Lukase 2
2
Kristûsib inulerninganik Betleheme, kipijauninganiglo atinganiglo. Nutarârsub Jêsusib âtauninganik katimaviksoarmut Jerusalemêtomut. Jêsusib nukapiangovlune takpaungarᴋatauninganik Jerusalemut, katimaviksoarmêninganiglo.
1Taipsomane atanersûb Augustusib perᴋojivlune inuit ilûnaita ataniovingminêtut aglaktauᴋovait, (atingit perᴋutingillo).
2Aglaktaunek tamanna sivorlerpângovok pivorlo taipsomane Korîniuse atanerusiotilugo Sîriame.
3Ilûnatiglo iglogasaksoarmingnut aivut, aglaktaujomavlutik.
4Tagva Jôsefetauk aularivok Galilêamit, iglugasangnit Nazaretemit, Judêamut, Dâvidib iglugasanginut, Betlehemik atilingnut, Dâvidib iglunganit kinguvânginillo pigame,
5Aglaktaujomavlune Marîa nuliane aiparilugo, tâmna singaijok.
6Tagvanedlutiglo erniviksanga neliutivok.
7Erniarerᴋârtaminiglo ernivok, imuserdlugolo annorâvinernik, nergjutit nerᴋevianut ilivâ, siniktarvingme iniksaᴋanginamik assianik.
8Taipsomalo erᴋâne mianersijoᴋarpok natername, nergjutimingnik avalulingmêtunik mianersijunik, unnuangotilugo.
9Ahâglo, Nâlekab Engelingata tikipait, Nâlekablo ᴋaumasingata ᴋaumartidlarpait; erᴋsidlalerpullo.
10Engeliblo oᴋautivait: Erᴋsinase, ahâk, ᴋuvianartoksoarmik oᴋautivapse silaksoarmiunut tamainut pilârniartomik.
11Pivluse mâna piuliklerte Nâlegak Kristûse erniangongmat, Dâvidib iglugasangine.
12Tamannalo nalunaikutarisiuk, nutarârsuk annorâvinernik imusersimajok, nergjutillo nerᴋevianut ilimajok naipilârpase.
13Tagvainarlo Engeleme ᴋilangmiugasaksoaᴋalaukpok; tâpkua Gûde nakoridlarpât oᴋarlutik:
14Gûde ᴋotsingnermêtok nakoridlartaule, ullapirsauteᴋarle nuname, inungnelo ᴋuvianartoᴋarle!
15Engelillo taipkonangat ᴋilaliarmatta, mianersijut ingmingnut oᴋalerput: Mâna Betlehemut ailaukta, pijoᴋalertomiglo tâvane takojartorluta, Nâlekab oᴋautigijanganik uvaptingnut.
16Tuavilutiglo tagvunga pivut, Marîalo Jôsefelo tikipakit, taimâktauk nutarârsuk nergjutit nerᴋeviane ilimajok.
17Takojarêramitsuk, oᴋautigijartorpât oᴋautijaunitik nutarârsuk tâmna pivlugo.
18Tussartullo ilûnatik mianersijut oᴋausingit tataminiarivait.
19Marîable oᴋautsit tamakkoa tamaita torᴋorpait, auladlugillo ômatimine.
20Mianersijullo uterivut, Gûdelo nakorivlugo ᴋujagidlarpât tussartatik takojatiglo pivlugit, taimâk oᴋautjaulauramik.
21Uvlullo sitamaujortôlermatta, nutarârsuk kipijaungmat, ateᴋartipât Jêsusemik Engelib taimâk taingmago, sulle anâname timingata ilunanêlerᴋârtinago.
22Uvlullo neliutingmatta, Marîab sujungaivinga Môsesib perᴋojangit maliklugit, nutarârsuk Jêsuse takpaunga Jerusalemut âpât, Nâlekamut pititsomavlugo;
23(Sorlo aglaksimangmat Nâlekab perᴋojangine: Angutiarsuit ᴋitorngingautit anânaminit anerᴋârtut tunijaksauvut Nâlekamut.)
24Tunergutiksatik tunilugit, sorlo Nâlekab perᴋojangine aglaksimangmat: akigijârtûngnik aᴋigiaraujarniglônêt maggûngnik.
25Ahâglo, anguteᴋalaukpok Jerusaleme Sîmeonemik atilingmik; angullo tamna idluarlunelo Gûdemik nâlekpok, Israêliblo manigortaujutiksanganik nerriukpok, Anernerublo ajunginerub inigivâ.
