'n Bybelse Perspektief Op Dood en LeweVoorbeeld

Om geestelik lewend te wees beteken om vir sonde dood te wees

“ék leef nie meer nie, maar Christus leef in my! Die lewe wat ek nou liggaamlik leef, leef ek in geloof, die geloof in die Seun van God, wat my liefgehad en Homself vir my oorgegee het” (Galasiërs 2:20 AFR20)

Wanneer jy tot geloof kom, ontvang jy die ewige lewe. Jesus Christus kom woon in jou met sy Heilige Gees en vernuwe jou hart. Dit beteken ook dat daar nie meer plek vir sonde en bose begeertes is nie. Die Bybel noem dit “die wellustige begeertes van die vlees” of “ons ou self” wat oorkom moet word. Al daardie sondigheid moet doodgemaak word om vir die nuwe lewe plek te maak wat nou aan die eer van God gewy is. Paulus som dit soos volg op: “Beskou julleself dan so dat julle in Christus Jesus dood is vir die sonde, maar lewend vir God” (Romeine 6:11 AFR20).

Dood en lewe. Sterwe en vernuwing. Dit is twee aspekte van bekering wat albei nodig is. Hierdie woorde wys hoe radikaal ons moet verander om die ewige lewe saam met die Here God te ontvang. 'n Bietjie verbetering hier en daar is nie voldoende nie. Wanneer God in ons harte kom woon, moet alle duisternis heeltemal verdwyn.

Gelowiges word herhaaldelik opgeroep om te breek met die sondes waarin hulle vroeër geleef het. Hulle hoef dit nie uit eie krag te doen nie. Hierdie proses gebeur “deur die Gees” (Romeine 8:13 AFR20).

Is jy bereid om die Heilige Gees toe te laat om in jou hart te werk, al beteken dit dat jou begeertes of gewoontes verander?