Markuse 16
16
Kristusib makininganik. Sakᴋertininganik Marîa Magdalênamut illinniartunullo. Tiliklerninganik Apostelinik. Kilaliarninganik.
1Sabbatelo ᴋângermat Marîa Magdalêna, Marîalo, Jakôbusib anânanga, Salomelo tipitsiariksautisiniarput, mingoariartoromavlugo.
2Vogiblo uvlungita sivorlerpângane uvlârarsukut, iluvermut pivut, seᴋineᴋ nuilermat.
3Ingmingnullo oᴋarput: kia ujaraᴋsoaᴋ illuviub pânganit aksakârtiniarpaûk?
4Tagvungalo takunâramik, ujaraᴋsoaᴋ aksakârtitavineᴋ malugivât; angijôvaksôngmat.
5Iluvermullo iteramik, angut inôsuktoᴋ talerpiata tungâne iksivajoᴋ takogamitsuk, angijoᴋtamik ᴋaᴋortamik annorâlik, kakkilâdlarput.
6Tâpsomale oᴋautivait: Kakkilârase, Jêsuse Nazaremioᴋ kikiaktorsimajoᴋ ᴋenerpase; makisimavoᴋ, tamânêngilaᴋ; ilijauvigilauᴋtanganik takoleritse.
7Oᴋariartoritsele illinniartinginut, Pêtrusemullo, Galilêamut sivorlerilârapsiuk; tagvane takojomârpase, sorlo oᴋautilaujungmase.
8Tuavidlutiglo anivut, iluveᴋ ᴋemaklugo. Sajudlarlutiglo kakkilâdlarput, oᴋangilallônêt inungnut, erᴋsidlaramik.
9Jêsusele uvlâkut makiname, vochib uvlungita sivorlerpângane, sakᴋerᴋârpoᴋ Maria Magdalênamut, anititsivigilauᴋtaminut Sâtanasinik 7 nik.
10Tâmna oᴋariartorpoᴋ illagilauᴋtanginut, kiksarlarmiglo ᴋeajunut.
11Tâpkoalo, tussaramik inôngmat, sakᴋilaungmallo tâpsomunga, okperingilât.
12Mattoma kingorngagut tapkoa illâgingnut maggungnut sakᴋerpoᴋ, assianik tautuᴋalerdlune, ingergatilugik natername.
13Tâpkoalotauᴋ illamingnut oᴋariartorivuk tamattominga; tâpkoatauᴋ okperinginivakit.
14Kingorlermik 11 it saᴋᴋervigivait nerritilugit, okpingimattalo suadlarpait, ômatingillo mangaidlarmatta; toᴋungajunit makisimajomik takolauᴋtut okperingimagit.
15Oᴋautivaillo: Silaᴋsoarmut ilûnânut ainiaritse, oᴋautsillo tussarnertut oᴋautigisigik inungnut tamainut.
16Okpertoᴋ baptitaujorlo piulijaujomârpoᴋ; okpingitorle erᴋartortaujomârpoᴋ.
17Tamakkoningale nalunaikutaᴋaromârput okpertut: Attimne Sâtanasit anititsomârpait, oᴋanut nutânut oᴋaromârput,
18Kuglugiarâlungnik pêjaijomârput; toᴋonartomiglo imeralloarunik, soᴋoseromângilat; ᴋanimajut patingmikpatigik, pijungnairomârput.
19Nâlekablo taimâk oᴋautilauramigit, ᴋongmuartitauvoᴋ ᴋilangmut, ingitsartorlarmelo Gûdib talerpiata tungânut.
20Tâpkoale ilûnainut oᴋariartorput; Nâlekablo piniarᴋatigivait, oᴋausingillo okpernartipait tatamnartunut maliktunut.
ទើបបានជ្រើសរើសហើយ៖
Markuse 16: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.