Soma Biblia Kila Siku Oktoba/2022Mfano

Akawapa uwezo na mamlaka juu ya pepo wote na kuponya maradhi (m.1). Sisi watumishi wa kanisa tuna wajibu mbali mbali. Lakini hatuna uwezo au amri ya kiroho ya kutenda kazi yetu asipotupa Bwana Yesu. Sio sisi tuliomchagua yeye. Ndivyo Yesu anatuambia akisema, Si ninyi mlionichagua mimi, bali ni mimi niliyewachagua ninyi; nami nikawaweka mwende mkazae matunda; na matunda yenu yapate kukaa; ili kwamba lo lote mmwombalo Baba kwa jina langu awapeni (Yn 15:16). Hatuwezi kusema kwa mtu: "nakuponya ugonjwa wako", au "pepo nakuamuru toka", au "nakusamehe dhambi zako." Lazima tuongeze neno: "kwa jina la Yesu". Hapo tunaweza kusema kama wanafunzi wa Yesu waliorudi kwa furaha, wakisema, Bwana, hata pepo wanatutii kwa jina lako (10:17). Hatuwezi kujitakia wajibu fulani katika kanisa. Hatuwezi kujipatia wenyewe mamlaka. Ukifanya hivyo si mtumishi wa kweli, maana hali halisi ni kama Paulo anavyotukumbusha katika 1 Kor 12:11, Kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye.