Rick Warren se Daaglikse OordenkingsVoorbeeld

Helende keuses: opregte vriendskappe

Gelowiges behoort opregte vriendskappe te ervaar.

Opregte vriendskappe is nie oppervlakkig en aangeplak nie. Dit behels dat jy jou diepste gevoelens met iemand deel.

Sulke vriendskappe ontwikkel wanneer ons eerlik is oor wie ons is en wat in ons lewens aan die gebeur is. Dit ontwikkel wanneer ons ons pyn deel, ons gevoelens bekendmaak, ons mislukkings bely, ons twyfel blootlê, ons vrese en swakhede erken en hulp en gebed vra.

Ongelukkig is sulke soort vriendskappe net die teenoorgestelde van wat ons in baie kerke vind. In plaas van 'n atmosfeer van eerlikheid en nederigheid, raak ons betrokke in voorgee, rolspel, politieke stryd, oppervlakkige vriendelikheid en nuttelose gesprekke. Ons begin maskers dra, hou 'n mooi front voor en maak asof alles in ons lewens reg verloop. Sulke gedrag versmoor opregte vriendskap.

Slegs wanneer ons oop kaarte speel oor ons lewens, kan ons opregte vriendskappe ervaar. Die wêreld dink dat intimiteit in die donker plaasvind, maar God sê dit gebeur in die lig. Ons gebruik die donker om ons seer, foute, vrese, mislukkings en gebreke weg te steek. In God se lig kan ons egter al hierdie dinge openbaar maak en erken wie ons regtig is.

Dis hoe ons geestelik kan groei en emosioneel gesond kan wees. Die Bybel sê: "Bely julle sondes eerlik teenoor mekaar en bid vir mekaar, sodat julle gesond kan word" (Jakobus 5:16).