Levitico 3
3
Mga Dolot Para sa Katoninongan
1Kun igwa saindo nin magdolot nin saro kan saiyang mga lalaki o babaeng baka, bilang dolot para sa katoninongan, dapat na mayo iyan nin kaninan. 2Iduduta kan kagdolot an saiyang kamot sa ibabaw kan payo kan hayop dangan bubunoon niya iyan sa may pintoan kan Tabernakulo. Pakatapos, an dugo kan hayop iuula kan mga pading aki ni Aaron sa apat na gilid kan altar. 3Idodolot ninda sa Kagurangnan bilang atang para sa katoninongan an gabos na taba na yaon sa laog kan hawak kan hayop, 4an duwang bato asin an taba kaiyan, dangan an pinakamarahay na kabtang kan katoy. 5Tututongon an mga iyan kan mga padi duman sa altar kaiba kan mga tinutong na atang. An parong kaiyan nawiwilihan nin Kagurangnan.
6Kun karnero o kanding, lalaki man o babae, an idodolot bilang atang para sa katoninongan, kaipuhan mayo iyan nin kaninan. 7Kun karnero an idodolot, 8iduduta kan kagdolot an saiyang kamot sa ibabaw kan payo kan karnero dangan bubunoon niya iyan sa atubangan kan Tabernakulo. Pakatapos, iuula kan mga padi an dugo kan karnero sa apat na gilid kan altar. 9Idodolot ninda sa Kagurangnan bilang atang para sa katoninongan an taba, an bilog na matabang ikog na puputolon hale sa may odog, an gabos na taba na minatahob kan bituka, 10an duwang bato kaiba an taba kaiyan, asin an pinakamarahay na kabtang kan katoy. 11Tututongon iyan kan padi duman sa altar bilang dolot na pagkakan sa Kagurangnan.
12Kun an idodolot sarong kanding, 13iduduta kan kagdolot an saiyang kamot sa ibabaw kan payo kan kanding dangan bubunoon niya iyan sa atubang kan Tabernakulo. An dugo kan hayop iuula kan mga padi sa apat na gilid kan altar, 14asin idodolot ninda sa Kagurangnan bilang dolot na pagkakan an gabos na taba na yaon sa ibabaw kan bituka, 15an duwang bato kaiba an taba kaiyan sagkod an pinakamarahay na kabtang kan katoy. 16An mga iyan tututongon kan padi duman sa altar bilang sarong dolot na pagkakan na an parong nawiwilihan nin Kagurangnan. An gabos na taba sadiri nin Kagurangnan. 17Sagkod pa man dai nin siisay man sa mga Israelita an pwedeng magkakan kan taba saka dugo; iyan sarong pagboot na kukuyogon kan gabos na Israelita saen man sinda mag-erok.
ទើបបានជ្រើសរើសហើយ៖
Levitico 3: MBBBIK92
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Marahay na Bareta Biblia © Philippine Bible Society, 1992.