Kom, Here Jesus, KomSample

Lees: Lukas 24:44–53

SOAP: Lukas 24:51

Terwyl Hy hulle seën, het Hy van hulle af weggegaan en is Hy in die hemel opgeneem

Oordenking

Ek hou baie van die beeld in ons versie van vandag. Terwyl Jesus besig was om die dissipels te seën, is Hy in die hemel opgeneem. Die laaste daad wat Jesus op die aarde uitgevoer het, was om diegene om Hom te seën. Ek kan myself nie eers indink hoe ongelooflik dit moes wees om te sien nie. Terwyl Jesus besig was om diegene om hom te seën en te bemoedig, is Hy in die hemel opgeneem. Wat ‘n kragtige voorbeeld vir ons. Soos ons voortgaan met ons dae in die skadu van Jesus se wederkoms, mag ons ook ‘n seën en bemoediging wees vir diegene om ons, tot die presiese oomblik wat ons Jesus aangesig tot aangesig sien. Soos Jesus geneem is, so sal Hy terugekeer. Wat ‘n wonderlike belofte van hoop het ons nie.

Voordat Jesus opgevaar het na die hemel, het Hy sy dissipels herinner dat hulle sy getuies vir die wêreld moes wees. Hierdie einste opdrag wat Hy vir sy dissipels gegee het, het Hy ook vir jou en my gegee. Ook óns moet sy getuies wees in ‘n wêreld wat toekyk en seer het (Lukas 24:48).

Voordat mense van Jesus wil hoor, wil hulle dikwels eers die verskil sien wat Hy in jou lewe gemaak het. Deel jou getuienis. Dit hoef nie uitspattig of dramaties te wees nie, net eg. Deel hoe jy eens sonder hoop was, en oor die hoop wat jy nou het te danke aan Jesus. Deel oor die gebrokenheid van jou verlede en hoe Jesus jou kom heel maak het en jou gebrokenheid in skoonheid kom verander het tot sy eer. Wys en deel wat Jesus in jou lewe gedoen het, en jy sal sy getuie in ‘n seer wêreld wees. Deel liefde, bemoediging en die rede vir jou hoop met diegene om jou soos wat ‘n mens konfetti by ‘n partytjie strooi! Ons het soveel om na uit te sien en te vier soos die dag van ons Here se wederkoms nader kom.

Gebed

Liewe Here, help my om ‘n kragtige getuie vir u te wees. Help my om dapper en moedig te wees terwyl ek die rede vir my hoop en die bron van my sekuriteit met ander deel. Help my om die mense om my te bemoedig en te seën, soos wat U met die dissipels gedoen het. Gebruik my om ander lief te hê en te bemoedig terwyl ons gretig op u wederkoms wag. Tot daardie dag bid ons, kom, Here Jesus, kom. Amen.