Klein maar kragdadig

"Al het jy met min begin, sal jy met baie eindig" (Job 8:7 NLV).

Ons is geneig om aan wonderwerke te dink as enorm en geweldig en skokkend in omvang. Goed, party wonderwerke lyk so. Wat ons maklik vergeet, is dat daar voortdurend wonderwerke rondom ons gebeur. Die Here stuur ook klein wonderwerke van stapel wat stukkie vir stukkie groei en (aanvanklik) glad nie tasbaar of opsigtelik of noemenswaardig lyk nie.

Hy gee ons elke dag nuwe krag en moed op maniere wat onmoontlik sou wees binne die beperkings van die aardse werklikheid. Hy laat geestelike groei en selfs fisieke groei, genesing, vernuwing en herlewing toe ten spyte van liggaamlike veroudering. In God se koninkryk is niemand ’n “has-been” nie. As die Heilige Gees in jou leef, is jy steeds volkome in die “ingroep” sover dit die koninkryk betref.