate a vevenagi a galegaleasi nona tangaloi gatagale. Nge a hogogi noi God u lawua sileti, a tangaloi ram lai na hogogi noi God lo dom tabetabe lawua nona tangaloi gatagale, i Jisas Kraes. 16Siu lo tangaloi hi i Adam u galegaleasi, u lei na leo vevegi. Nge a hogogi noi God u wegineu. A hogogi tabetabegi noi God u vonai lo tagui galegaleasi u sao, ko mo vai na tangaloi ram vovohoi lo nagoi God. 17Ko a galegaleasi nona tangaloi gatagale hi, a mateana mo mamalu goro na tangaloi doluegi a vevenagi a tangaloi gatagale hi. Nge siserigi ngaha a sinobu ngere hi rau lei na hogogi noi God ko a nona hogohogo tabetabegi, ingere ram vovohoi lo nagoi God. Ingere rain lei na mwasoana hogo ko rain huqegi lo henai Jisas Kraes.
18Siu mwere hi, a tangaloi doluegi rain lei na leo vevegi a vevenagi a galegaleasi noi Adam. Nge i God u lei vurugegi gide ko mo bete na hogogi mwaso lawe gide lo gineu gagareagi ingere hi i Kraes u veire. 19A tangaloi u sao ram galegaleasi a vevenagi a tangaloi gatagale u kalokalo lo leoi God, a tangaloi gatagale u rong huri God, ingeie vin vei na tangaloi u sao rain vovohoi lo nagona.
20A Leohora u vonai huri ve vin vei na galegaleasi vin esi vin liu. Nge lune a galegaleasi mo asiesi lawua, a tabetabe noi God mo mauri mo hage hage vage. 21A galegaleasi mo vai na mateana vena mamalu goro gide, nge i God u bete na nona hogogi lawera tangaloi huri ve a hogogi hi vin huqegi lo mwasoara, ko vin veire rain vovohoi lo nagona. Ko nge ngaha vin lei na mwasoana tavagituei lo henai Jisas Kraes a noda Huqe.
ទើបបានជ្រើសរើសហើយ៖
ROM 5: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
