Om te groei, is genade

"In sy genade het God julle geroep om in Christus deel te hê aan sy ewige heerlikheid. Nadat julle ’n kort tydjie swaargekry het, sal Hy julle self weer herstel; Hy sal julle moedig, sterk en standvastig maak" (1 Petrus 5:10 NLV).

Petrus skryf hier in 1 Petrus 5 vir ’n kerk wat vervolg word. Hy lê klem op God se genade – want in sy genade laat Hy ons toe om swaar te kry omdat Hy presies weet hoeveel ons uiteindelik daaruit baat.

’n Goeie ouer sal van tyd tot tyd sy kind ’n swaar sak inkopies laat dra om sy spiere te oefen. God is ’n perfekte ouer. Partykeer laat Hy ons swaarkry om ons sterk te maak (1 Petrus 1:7). Jy kan waarskynlik terugdink aan ’n tyd in jou lewe wat baie moeilik was. Hoewel jy dit beslis nie wil oorhê, of vir enigiemand daardie selfde ervaring toewens nie, sal jy dit ook nie verruil nie. Dié tydperk van seer en stywe geestelike spiere het iets in jou gevorm wat geen ander ervaring sou kon voortbring nie.