26Anernermullo ajunginermut nalojungnaititaulaukpok Toᴋonianginerminik Nâlekab Kristûsinganik takoᴋârane.
27Tâmna Anernerub ajunginerub kajungersaininganut katimaviksoarmut pivok. Jêsusiblo angajoᴋâᴋita nutarârsuk âmakko, piniarutigilugo, sorlo pivangmatta perᴋojat maliklugit,
28Sîmeonib tiguvâ erᴋisimiardlugo, Gûdelo nakorivâ oᴋarlunelo:
29Nâlegak mâna kivgat ullapirsauteᴋarlune angerarle, sorlo oᴋalauravit;
30Ijimnut piuliklertiksauᴋojat takogapko.
31Tâmna inuit ilûnatik kênangita sângane pijarêrtinangne,
32ᴋaumajok nalojunik ᴋaumarsaijuksak, inuᴋotivîllo Israelitit nakorijaksangat.
33Jôsefiblo atâtaksangata anânangatalo nutarârsûb oᴋautigijauninga tamanna tataminiarutigivâk.
34Sîmeoniblo saimartipak, anânanganullo Mariamut oᴋarpok: Ahâk, una ochojutiksaujomârpok makijutiksaujomârlarmelo unuktunut Israêlib kinguvânginut, nalunaikutaksaujomârlunelo akkerartugaksak;
35(Tarnikullo (Marîa pivâ) kibliktauᴋôromârpotit saviksoarmut,) unuktut ômatingita issumangit sagvartauᴋovlugit.
36Arnaktauk nalautaijok tagvanênivok Hannamik atilik, Fanuêlib pania, Aserib kinguvângita illangat, ningiungolertok, uigasôlauᴋârdlune uiᴋalauktok jârinik 7 nik;
37Mânale uigarniojok jâreᴋalerdlune 84 nik, katimavingmit nûlungimariktok, tuksiarnermullo nerritailinermullo Gûde kivgartorpâ uvlullo unnuallo tamaita.
38Tâpsomatauk stundeme taipsomane tikipait, Nâlegarlo nakoridlarpâ, oᴋautigilâllo piulijiksamik utaᴋijunut tamainut Jerusalemêtunut.
39Tamaitalo nâmaksitigamigit Nâlekab perᴋojangit maliklugit, ama Galilêamut uterivut iglugasangmingnut Nazaretemut.
40Nutarârsugle aglisikpok, pitsartudlarlunelo anernerme, silatuvaksoadlalarmelo, Gûdiblo saimaningata najorivâ.
41Angajoᴋâgiglo jârine tamaine Jerusalemut aivakpuk aularviksiorviolerangat.
42Jêsuselo jâreᴋalermat 12 nik, illagilugo takpaunga Jerusalemut aivuk, aularviksiorviub ilusinga maliklugo.
43Uvlullo taipkoa nângmatta angergarmingmaniglo, nukapiak Jêsuse Jerusalemit nûlungilak, angajoᴋâkitalo tamanna nelovâk.
44Illagilauktamingnulle illaunasugigamikko, uvlok atausek. Ingergaramik, ᴋeneriartorpâk ilamingne illitarijamingnelo.
45Neninginamikko, ama Jerusalemut uterivuk ᴋeneriardlugo.
46Uvlullo pingasôlermatta, naipipâk katimavingme iksivajok ajoᴋertuijut akorngane, tâpkoalo nâleklugit apersorpait.
47Nâlektullo ilûnatik, silatuninga kigusingillo tataminiarivait.
48Angajoᴋâkitalo takogamikko, ᴋoaksârpuk, anânangatalo oᴋautivâ: Ernîk, sôk taimailiorpitigûk? Ahâk, atâtavît uvangalo ᴋenilaukpaptigit kiksarlunuk.
49Jêsusiblo kiovak: Sôk ᴋenerpitingâ? Nalovitîk, atâtama pingit piniariaᴋarapᴋît?
50ᴋanorle oᴋautingmagik, oᴋausinganik tukkisingilak.
51Illagivlugiglo tâva taununga Nazaretemut aivok nâleluarlugiglo. Anânangatalo oᴋausingit makkoa tamaita ômatimine torᴋorpait.
52Jêsuselo silatulerpalliadlarpok, inumariolerpalliavlunelo, saimaneksivalliavlunelo Gûdeme inungnelo.
ទើបបានជ្រើសរើសហើយ៖
Lukase 2: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.
