Kom, Here Jesus, KomSample

Lees: Handelinge 1:1–11; Hebreërs 9:27–28

SOAP: Handelinge 1:11

“Galileërs, waarom staan julle so na die hemel en kyk? Hierdie Jesus wat van julle af na die hemel toe opgeneem is, sal net so terugkom soos julle Hom na die hemel toe sien opgaan het.”

Oordenking

Is jy nie ook mal oor hierdie opmerking van die twee engele teenoor die dissipels nie? Met ander woorde, “hou op om daar te staan en jul tyd te mors deur op te kyk. Gaan doen wat Jesus vir jul beveel het om te doen!” Jy kan amper die emosie in hul woorde hoor. Jesus gaan terugkeer en daar is nie tyd te verspeel nie. Op dieselfde wyse wat Jesus weggegaan het, liggaamlik en sigbaar, sal Hy terugkeer – behalwe dat wanneer Hy weer terugkeer, dit sal wees om oordeel oor die aarde te bring.

Na Jesus se opstanding, het Hy vir ‘n tydperk van veertig dae aan die dissipels, sowel as honderde ander mense verskyn. Kan jy jou net indink hoe dit moes wees? Hierdie spesiale tyd saam met Jesus het die dissipels verander. Voorheen, toe Jesus oorgelewer is om gekruisig te word, het hulle Hom verlaat. Uit vrees vir hul lewens het hulle die Here aan wie hulle trou beloof het, in die steek gelaat. Tog nou, nadat hulle ooggetuies van die opgestane Christus was, kon hul eerstehands sien dat alles wat Hy vir hulle oor sy dood en opstanding vertel het, tot vervulling gekom het. Christus se opstanding het hul lewens vir ewig verander, en die veertig dae wat hulle saam met Hom spandeer het voordat hy teruggekeer het hemel toe, het hulle verander van vreesbevange na vreesloos. Dieselfde sal gebeur met ons wanneer ons tyd saam met Jesus deurbring.

Dus, neem die engele se opmerkings ter harte en laat ons nie hier staan en opkyk nie. Kom ons wees getuies in ons Jerusalems, Judeas, Samarias en tot aan die uithoeke van die wêreld deur ons wandel, woorde en werk. Bemagtig deur die Heilige Gees, laat ons vreesloos uitgaan in die wêreld, en die waarheid van ons opgestane Here verkondig.

Gebed

Liewe Here, help ons om vreesloos u belofte dat U eendag sal terugkeer te verkondig, en elke dag te laat saakmaak. Help ons om die getuienis van u wonderbaarlike werk in ons lewens liefdevol en met vrymoedigheid te deel met diegene naby aan ons, asook diegene wat ver is. Terwyl ons smag na u wederkoms, help ons om nie vasgevang te raak om in die lug te bly opkyk nie, maar om eerder elke dag wat U vir ons gee hard te bly werk. Tot daardie dag, kom, Here Jesus, kom. Amen.