Lukase 1
1
Zacharîase Johannesib Baptiterijub inulerninganik oᴋautjaulerpok. Marîalo Jêsusib inulerninganik oᴋautjaulerpok. Marîab Elisabet nelipsarpâ Gudelo nertorpâ. Johannesib inulerninganik, Zacharîasiblo nertordlerninganik Gudemik.
1Unuktut aglagasualaungmatta, oᴋautsit unipkausingortilugit pijoᴋalauktut akunaptingne pivlugit;
2Sorlo taipkua tunitjivigilaungmatigut tamakkoninga, pigiarninganit nangminek takolauktamingnik, kivgartorteovlutik oᴋautsinut:
3Uvangatauk tamanna nâmagidlarpara, tamaita kiglinganit kiglisitigilualaurapkit, ilingnut, nagliktara Teôfiluse, aglaluarlugit;
4Ajoᴋertûtsib ajoᴋertortaujutigijavît tungavinganik tussarᴋovlutit.
5Herodese nuname Judêame ataniotilugo, ajoᴋertuijoᴋalaukpok ajoᴋertuijôᴋatigêt ingmigolingajut Abiakut ilanganik, Zacharîasemik atilingmik; taipsoma nulinga Aronib paningita ilangat, Elisabetemik atilik.
6Tamarmigle idluarpuk Gûdib sângane, Nâlekablo perᴋojangit pijomajangillo tamaita nâletsiarpait.
7ᴋitorngaᴋangilaglo, Elisabet ᴋitorngisuitôngmat, inutoᴋaulerdlutiglo tamarmik.
8Taipsomane Zacharîasib ajoᴋertuijônine atoramiuk Gûdib sângane, (Abiakut) simêningat neliutingmat,
9Ajoᴋertuijullo ilusingat maliklugo, isserluanititsininga neliutingmat, Nâlekab Tempelinganut iterpok.
10Inugasaksuillo ilûnatik silatânêput tuksiarlutik isserluanititsitilugo.
11Nâlekable Engelingita ilangat takotipok tâpsomunga, tunerguserviub isserluanititsiviub talerpiata tungâne nangertok.
12Zacharîasiblo tâmna takogamiuk ᴋoaksârlarmelo erᴋsilerpok.
13Engelible oᴋautivâ: Zacharîase, erᴋsinak, tuksiarnitit tussartauvut, nuliallo Elisabet ernijomârpok erniksarnik, taimna Johannesemik atseraraksarivat.
14ᴋuviasûtigilugo alliagijomârpat, unuktullo inûlerninga ᴋuviasûtigijomarpât.
15Nâlekab sângane angidlaromârmat; vainemik assianiglônêt imiksamik pitsartudlartomik imeromângilak. Anânangatalo timingata iluanêtilugo sulle Anernermik ajunginermik ilumertaulârpok.
16Israêliblo ᴋitorngangit unuktut sâtitsomârpait Gûdemut Nâleganganut.
17Tâmnalo sivorleromârpâ Eliasetut anerneᴋarlune pitsartuneᴋarlunelo, angajoᴋât ômatingit sâtitsomârlugit ᴋitorngamingnut, okpingitullo idluartut illisimaninginut, taimâk Nâlekamut inungnik opalungairsimajunik âᴋêlune.
18Zacharîasiblo Engele oᴋautivâ: Suna neluniakutaksarivigô? itôlerama, nuliaralo ningiungogivok.
19Engeliblo kiovlune oᴋautivâ: Gabriêliovunga Gûdib sângane nangertunga, tilijauvungalo oᴋautjauᴋovlutit, tamattomingalo nalojungnaititauᴋovlutit.
20Ahâglo, nipangerniarpotit oᴋarungnarungnailutillo, uvlok taimna tikilugo pijoᴋarvioniartok tamakkoninga; Oᴋausikka okperinginangne, nalautsiniartut neliutinermingne.
21Inuillo Zacharîase utaᴋivât, tataminiarlutiglo, taimâk sivitutigijomik mulludlarmat Tempeleme.
22Anigamelo, oᴋautijungnangilait. Malugosulerpullo takotitjumik takolaungmat Tempeleme. Nullorarpaillo, oᴋarungnangerdlunelo.
23Kivgartorningatalo sorairvia naliutingmat, iglominut angergarpok.
24Uvlullo tâpkoa kingorngane nulianga Elisabet singailerpok, takᴋiniglo tallimanik ijeriartorlune oᴋarpok:
25Taimâk Nâlekab pivânga uvlune ukkunane takonâraminga, kangusûtiga inungne uvamnit pêrlugo.
26Takᴋillo pingasojoane Gûdib Engele Gâbriêl tilivâ iglugasangnut Galilêametunut, Nazaretemik atilingnut,
27Uigasungmut angersimajomut Dâvidib kinguvângita illanganut, Jôsefemik atilingmut; uigasuglo Marîamik ateᴋartok.
28Engeliblo itervigivâ oᴋarlune: Salutitaulerit saimartitaujotit! Nâlekab illagivâtit, anerijaunerojotit arnanit tamainit.
29Mariable takogamiuk, oᴋausingit ᴋoaksârutigivait issumalerlunelo: ᴋanok tagva salutitauvîk?
30Engeliblo oᴋautivâ: Marîa erᴋsinak, saimartauniksarsivotit Gûdeme.
31Ahâk, singailârpotit timingne, ernermiglo ernijomârpotit, tâmna Jêsusemik atseraraksarivat.
32Tâmna angidlaromârpok, ᴋotsingnermêtublo erninganik taijaujomârpok, Gûdiblo Nâlekab tunitjivigijomârpâ atâtangata Dâvidib iksivautanganik.
33Jâkoblo iglunganut ataniojomârpok issoᴋarniangitomut, atanioningalo naggateᴋaromângilak.
34Tagva Marîab Engele oᴋautivâ; ᴋanok tamanna pilârᴋâ? angumik ᴋaujimanginama.
35Engelib kiovlune oᴋautivâ: Anernerub ajunginerub ᴋolangiarniarpâtit, ᴋotsingnermêtublo pitsartuningata ulingniarpâtit; tamanna pivlugo ivsornainek erniarijaksat Gûdib Erninganik taijaujomârpok.
36Ahâglo, Elisabettauk illat singaigivok ernermik ningiungolerlune; takᴋit pingasojoane, taimna ᴋitorngisuitok ilûnatik oᴋautigijangat.
37Gûdeme ajornartoᴋangimat.
38Marîale oᴋarpok: Ahâk Nâlekab kivgarivânga; sorlo oᴋaravit taimailerlanga. Engeliblo ᴋemakpâ tâva.
39Uvlunele taipkonane Marîa aulalerpok, aisârlune ᴋakᴋanut iglugasait ilanginut Judêamêtunut,
40Zacharîasib iglunganut, iterdlunelo Elisabet salutipâ.
41Elisabetiblo tamanna Marîab salutitsininga tussarmago, timingata singainga nerritoralerpok. Tagvainarlo Elisabet ilumertaulerpok Anernermik ajunginermik.
42Nipliadlarlunelo oᴋarpok: Anerijaunerojotit arnanit tamainit, timivîllo singainga anerijaunerogivok.
43Nakîllo tamanna pivâ, Nâlekama anânangata tikingmangâ?
44Ahâk salutitsinivît nippinga tussarapko, singaiga illumnêtok ᴋuviasungnermut nerritoralerpok.
45Pilorikpotit, okperavit; ilingnut Nâlekab oᴋausingit nâmaksijomârmatta.
46Marîalo oᴋarpok: Tarnima Nâlegak nakoridlarpâ.
47Anernermalo Gûde Piulijiga ᴋuviasugvigivâ.
48Kivgakullungme nikanarsârninga takunârmago. Ahâk, mânamit inuit ilûnatik piloringneraromârpânga.
49Angijoksoarmik pingmanga, ajugaᴋangitûb, hailigemiglo atiliub.
50Nâpkiningningalo nâlektiminêtsainarpok soraijunane.
