Oswald Chambers: Vreugde - Krag In Die Here

Bybeldagboek
God se seëninge val soos Sy reën, op beide bose en goeie mense. Die groot seëninge van gesondheid, genialiteit en voorspoed, kom alles vanuit Sy oorvloedige genade, en nie weens die toestand van die ontvangers se karakter nie. Byvoorbeeld, as gesondheid 'n teken was dat 'n mens se saak met God reg is, sal ons verward wees oor wat 'n goeie karakter is, want baie slegte mense geniet goeie gesondheid.



Daar is 'n verskil tussen omgewing en omstandighede. Elke mens het sy eie omgewing; dit is daardie deel van sy omstandighede wat sy ingesteldheid pas. Ons maak elkeen ons eie omgewing, want ons persoonlikhede doen dit vir ons. Geluk beteken dus dat ons net daardie dinge uit ons omstandighede kies wat ons gelukkig sal hou. Dit is die groot basis van valse Christendom. Nêrens praat die Bybel van 'n "gelukkige" Christen nie; dit praat wel oorvloediglik van vreugde. Geluk hang van dinge af wat gebeur. Vreugde word nooit deur eksterne omstandighede geraak nie.



Oordenkingsvrae: Hoe beïnvloed teëspoed my vreugde? Meet ek God se liefde vir my aan Sy seëninge wat hy aan my gee?



Aanhalings uit: "God’s Workmanship" en "The Shadow of an Agony", © Discovery House Uitgewers