Markuse 12
12
Adsiujomik perorsêvilerijunik vainiliksatalingmik. kênaujanik nunaliksiutauᴋojaujunik. Makitsomârnermik. Perᴋojamik anginerpaujomik. Kristusib kinausinganik. Udsertorᴋojaunermik Farisêerinit. Uigarniub tunergutiksârsuanik.
1Adsiujuniglo oᴋarvigilerpait: Anguteᴋalauᴋpoᴋ perorsêviliortomik, vainiliksanik ilijivlune, avatâlo avaluliudlarlugo; paungallo iptêjartauviksanganik sanalaurivoᴋ, nuvuguseᴋsoaliorivorlo; perorsêvilerijunullo pimajauᴋogamiuk, nuname asianut aularpoᴋ.
2Paungallo inilervait naliutingmat, kivgame ilangat tilivâ perorsêvilerijunut, perorsêviub paunganginik pijartorᴋolugo.
3Tâpkoale tiguvât, anaudlarlugolo naksartinagolo aulartipât.
4Ama kivgamik asianik tiliklerpoᴋ taipkonunga; tâmna ujarᴋanut milorpât, niaᴋoa kilidlarlugo, mitautigivlugolo aulartipât.
5Ama kivgamik asianik tiliklerpoᴋ; tâmnale toᴋopât: asingillo unuktut, ilangit isaᴋavait, ilangillo toᴋodlugit.
6Sulle ernetauᴋarpoᴋ nagligijaminik; tâmna kingorliotilerdlugo tiligiva taipkonunga, oᴋarlune: Ernera ileraginiarpât.
7Perorsêvilerijulle ingmingnut oᴋarput: Tagva kingormgujijuksaᴋ; attê, toᴋoniarlavut, kingormgutijaksangillo uvagut pigilerdlugit.
8Tigulugolo toᴋopât, egidlugolo perorsêviub silatânut.
9Perorsêviub inua, ᴋanoᴋ tagva pijomârᴋâ? tikitsomârpoᴋ, perorsêvilerijut ukkua toᴋodlugit, perorsêviglo asinginut pimajauᴋojomârpâ.
10Aglait ukua atualaungilasê: Ujarak, igloliortut igitangat, tâmna iglub terreᴋoa ujaraulernerpôᴋ?
11Tagva Nâlekab piniarninga, tatamnadlarporlo ijiptingnut.
12Tigunasuaralloarpâllo, (inuille erᴋsigivait) malugigamitsuk, adsuijomut matomunga oᴋautigingmagit; ᴋemaklugolo tâva aularput.
13Tilivaillo tâpsomunga Farisêerit Herôdesiblo kivgangita ilangit, oᴋausinginut aportinasuarlugo.
14Tâpkoa tikinamitsuk, aperivât: Ajoᴋertuijoᴋ, okpernartôjotit ᴋaujimavaptigit, inuillo sivôragingilatit, tâpkoa kinauningit kamaginginangne; Gûdemullo apᴋotiksamik ajoᴋertuitsiarpotit. Ataniviksoaᴋ kênaujanik nunaliksiutauᴋojaujunik tunitjivigilugo idluarᴋâ, idluangilarlônêt? tunitjijuksauvitâ, tunitjijuksaungipitâlônêt?
15Takkormôrningille tukisivait oᴋautivaillo: Sôᴋ ôktorpisingâ? kênaujaᴋ ᴋaisiuk, takolago.
16kênaujarlo ᴋaipât. Apersorpaillo: Kia adsinga, kialo aglangit ᴋolânê? Kiovât: Ataniviksûb.
17Jêsusib tagva oᴋautivait: Ataniviksoarmut tunisiuk ataniviksûb pinga, Gûdemullo Gûdib pinga. Tataminiarivâllo tagva.
18Saduzêerillo tikipât, makiviksaᴋangitomik oᴋartut; aperivâllo oᴋarlutik:
19Ajoᴋertuijoᴋ, Môsesib aglagvigivâtigut: Angutib angajua toᴋokpat, nuliane ᴋitorngaᴋangitoᴋ ᴋemakpago, nukangata tagva (angajugilauᴋtame) nulianga nuliarijaksarivâ, angajune kinguvâksarsilugo.
20Tagva nukarêᴋalauᴋpoᴋ 7nik. Angajukleᴋ nulianilauᴋpoᴋ; ᴋitornginanelo toᴋovoᴋ.
21Tugliata nuliarilermigamiuk, tâmnatauᴋ toᴋogivoᴋ ᴋitorngingminane. Taimaktauᴋ pingajuata pigivâ.
22Tâpkoa 7it ilûnatik nuliarivât (kingorlerêklutik), ᴋitorngineᴋaratik. Ilûnatik kingorngatigut arnaᴋtauᴋ toᴋogivoᴋ.
