Levitico 1
1
Mga Sakripisyong Bilog na Tinutong
1Hale sa Tabernakulo, inapod nin Kagurangnan si Moises asin tinawan kan minasunod na pagsusundon 2na kukuyogon kan mga Israelita kun nagdodolot sinda nin mga sakripisyo.
Kun an siisay man saindo magdara nin dolot sa Kagurangnan, pwede niyang darahon an saro kan saiyang mga baka, karnero o kanding. 3Kun sarong baka an idodolot niya bilang tinutong na atang, kaipuhan lalaki iyan asin mayo nin kaninan. Idodolot niya iyan duman sa may pintoan kan Tabernakulo tanganing akoon siya nin Kagurangnan. 4Iduduta niya an saiyang kamot sa ibabaw kan payo kan hayop, asin aakoon iyan bilang pantubos kan saiyang mga kasalan. 5Dangan bubunoon niya an hayop sa atubang nin Kagurangnan, asin an dugo kaiyan idodolot sa Kagurangnan kan mga pading aki ni Aaron. Iuula ninda an dugo sa apat na gilid kan altar na yaon sa may pintoan kan Tabernakulo. 6Dangan aanitan niya an hayop asin pepedasohon. 7An mga padi an mapakarahay kan mga igatong sa altar dangan maamak kaiyan. 8An pinedasong karne kan hayop kaiba an payo asin taba kaiyan ibubugtak ninda sa ibabaw kan kalayo. 9An kagdolot iyo an mahugas kan bituka asin kan nasa hurihan na mga bitis kan hayop. An padi iyo an matutong kan bilog na atang sa altar. An parong kaiyan nawiwilihan nin Kagurangnan.
10Kun an idodolot kan lalaki saro kan saiyang mga karnero o kanding, kaipuhan na lalaki asin mayong kaninan. 11Bubunoon niya iyan sa parteng amihan kan altar asin an mga padi iyo an maula kan dugo kan hayop sa apat na gilid kan altar. 12Pakatapos na mapedaso kan lalaking nag-atang an hayop, ibubugtak iyan kan padi sa ibabaw kan kalayo sa altar, kaiba an payo saka an taba. 13Huhugasan kan kagdolot an bituka asin an nasa hurihan na mga bitis kan hayop, dangan idodolot kan padi an bilog na atang; tututongon niya iyan gabos sa altar. An parong kaiyan nawiwilihan nin Kagurangnan.
14Kun an saiyang idodolot bilang tinutong na atang sarong gamgam, kaipuhan na magdara siya nin agbaan o salampati. 15An padi iyo an madara kaiyan sa altar asin pipiripiton niya an liog kan gamgam dangan susuloon an payo kaini duman sa altar. Papatagdoon niya an dugo sa gilid kan altar sagkod na maubos. 16Pakatapos, hahaleon niya an butsi asin an mga balukag kan gamgam dangan itatapok niya sa parteng sirangan kan altar, sa lugar na binubugtakan kan abo. 17Dangan kakapotan niya an mag-ibong na pakpak asin babaakon niya an hawak, alagad dai niya pagsusuhayon. Pakatapos, tututongon niyang bilog an gamgam duman sa altar. An parong kaiyan nawiwilihan nin Kagurangnan.
ទើបបានជ្រើសរើសហើយ៖
Levitico 1: MBBBIK92
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Marahay na Bareta Biblia © Philippine Bible Society, 1992.