LUKE 9
9
Jisu Pora Pasonir Khan Pathai Diya
1Aru Jisu he barohjon chella eke logote matise aru bhut khan khedabole aru bemari khan hustho koribole tarkhan upor te khyomota aru shakti dise, 2Aru Isor laga rajyo prachar koribo, aru bemar hustho koribole tarkhan ke pathai dise. 3Aru Tar pora tarkhan ke koise, “Tumikhan jatra nimite eku bhi nabukhibi, lakhuti nalobi, jhola nalobi, roti nalobi, poisa nalobi, kapoor bhi duita nabukhibi. 4Aru kon laga ghor te tumikhan humai jai, najua tak tate he thakibi. 5Aru kot jaga te tumikhan ke swagat kora nai, ketiya tumikhan eitu sohor pora ulai jai, tetiya sakhi hobo nimite eitu jaga te, tumikhan laga theng pora dhuli jukari kori kene phelai dibi.” 6Aru tarkhan jai jaise aru bosti bosti te susamachar prachar kori kene aru hustho kori kene sob jaga te jaise.
Herod Pora Jisu Ke Buja Nai
7Eitu homoi te Herod raja pora Jisu he ki kam korise eitu laga khobor sob tu huni kene, tar laga mon te aram pua nai, kilemane konuba pora John he mora pora jinda uthise eneka koise, 8konuba pora Elijah he ulai ahhise eneka, aru konuba pora purana din laga bhavobadi ekjon mora pora ji uthise eneka koise. 9Herod raja pora koise, “Moi John laga gola katise; kintu eneka khobor huna, eitu manuh kon hobo?” Aru eitu manuh ke log koribole bisarise.
Jisu Pora Pans Hazar Khuai Diya
10Tarkhan ghurai ahha homoi te, pasonir khan pora ki kam kori dise eitu khobor sob Jisu ke koise. Aru Jisu pora tarkhan ke loi kene Bethsaida eneka kua sohor te jai jaise. 11Ketiya genti koribo napara manuh khan pora eitu hunise, Tar laga piche te jaise; aru Tar pora taikhan ke swagat korise aru Isor rajyo laga kotha koise, aru kiman manuh hustho koribo lage, taikhan sob ke hustho kori dise. 12Eitu homoi te din tu khotom hoi thakise; aru barohjon ahhi kene Jisu ke koise, “Genti koribo napara manuh khan usor te thaka bosti aru nagor te pathai dibi, tetiya taikhan tate thakibo aru khabole paribo; kilemane iyate amikhan manuh nathaka jaga te he ase.” 13Kintu Jisu he tarkhan ke koise, “Tumikhan pora khabole kiba ekta taikhan ke di dibi.” Tetiya tarkhan pora jawab dise, “Amikhan jai kene khua lua nakinile, amikhan logot te hole pansta roti aru duita maas he ase.” 14Kilemane tate pans hazar nisna mota manuh thakise. Aru Jisu he Tar laga chella khan ke koise, “Taikhan sob tu ponchas ponchas manuh dol dol bohibole dibi.” 15Aru tarkhan pora eitu korise, aru manuh khan sob ke bohibole dise. 16Aru pansta roti, duita maas tu loi kene sorgo phale sai kene, ashish mangise aru bhangai kene genti koribole napara manuh khan ke bhag kori dibole chella khan ke dise. 17Aru sob manuh khai kene tripti hoise. Aru chella khan pora tukura tukuri uthaise aru eitu barohta tukuri jama korise.
Peter Pora Jisu He Khrista Eneka Shikar Kora
18Eitu homoi, ketiya Jisu ekela prathana kori thakise tetiya, Tar laga chella khan ahhise; tetiya Jisu pora tarkhan ke hudise, “Moi kon ase eneka manuh khan pora koi?” 19Aru tarkhan pora jawab di kene koise, “Baptisma diya John eneka koi; kintu dusera konuba he koi, Elijah; aru konuba pora koi, purana din laga bhavobadi ekjon mora pora jinda uthise.” 20Aru Tar pora tarkhan ke koise, “Kintu tumikhan pora Moi kon ase eneka koi?” Aru Peter pora jawab di kene koise, “Isor laga Khrista ase.”
Jisu Pora Tar Mora Laga Aage Te Kua
21Kintu eitu kotha kon ke bhi nakobi eneka Jisu pora mana kori kene hukum di, 22koise, “Manuh laga Putro besi kosto hobole he lagibo, aru bridho khan, puruhit khan, aru pondit khan pora tiyag kori kene morai dibo, aru tin din pasot te jinda hoi uthi jabo.”