23Makivingmele, makikunik, taipkoa 7it naliata nuliarijomârpaûk? ilûnatik nuliarilaungmatsuk.
24Jêsusiblo kiovlune oᴋautivait: Imaingilâᴋ? Tamarpose, aglait nalogapsigik, Gûdib ajugaᴋanginingalônêt.
25Toᴋungajunit makitsomârunik, nulianingniangilat, uiningniangilallo, Engelititulle ᴋilangmêtutitut itsomârput.
26Toᴋungajunik makitsomârtunik Môsesib aglanginik atuarsilaungilasê? napârtut saniane Gûdib oᴋautilaungmago: Abrahab Gûdigivânga, Isaab Gûdigivânga, Jâkoblo Gûdigivânga.
27Toᴋungajulle Gûde Gûdigingilât, inôjulle Gûdigivât. Taimak pivlugo tammarpose angijomik.
28Aglangniglo illisimajut illangata tikipâk ingmingnut apersûtilaungmatta, tussaramigit: idluartomiglo (Jêsusib) kiongmagit, tussaramiuk, apersorpâ: Perᴋojanit tamainit naliat anginerovâ?
29Jêsusib kiova: Perᴋojanit tamainit anginerojoᴋ imaipoᴋ: Ahâk, Israêle, Nâlegaᴋ Gûdivut Gûdetôvoᴋ.
30Gûdingnik Nâlegarnik nagliktuksauvotit ômatingnut tamânut, tarningnullo tamânut, issumangnullo tamainut, pitsartunernullo tamainut. Tâmna pijariaᴋarnerojoᴋ perᴋojanit tamainit.
31Aipangalo tâpsotunaᴋ-ipoᴋ: Inuᴋatingnik iliktut nagliktuksauvotit. Assianik tâpkonangat anginersamik perᴋojaᴋangilaᴋ.
32Aglangniglo illisimajub oᴋautivâ: Ajoᴋertuijoᴋ, ahamarik, mikseᴋârtomik oᴋarpotit, Gûde atausiongmat, tâpsomalo assianik Gûdeᴋangilaᴋ.
33Tâmna nagligilugo ômamut tamânut, issumanullo tamainut, tarnimullo tamânut, pitsartunernullo tamainut, inuᴋatine ingmitut nagligilugo, tagva ajunginersauvoᴋ tunergutiksanit ôtaksanit tamainit.
34Silatujomiglo kiolaungmat, Jêsusib tussaramiuk, oᴋautivâ: Gûdib nâlegauvinganut ᴋanilerpotit. Kingorngagullo aperilugo saperpât.
35Jêsuselo katimaviksoarme ajoᴋertuivlune, kiovlugillo oᴋarpoᴋ: Sôᴋ aglangnik illisimajut Kristuse oᴋautigivatsûk, Dâvidib erneringmagô?
36Dâvide nangminiᴋ oᴋarmat Anernikut ajungikut: Nâlegaᴋ Nâlekamnut oᴋarpoᴋ: Talerpingma tungânut ingitit, ômigijingnik ilijerᴋârtinanga itigapît ikogganganut.
37Nâlekaminik Dâvidib taigamiuk; ᴋanoᴋ ernerivaûk? Inugasaksuillo tussarneridlarpât.
38Ajoᴋertorpaillo oᴋautivlugit: Aglangnik illisimajunik udjertoritse! annorânik angijoᴋtanik atoromavut, niuvervingmelo salutitaujomavut.
39katimavingmelo nerrimârvingmelo isukliovlutik iksivajomavut.
40Uigarnerit pingit nungupait, takijuniglo tuksiarutinik tuksiarutsomavlugit oᴋarput. Tamanna pivlugo taipkoa pitlartaunersaujomârput.
41Jêsuselo ingipoᴋ Gûdib iklervingata nalânut, inuit takunârlugit, kênaujanik illijijut Gûdib iklervinganut. Unuktullo akluitut unuktunik ilijivut.
42Uigarnerlo aklujoᴋ tikipoᴋtauᴋ, kênaujârsungnik maggungnik ilijingmijoᴋ; tâpkoa centetut atausertut ipuk.
43Illinniartinelo ᴋaiᴋovlugit oᴋautivait: Ahamarik oᴋaupapse, uigarneᴋ una aklujoᴋ Gûdib iklervinganut ununersanik ilijivoᴋ, ilijijunit tamainit.
44Tamakkoa illûnatik pimingnik atorniangitamingnik ilijivut; unale aklujoᴋ perᴋutituaminik ilijivoᴋ, inôgutiksaminik tamainik.
ទើបបានជ្រើសរើសហើយ៖
Markuse 12: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.