Rick Warren se Daaglikse OordenkingsVoorbeeld

God sê jy is aanvaarbaar

Ons is meestal geneig om ons selfvertroue te baseer op wat ander mense dink, dus wend ons alle pogings aan om aanvaar te word. Ons koop dinge, dra dinge en sluit by dinge aan — net vir die voordeel daarvan om deur ons vriende, familie, medewerkers en ons portuurgroep aanvaar te word.

Sê God jy moet aanvaarding verdien? Dat jy dit ooit kan verdien? Nee. Die Bybel sê net: God het jou aanvaar.

As jy 'n gelowige is, dan het jy Jesus in jou lewe aanvaar. Verstaan jy egter dat Jesus jou aanvaar het? Hy het jou onvoorwaardelik lief en aanvaar jou vir wie jy is.

Daar is sommige wat grootgeword het met ouers wat moeilik was om tevrede te stel. Ongeag wat jy gedoen het, was dit nooit, ooit goed genoeg nie. Selfs vandag probeer jy nog om hulle liefde en goedkeuring te verdien.

Indien dit die geval is — met jou ouers of enigiemand anders wat jy probeer tevrede stel — is daar twee dinge wat jy moet weet:

Eerstens: die kanse is baie skraal dat jy ooit daardie goedkeuring of aanvaarding sal kry. Nie as gevolg van wie jy is nie, maar as gevolg van wie die ander persoon is. Tweedens: jy het nie die goedkeuring nodig nie, want jy is vir God aanvaarbaar. Jy het niemand se goedkeuring nodig om gelukkig te wees nie.

Jy het slegs die liefde en goedkeuring van een Persoon nodig en dit het jy reeds: God sê jy is aanvaarbaar!