51Sôngogame, talerminut siamartipait ômatimingne piojorijut.
52Pitsartujoksuit iksivautanginit ochotipait, nikanartullo angijorortipait.
53Kâktut tunitjivigiluarpait piksanginik, akluitullo piksaᴋartinagit kikipait.
54Nâpkigosungnermik erᴋaimavok, kivganelo Israêle ikajorpâ,
55Sorlo angilaurame atâtaptingnut Abrahamut kinguvânginullo issoᴋangitomut.
56Marîalo takᴋinik pingasunik tâpsomanêlauᴋârdlune, angergarivok iglominut.
57Elisabetible erniviksanga naliutingmat, ernermik ernivok.
58Silalingitalo ilangitalo tussaramitsuk, Nâlekab napkigingmago, ᴋuviasuᴋatigivât.
59Uvlullo sitamaujoane nutarârsuk tikipât kipilâllo, atâtangatullo Zacharîasemik ateᴋartipât.
60Anânangatale kiovait oᴋarlune: Aukagle, Johannesemik ateᴋartuksauvok.
61Oᴋautivâllo: Ilaᴋangilatille taimaitomik atilingmik.
62Atâtangalo Zacharîase nullorarpât, ᴋanok ateᴋarᴋojomangmangâgo.
63Aglagaksamiglo ᴋaitauᴋojivok, aglaklunelo oᴋarpok: Johannesemik ateᴋarpok. Ilûnatiglo tataminialerput.
64Tagvainarlo Zacharîasib ᴋaninga oᴋangalo angmartitauvuk, oᴋalerdlunelo Gûde nakoridlarpâ.
65Silalingillo ilûnatik erᴋsilerput. Kakᴋamiullo ilûnatik Judêame tamakkoa tamaita tussaumalerpait.
66Tussartullo tamakkoninga ilûnatik ômamigilerpait oᴋarlutik: ᴋanok ilingajomârasugiviûk nutarârsuk unâ? Nâlekable aggangita illagivât.
67Atâtangalo Zacharîase Anernermik ajunginermik ilumertaulerpok, oᴋarlunelo nelautsilertunik:
68Nakoridlartaule Nâlegak, Israêlib Gûdinga, inuᴋotine nelipsarlugillo piulingmagit.
69Nuilertitsivigingmatigut nagjumik puiliklertiksamik kivgame Dâvidib iglungane,
70Itsaksoak taimâk oᴋarame nelautaijut idluartut ᴋaningitigut:
71Piulijomavluta akkerartortiptingnit, ômigigijiptalo ilûnatik agganginit;
72Nâpkigosungnermiglo sakᴋertitsilune angajoᴋâptingnut, angerninelo hailigiojok erᴋaumavlugo,
73Oᴋarmaringnine, angernerilauktane Abrahamut atâtaptingnut imaitok: tunitjivigijomâramitigut,
74Piulijauvluta akkerartortipta agganginit kivgartorᴋovluta tâpsominga inôtiluta sivôranata,
75Ivjornainermelo idluarnermelo tâpsoma sângane.
76Igvillo nutarak, taijaujomârpotit ᴋotsingnermêtub nelautaijokotinganik; Nâlegak sivorleromârangne, apᴋotiksanga âᴋiksorlugo,
77Inuᴋotingillo illitarsitilugit puilijiksamik, ajornermingnit issumangnarungnaitomik,
78Gûdipta ômatingata nâpkiningningagut. Tâpsomûna nuijub ᴋotsingnermit nelipsarmatigut,
79Sakᴋertuksauvlune taipkonunga tâᴋtomêtunut, toᴋublo tachalininganêtunut, itigavullo torârtilugit apᴋomut ullapirsartauvionartomut.
80Nutarârsuglo aglisilerpok, sangidlalarmelo anernerme, inuᴋangitomêdlunelo, sakᴋerviksanga Israêlib kinguvânginut neliutilerᴋârtinago.
ទើបបានជ្រើសរើសហើយ៖
Lukase 1: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.
