Levitico 2
2
Mga Dolot na Pagkakan
1Kun magdara nin trigo an siisay man tanganing idolot sa Kagurangnan bilang dolot na pagkakan, kaipuhan na gilingon niya ngona iyan na magin arina. Uulaan niya iyan nin lana nin oliba asin bubugtakan nin insenso sa ibabaw, 2dangan dadarahon niya sa mga pading aki ni Aaron. Mahakbot an padi nin sarong gugom kan arina saka lana, kaiba an gabos na insenso dangan tututongon niya iyan sa altar bilang tanda na an gabos idinolot na sa Kagurangnan. An parong kaiyan nawiwilihan nin Kagurangnan. 3An tada kan idinolot na pagkakan mapapaduman sa mga padi; banal iyan huli ta kabtang iyan kan pagkakan na idinolot sa Kagurangnan.
4Kun tinapay na linuto sa horno an idodolot, kaipuhan linuto iyan na mayo nin lebadura. Pwedeng mahibog iyan o manipis, sinalakan nin lana nin oliba o linahidan sana.
5Kun an idodolot tinapay na linuto sa parilya, kaipuhan gibohon iyan hale sa arina na may salak na lana nin oliba alagad mayo nin lebadura. 6Dangan roronoton ngona iyan asin uulaan nin lana; iyan sarong dolot na pagkakan.
7Kun an idodolot tinapay na linuto sa kawali, kaipuhan gibohon iyan sa arina asin sa lana nin oliba. 8Darahon nindo iyan bilang dolot na pagkakan sa Kagurangnan asin itao nindo sa padi; an padi an madara kaiyan sa altar. 9Makua nin sadit na kabtang an padi bilang tanda na an gabos idinolot sa Kagurangnan asin tututongon niya iyan sa altar. An parong kaiyan nawiwilihan nin Kagurangnan. 10An tada kan idinolot mapapaduman sa mga padi; banal iyan huli ta kabtang iyan kan pagkakan na idinolot sa Kagurangnan.
11Dai nanggad kamo magdara nin dolot na pagkakan sa Kagurangnan na may lebadura; dai kamo maggamit nin lebadura o dugos sa saindong mga dolot na pagkakan para sa Kagurangnan. 12An enot na inani nindo taon-taon dadarahon nindo sa Kagurangnan bilang dolot, alagad dai iyan susuloon duman sa altar. 13An gabos na dolot na gibo sa arina kaipuhan may timplang asin. An asin iyo an tanda kan tipan na satong ginibo. (Kaya bugtakan nindo nin asin an gabos nindong dolot.) 14Kun kamo madara sa Kagurangnan nin dolot na hale sa saindong mga enot na ani kan trigo, an idolot nindo iyo an dinarang o giniling. 15Ulaan nindo nin lana nin oliba sa ibabaw dangan bugtakan nin insenso. 16Bilang tanda, tututongon kan padi an kabtang kan dolot, an lana, asin an gabos na insenso. Iyan sarong dolot na pagkakan para sa Kagurangnan.
ទើបបានជ្រើសរើសហើយ៖
Levitico 2: MBBBIK92
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Marahay na Bareta Biblia © Philippine Bible Society, 1992.