Uttawa 7
7
1Yamalheke, Apwiiya Nlhuku nkayeerelha ashinna Musa, “Mwooneke, mii kinoupangani ukhalha thoko Nlhuku wa Nafarao, ni onninyu Naharuni ayo, anookhalha o wulhumacha vanipuroni winyu. 2Mwaahimerieke onninyu Naharuni malhove onkhaye anohalha aka ulheherani. Ni ayo anowaahimeria Nafarao wiira aahiyache Aisraeli akhumache mwiilhaponi mwaya mmo. 3Nansho kinowaahelha Nafarao itiyamaru. Ata kinathepihaka ithikineha ni cho ushangiha chinchi mwiilhaponi Umisri, 4Nafarao khanowiiwelhelhani, ni vavawo kinowookolha moono aka urii ni machiri ni utwarusha wo uviha ilhapo yo Umisri, ni waaholhelha Aisraeli ukhuma Umisri. Kinowa upanga wo mitheko chulhupalhe chiicho, uhukumulha ilhapo yo Umisri. 5Ikatema vanohalha aka wookolha moono aka utwarusha ilhapo yo Umisri ni waakumiha Aisraeli, phi vavawo, attu o Umisri vanohalha aya uchuwelha wiira mii phi Apwiiya Nlhuku.” 6Paahi, ashinna Musa ni Naharuni nkayaapanga chiicho, thoko Apwiiya Nlhuku chenre aya wo waalhehera. 7Yeyo ikatema yoolhumana aya Nafarao iyo, ashinna Musa yaari ntu o iyaakha makhumi nane. Ni Naharuni aari ni ntu o iyaakha makhumi nane ni ttaru.
Ikopo i Naharuni
8Apwiiya Nlhuku nkayeerelha ashinna Musa ni Naharuni wiira, 9“Nafarao yohimeriakani wiira nhimiecheshe wo upanga cho ushangiha, mwaahimerieke Naharuni wiira amoriheke ikopo aya vathi umihoolho u Nafarao vawo. Ni iyo inothathuwa ukhalha inwaa.” 10Paahi, ashinna Musa ni Naharuni nkayaarwa u Nafarao ni upanga thoko chilheheriye aya ni Apwiiya Nlhuku. Naharuni ahomoriha ikopo aya vathi vamihoolho u Nafarao ni anamitheko aya olhupalhe, ni iyo nkhayathathuwa ukhalha inwaa. 11Nansho, Nafarao aheehanacha attu aya o irusho ni akhwiri. Ni wo ukhwiri waya wo Umisri ni ayo ahopanga chiicho. 12Kila mmoka nkaamoriha ikopo awe vathi, nkayaathathuwa ukhalha inwaa. Nansho ikopo i Naharuni yahomiria ikopo chaya. 13Ata inakhalhaka chiicho, Nafarao ahothepa itiyamaru aya, mena khayewelhenlhe, nkayaahalha thoko Apwiiya Nlhuku chenre aya wo uhimia.
Mariro anookelha Umisri
(Utt 7:14-12:36)
Mariro o upacha: Iphome
14Yamalheke Apwiiya Nlhuku nkayeerelha ashinna Musa, “Nafarao ahokhalha o itiyamaru. Ahokhota waahiyerera Aisraeli wiira athamache. 15Paahi, meelho wichishu, nrweeke mwaakumane, ikatema vanorwaa aya umwoolhokoni Unaili. Mwaalhiteke uchereshere mwoolhoko uwo. Nkusheke ikopo inyu yaathathuwilhe ukhalha inwaa ilhe. 16Mwamalhaka mwaahimerieke wiira, ‘Apwiiya Nlhuku, Nlhuku a Aebraniya, ahokiruma uwannyu kuuhimerieni wiira, mwaahiyerere attu aya arwaache uthakoni yakithimiche. Nansho mpaka vano inyuva kannottuna urumelhelha. 17Paahi, Apwiiya Nlhuku aneera wiira vano nnowaachuwelha wiira yayo phi apani. Kinowaata vachulhu maashi o mwoolhoko wo Unaili wo ilha ikopo ilha, ni maashi onkhaye anothathuwa ukhalha iphome. 18Ihopa chonkhaye chirii mmwoolhokoni Unaili chinookhwacha, ni mwoolhoko wonkhaye unowa unukha chinene, ni attu o Umisri khanowa yooria uwuria maashi ayo.’ ”
19Apwiiya Nlhuku nkayeerelha ashinna Musa, “Mwaahimerie Naharuni wiira akusheke ikopo aya atheesheke vachulhu maashi o Umisri, vachulhu miolhoko chonkhaye, mashepa onkhaye, mathapwi onkhaye ni mattiya onkhaye, ni ayo anoothathuwa iphome. Iphome inowa ukhalha mwiilhaponi mwonkhaye, ata nhina chittu chonkhaye chinohelhiya maashi.”
20Ashinna Musa ni Naharuni nkayaapanga thoko Apwiiya Nlhuku chaalhehenre aya. Naharuni ahothesha ikopo aya uchulhu umihoolho u Nafarao ni anamitheko aya olhupalhe, nkayaata vachulhu maashi o mwoolhoko wo Unaili, ni maashi onkhaye mmwoolhokoni mmwo ahothathuwa iphome. 21Ihopa nkachaakhwacha, mwoolhoko nkawaanukha chinene ata attu o Umisri khayonrie uwuria maashi aya. Ilhapo yonkhaye nkayaachara iphome. 22Nansho akhwiri o Umisri wo ukhwiri aya ahopangacha thoko chiicho. Paahi etu nrima u Nafarao nkawaathepa ulhipa, ni mena khayewelhenlhe ashinna Musa ni Naharuni, nkayaakhalha thoko Apwiiya Nlhuku chenre aya wo uhimia. 23Paahi, Nafarao nkayaahokolhia uwannyaya, wo uhilhoha chittu chaakumelhenlhe chiyo. 24Attu o Umisri onkhaye nkayaathipakacha vachereshere mwoolhoko wo Unaili wiira apatte maashi o uwuria, ukhalhawaya khayonrie uwuria maashi o mmwoolhokoni ayo.
25Nkaavira mahuku saba, toka maashi o mwoolhoko wo Naili, vaathathuwilhe aya iphome.
ទើបបានជ្រើសរើសហើយ៖
Uttawa 7: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.