Uttawa 8
8
Mariro o nayelhi: Amarapi
1Yamalheke Apwiiya Nlhuku nkayeerelha ashinna Musa, “Nrwee u Nafarao mwaahimerie Apwiiya Nlhuku aneera wiira, ‘Mwaahiyacheke attu aka athame wiira arwee akithimiche. 2Nansho mwakhotaka waahiyerera wiira athamache, paahi, kinowaawiha amarapi o utwarusha ilhapo inyu yonkhaye. 3Mwoolhoko wo Unaili unoochara amarapi, ni ayo anookelha mpaka unupani winyu, uchuumbani unorupa inyu, vankorini winyu, inupa cha anamitheko inyu olhupalhe ni attu inyu. Yayo amarapi ayo anookelha ata ukittu unoterekha inyu choolhia, ni nkereroni nnokandelha inyu iphepa. 4Amarapi anouwelhani mwiiruttuni mwinyu, mwiiruttuni mwa attu inyu ni mwiiruttuni mwa anamitheko inyu olhupalhe onkhaye!’ ”
5Apwiiya Nlhuku nkayeerelha ashinna Musa tho, “Mwaahimerie Naharuni ookolhe moono aya atheshe ikopo aya vachulhu mwoolhoko, vachulhu mashepa ni vachulhu mathapwi. Ni amarapi ayo anookhumelhelha ni uwanelha kila vakittu mwiilhaponi Umisri.” 6Paahi Naharuni nkayaathesha ikopo aya vachulhu maashi onkhaye, amarapi nkayaakhumelhelha ni uwanelha ilhapo yonkhaye yo Umisri. 7Nansho akhwiri o Umisri wo ukhwiri aya ni ayo chiicho yahaawiiha amarapi mwiilhaponi Umisri.
8Yamalheke Nafarao nkayeehana ashinna Musa ni Naharuni, nkayeerelha, “Mwaalhepelhe Apwiiya Nlhuku, wiira akithamihere mii ni attu aka amarapi ilha, ni mii kinowaahiya Aisraeli arwaache yakumihe isadaka wa Apwiiya Nlhuku.” 9Ashinna Musa nkayaakulha Nafarao, “Haya! Nkihimerieke etu ikatema inothanana inyu wiira kolhapelhelhekeni wa Nlhuku, kaalhepelhelhe anamitheko inyu olhupalhe ni attu inyu. Kinokowaalhepelha wiira, aalhakalhihe amarapi arii mmanupani mwinyu, ahalheke arii umwoolhokoni Unaili uwo tu!”
10Nafarao nkayaakhulha, “Meelho.”
Ashinna Musa ni ayo nkayeera, “Kinoopanga thoko chinre inyu wo wulhumacha chiyo, nchuwelhe wiira khaawo ntu riyoothe nolhikaana ni Apwiiya Nlhuku ihu. 11Amarapi anoothama unupani winyu, mmanupani mwa anamitheko inyu olhupalhe ni mmanupani mwa attu inyu. Anohalha ukhalha tu umwoolhokoni Unaili.”
12Paahi, ashinna Musa ni Naharuni nkayaathama unupani u Nafarao, ni ashinna Musa nkayonlhelha Apwiiya Nlhuku wiira yaathamihe amarapi aawihilhe aya u Nafarao. 13Apwiiya Nlhuku nkayaapanga thoko chaalhepenlhe aya ashinna Musa. Amarapi ayo nkaakhwacha mmanupani, mmapuwani, ni mmamatani. 14Attu o Umisri nkayaakukhulhulhacha amarapi ayo mapuhe wo mapuhe, ilhapo yonkhaye nkayaanukha. 15Nansho Nafarao yooneke wiira amarapi ayo ahokhwacha, ahothepa itiyamaru tho, ni wala khayewelhenlhe ashinna Musa ni Naharuni thoko Apwiiya Nlhuku chenre aya wo uhimia.
