Vraag 42: Wat moet jy bid? — Numeri 6:23-27

1. Die Aäronitiese seën was die Here se verbintenis aan die volk dat Hy vir hulle sou sorg met die omvattende beskerming, genade en vrede van sy teenwoordigheid, wat verhoring van gebede en geloftes sou insluit. Watter impak het dit vandag nog op jou?

2. Die seën was bedoel vir die gereelde, normale gebede en aanbidding sowel as die ongereelde, abnormale situasies waarin die volk hulle van tyd tot tyd in hulle verhouding met mekaar sou bevind. In Afrikaans lui dit, meer direk vertaal, as volg:

“Die Here seën jou en beskerm jou.

Die Here se gesig skyn oor jou en Hy is jou genadig.

Die Here lig sy gesig op oor jou en Hy gee aan jou vrede.”

Johannes koppel dit aan Jesus se vrede wat Hy vir ons belowe vóór sy kruisiging (Johannes 14:27; 16:33) en ná sy opstanding (Johannes 20:19). Hy verbind elemente daarvan ook aan Jesus se wederkoms en God se teenwoordigheid in die nuwe hemel en aarde: “die Here God sal hulle verlig” (Openbaring 22:5). Dieselfde geld Paulus se Trinitariese seën in die bekende seëngroet aan die einde van sy tweede brief aan die Korinte: “Die genade van die Here Jesus Christus en die liefde van God en die gemeenskap van die Heilige Gees sal by julle almal wees” (2 Korintiërs 13:13). Kan jy dié seën meer gereeld in jou gebede gebruik? Waarvoor en vir wie?

3. Lees die verse later vandag weer om jou te herinner aan die krag van hierdie Aäronitiese seën in jou en jou geloofsgemeenskap se lewe.

4. Jy kan later vanaand die verse weer lees in die konteks van Numeri 6 met die tema: Die impak van geloftes aan en die seën van die Here.