Uttawa 9
9
Mariro o nethanu: Ukhwaacha mihuwo
1Yamalheke, Apwiiya Nlhuku nkayeerelha ashinna Musa wiira, “Nrwee u Nafarao mwaahimerie wiira mii Apwiiya Nlhuku, Nlhuku a Aebraniya, kineera, ‘Mwaahiyerere attu aka athamache wiira arwee akithimiche. 2Mwakhotaka waahiyerera arwaache, ni mwathepaka waavarelhelha, 3kinowookolha moono aka ni uwiiha mareta o uhilhoka chinene mmihuwoni mwinyu mwonkhaye, ing'ope, ifarasi, iphuta, ingamiya, ipuri ni ikhondoro. 4Tho, kinomianiha mihuwo cha Aisraeli ni mihuwo cha attu o Umisri wiira mwannama ata mmoka a Aisraeli hikhwe.’ ” 5Apwiiya Nlhuku nkayaaromolha ikatema, nkayeera, “Meelho, kinoopanga yoyo ntheko uyo mwiilhaponi Umisri.”
6Waashelhe waya Apwiiya Nlhuku nkayaapanga thoko chaahimmie aya. Mihuwo chonkhaye cha attu o Umisri chahokhwacha, nansho khaawo mwannama ata mmoka a Aisraeli akhwilhe. 7Nafarao nkaakoherera ittu ikhumelhenlhe wo mihuwo cha Aisraeli, nkayeerelhiya wiira khaawo ata mwannama aya mmoka khwilhe. Inakhalhaka chiicho, Nafarao nkayaahalha ni ulhipa waya nrima, mena khahiyerenre Aisraeli wiira athamache.
Mariro o sita: Analhipwe
8Yamalheke, Apwiiya Nlhuku nkayeerelha ashinna Musa ni Naharuni wiira, “Kila mmoka inyu akusheke itura yo vantanuruni vanopaheriya ichokaa, munthathani mwawe. Ni ashinna Musa amwarusheke itura iyo uchulhu umihoolho wa Nafarao. 9Itura iyo inookhalha ntukurukhu ninohalha uwanelha vachulhu ilhapo yonkhaye yo Umisri. Ni uwiiha analhipwe anohalha uphulhia ni waahelha makhwata attu ni ashinama kila vakittu Umisri.” 10Paahi, oyelhi nkayaakusha itura yo vantanuruni mmathathani mwaya. Nkayaarwa u Nafarao, ni ashinna Musa nkayaamwarusha uchulhu. Analhipwe nkaakhuma ni uphulhia ukhalha makhwata o uweria wa attu ni wa ashinama. 11Attu ni ashinama nkayaakhuma analhipwe ata ni akhwiri alhe khayonrie weemelha umihoolho wa ashinna Musa ni uvingana. Ukhalhawaya ni ayo vamoka ni attu o Umisri onkhaye yahaakhuma yayo analhipwe ayo. 12Nansho Apwiiya Nlhuku nkayaathepiha itiyamaru Nafarao, ni ayo khayeewelhenlhe ashinna Musa ni Naharuni thoko Apwiiya Nlhuku chenre aya wo uhimia.
Mariro o saba: Ipulha yo malhuku
13Yamalheke, Apwiiya Nlhuku nkayeerelha ashinna Musa, “Meelho munkwe wichishuru mwaarwelhe Nafarao, mwaahimerie wiira mii Apwiiya Nlhuku, Nlhuku a Aebraniya, kineera cho, ‘Mwaahiye attu aka athame wiira arwee akithimiche. 14Ukhalhawaya ulha nkwaha ulha kinowiiha mariro molhupalhe uwannyu, ni wa anamitheko inyu, ni wa attu inyu. Ni inyu nnochuwelha wiira khaawo ata mmoka nolhikaana ni mii mwiilhaponi mwonkhaye. 15Yakaari kahookolha moono aka, ni uwaatani inyuva ni attu inyu wo mareta, mwanlhakalhihiya. 16Nansho, phi nlhatu no uhiyani nkhalhe akumi wiira kuwooniheni wooria waka, tho wiira nchina naka nichuwanie mwiilhaponi mwonkhaye. 17Nansho inyu, nnoothepa wooniha itiyamaru wa attu aka, ni wala khannaahiyerera wiira arwaache. 18Paahi etu meelho ikatema thoko yelha, kinoorupiha ipulha yulhupalhe yo malhuku, ihinapacha woonia wiilhaponi Umisri uno toka mapachero mpaka nna. 19Paahi vano mwaarumeke attu akurumiche wiira mihuwo chinyu ni kila ittu iri mmamatani, chithokoreriye rata. Ukhalhawaya ipulha yo malhuku inonrupelha kila ntu, ni ntu riyoothe hirii vawani ni chittu chiyo chinookhwacha.’ ”
20Anamitheko akina a Nafarao veewilhe aya malhove a Apwiiya Nlhuku ayo yahoovacha, nkayaahokolhoshacha ipotta chaya ni ashinama aya vawani ni waatteelha mpaani. 21Nansho ntu ahewelhenlhe nlhove na Apwiiya Nlhuku, ahaahiyacha ipotta ni ashinama aya voonene mmamatani.
22Apwiiya Nlhuku nkayeerelha ashinna Musa, “Ntheeshe moono inyu wiirimu, irupe ipulha yo malhuku, irupe kila vakittu mwiilhaponi Umisri. Yaarupelhe attu, ashinama, ni vachulhu mikoko chonkhaye cho umamatani.” 23Paahi ashinna Musa nkayaathesha moono aya wiirimu. Apwiiya Nlhuku nkayaawiiha ipulha yo malhuku ni ithari ni mooro nkawaaverunya vachulhu ilhapo. Apwiiya Nlhuku nkayaarupiha ipulha yo malhuku vachulhu ilhapo yonkhaye yo Umisri. 24Ipulha yo malhuku vaarupa aya vawo, ithari yahoritima, ni mooro nkawaawulhuwa velhaponi. Mena khayaari ni malhikaaniho o yeyo ipulha iyo ilhapo yonkhaye yo Umisri toka wuupiya wo ilhapo. 25Ipulha yo malhuku iyo yahotanganya kila yaariwo mmamatani, yaheeva attu ni ashinama ilhapo yonkhaye yo Umisri. Malhuku o ipulha iyo yahontha kila nkoko ni wunthakacha kila mwiri mmamatani. 26Yeyo ipulha iyo yahorupa ilhapo yonkhaye yo Umisri, yaahikhalhe Ugosheni waakhalha aya Aisraeli. Wowo khayaarumpe ipulha yo malhuku iyo.
27Nafarao nkaaruma attu yeehane ashinna Musa ni Naharuni, nkaahimeria wiira, “Ulha nkwaha ulha, mii kihotteka. Apwiiya Nlhuku ahanaa ikekhia, mii ni attu aka nihotteka. 28Mwaalhepelheke Apwiiya Nlhuku, ukhalhawaya ithari cho uritima chi ni ipulha yo malhuku ilha chihothepa. Mii kinouhiyererani mwaatti nrwaacheke, nhilhokelhe chinene tho.”
29Ashinna Musa nkayaakhulha, “Phiyaru tu vanohalha aka ukhuma vawani va, kinoothesha miono chaka ni waalhepelha Apwiiya Nlhuku. Ithari chiyo chinoomaalha, ni ipulha yo malhuku iyo inoohiya urupa, nchuwelhe wiira ilhapo ilha yonkhaye ya Apwiiya Nlhuku. 30Nansho kihochuwelha wiira inyuva ni anamitheko inyu olhupalhe, bado khannaarumelhelha Apwiiya Nlhuku.”
31Ipulha yo malhuku yaarupilhe iyo yahotanganyacha choolhia chonkhaye, ni mikoko cho nttoche nooteelha. Ukhalhawaya choolhia chaari chinakhomanlhe ni yoteelha chaari chinatuvilhe. 32Nansho ingaano ni choolhia chikina khacheetettiye, ukhalhawaya chaari chihinonnuwa.
33Paahi ashinna Musa ahothama u Nafarao, nkayaarwa uchereshere iwani. Yamalheke, ahothesha miono chaya waalhepelha Apwiiya Nlhuku. Ithari chilhe ni ipulha yo malhuku ilhe chahotondova, ipulha nkayaahiya urupa. 34Nansho Nafarao yooneke wiira ipulha yo malhuku ni ithari chihotondova, ahothepiha uwonya tho, nkayaathepa itiyamaru aya vamoka ni anamitheko aya olhupalhe. 35Paahi Nafarao ahothepa itiyamaru ni ukhota waahiyerera Aisraeli wiira athamache arwee, thoko Apwiiya Nlhuku cherenlhe aya ashinna Musa.
ទើបបានជ្រើសរើសហើយ៖
Uttawa 9: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.