Mariro o neraru: Ashimwettu o uhuviha
16Yamalheke, Apwiiya Nlhuku nkayeerelha ashinna Musa, “Mwaahimerieke Naharuni ookolhe ikopo aya akhite vantukurukhuni, ninno ninoothathuwa ukhalha ashimwettu o uhuviha ilhapo yonkhaye yo Umisri.” 17Ashinna Musa ni Naharuni nkayaapanga chiicho. Naharuni ahookolha ikopo aya nkayaakhita vantukurukhuni, nkanaathathuwa ukhalha ashimwettu o uhuviha nkaawelhawelha attu ni ashinama. Ntukurukhu nonkhaye mwiilhaponi Umisri nkanaathathuwa ashimwettu o uhuviha. 18Akhwiri o Umisri, wo ukhwiri aya uyo, nkayaalhikacha uthathusha ntukurukhu nikhalhe ashimwettu o uhuviha, nansho khayorilhe. Ashimwettu o uhuviha ayo nkaawanelha mwaattuni ni mwa ashinama. 19Akhwiri alhe nkayeerelha Nafarao, “Ulha phi ntheko wo moono wa Nlhuku.” Nansho Nafarao nkaathepiha itiyamaru, mena khayewelhenlhe ashinna Musa ni Naharuni. Nkayaakhalha thoko Apwiiya Nlhuku chenre aya wo uhimia.
Mariro o necheshe: Iphepelhe
20Yamalheke, Apwiiya Nlhuku nkayeerelha ashinna Musa, “Meelho mpeherieke wichishuru nrweeke u Nafarao ikatema vanorwaa aya umwoolhokoni mwaahimerie wiira, Apwiiya Nlhuku aneera wiira, ‘Mwaahiyacheke attu aka athamache wiira arwee akithimiche. 21Mwakhotaka waahiyerera wiira arwaache, paahi, kinouwiiherani iphepelhe chinchi chuhuviheni, inyuva, anamitheko inyu olhupalhe ni attu inyu onkhaye. Anookelha mmanupani mwinyu ni inupa chonkhaye cha attu o Umisri. Iphepelhe chinchi chinoochara ilhapo yonkhaye yo Umisri. 22Nansho nenno nihuku nno ilhapo yo Gosheni unokhalha aya attu aka khinowa yaapatta nenno nihuviho nno. Wowo iphepelhe chiyo khachinowa chaakhalha. Vavawo phi nohalha inyu uchuwelha wiira mii Apwiiya Nlhuku kinoopanga chechiyo mwiilhaponi mwinyu. 23Kinowenanelha attu aka chittu chinohalha waapatta attu inyu. Yoyo mwaha wo ushangiha uyo unohalha upangia meelho.’ ” 24Apwiiya Nlhuku nkayaapanga thoko chaahimmie aya. Iphepelhe chinchi chinene nkachaachara unupani u Nafarao, inupa cho anamitheko aya olhupalhe ni ilhapo yonkhaye yo Umisri. Ilhapo yonkhaye yo Umisri nkayaatanganyiya ni chechiyo iphepelhe chiyo. 25Paahi Nafarao nkeehana ashinna Musa ni Naharuni, nkayeerelha, “Nrweeke etu mwakumihe isadaka wa Nlhuku inyu, nansho ikhalheke momu mwiilhaponi Umisri mu.”
26Nansho ashinna Musa nkayaakhulha, “Mena, khachinlhoka upanga chiicho, ukhalhawaya isadaka chinohalha ihu waavaha Apwiiya Nlhuku ihu, chinowaarusha attu o Umisri. Chani, attu o Umisri yanoonaka nikumihaka isadaka chinaarusha aya, ngati anonaata malhuku? 27Ninothananiya nirwee nkwaha wo mahuku mararu uthakoni, nakumihe isadaka wa Apwiiya Nlhuku ihu, thoko chinre aya wo unilhehera.”
28Paahi Nafarao nkayeera, “Kinouhiyani nrwaacheke mwakumihe isadaka wa Apwiiya Nlhuku inyu, uthakoni. Nansho nhirwaache utayi chinene. Nkilhapelhelheke etu.”
29Ashinna Musa nkayaakhulha, “Ikatema vanohalha aka uthama vawo, kinowalhepelha Apwiiya Nlhuku wiira milhoko cho iphepelhe chi chithame uwaninyu, wa anamitheko inyu olhupalhe ni wa attu inyu, meelho. Nansho inyuva nhinithepiache tho ni ukhota waahiyerera attu wiira arwaache yakumihe isadaka wa Apwiiya Nlhuku.”
30Paahi, ashinna Musa nkayaathama unupani u Nafarao, nkayaalhepelha Apwiiya Nlhuku. 31Apwiiya Nlhuku nkayaapanga thoko chaalhepenlhe aya ashinna Musa, iphepelhe chilhe nkachaathama u Nafarao, wa anamitheko aya olhupalhe ni wa attu aya. Mena khayaahanlhe ata iphepelhe imoka. 32Nansho ata ulha nkwaha ulha Nafarao ahothepa itiyamaru, mena khaahiyerenre Aisraeli wiira athamache.
ទើបបានជ្រើសរើសហើយ៖
Uttawa 8: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.