Tumar Kros Uthai Kene Moi Piche Ahhibi
23Aru Tar he tarkhan ke koise, “Jodi konuba manuh he Moi piche ahhibo itcha hole, tai nijor ke tiyag koribo dibi aru hodai din nijor kros bukhi kene moi piche ahhibo dibi. 24Kilemane kon he nijor jivon bachabole monn ase, eitu harabo; aru moi laga nam nimite kon he nijor jivon harai jai, tai laga jivon bachabo. 25Kilemane manuh ekjon pora, prithibi sob pai kene, nijor ke tiyag korile nahole jivon tu harai jai, tetiya ki lab ase? 26Kilemane kon he Moi nahole moi laga kotha nimite sorom kore, tetiya Pitri mahima te pobitro sorgo dut logot, ketiya Manuh laga Putro ahhibo tetiya eitu manuh karne moi bhi sorom hobo. 27Kintu Moi hosa tumikhan ke koi ase, iyate khara kori thaka majote konuba pora Isor laga rajyo nadekha tak namoribo.”
Chehera Aru Kapoor Bodli Hua
28Eitu kotha koi kene ath din pasot te Tar logot Peter, John aru James loi kene pahar upor te prathana koribole uthi jaise. 29Aru tar prathana kori thaka homoi te, Tar chehera sabole bodli hoi jaise, aru Tar laga kapoor sob boga hoi kene ujal hoise. 30Aru sabi, duijon manuh, Moses aru Elijah ahhi kene Tar logot te alusona korise, 31kon pora sorgo mahima te ulai ahhi kene Jerusalem te Tar keneka kosto hoi kene morai dibole ase eitu laga kotha alusona korise. 32Eitu homoi te Peter aru tar logot te thaka khan besi tuponi lagise, aru ketiya tarkhan tuponi pora uthise, tarkhan pora Jisu laga mahima dekhise aru tar logot te duijon khara kori kene dekhise. 33Aru duijon manuh tu Jisu ke shari kene jua homoi te, Peter pora Jisu ke koise, “Guruji, amikhan karne iyate thaka tu bhall ase; amikhan pora tin-ta tombu ghor bonabo, apuni karne ekta, Moses karne ekta aru Elijah karne ekta”—tar pora ki koi ase eitu nabuji kene koise. 34Peter pora eitu koi thaka homoi te, megh ahhi kene tarkhan sob bond hoise; aru megh pora bond hoi thaka homoi te tarkhan bhoi lagise. 35Aru megh pora awaz ekta ulai ahhi kene koise, “Eitu Moi laga Putro ase, Moi chuna lua; Tar laga kotha hunibi!” 36Aru ketiya eitu kotha koi dise, Jisu ekela he thakise. Aru tarkhan pora ki dekhise eitu kon ke bhi nakoi kene he thakise.
Ohusi Atma pora Dhori Thaka Lora Ekjon Hustho Kora
37Eitu din piche te, ketiya tarkhan pahar jaga pora nami ahhise, genti napara manuh khan ahhi kene log korise. 38Aru sabi, jama kora manuh majot pora ekjon pora hala kori kene koise, “Guruji, moi laga lora ke morom pora sai dibi, kilemane tar tu moi laga ek matro putro ase. 39Aru sabi, beya atma ekta pora tar ke dhori loi, aru achanak tar pora kande; aru tar laga mukh pora phen naula tak eitu atma pora dukh diye, aru girai diye. 40Aru apuni laga chella khan ke eitu ke khedai dibi eneka onurudh korise, kintu tarkhan pora para nai.” 41Jisu he jawab di kene koise, “Hei obiswasi aru tera mon laga jugh manuh khan, kiman din moi tumikhan logot te thakibo aru dhorjo kori kene rukhibo? Tumi laga lora tu iyate anibi.” 42Tar ahhi thaka homoi te, ohusi atma pora lora ke dukh dise aru maati te girai dise. Kintu Jisu he eitu letra atma ke gali dise, aru lora tu hustho kori kene baba ke dise. 43Aru sob manuh pora Isor laga mahan kam dekhi kene asorit hoise.
Jisu Pora Arubhi Tar Moribole Laga Janai Diya
Kintu taikhan sob pora Jisu laga kam te asorit kora homoi te, Jisu he chella khan logot te koise, 44“Eitu kotha tu tumikhan laga kan te huni lobi; kilemane Manuh laga Putro tu eitu manuh khan laga haat te di dibo.” 45Kintu tarkhan pora eitu kotha tu buja nai, kilemane nabujibo karne, eitu kotha tu tarkhan pora lukai kene thakise; aru eitu ki kotha koi ase, eitu hudibole tarkhan pora bhoi korise.
Sob Pora Dangor Kon Hobo?
46Aru tarkhan majot te sobse dangor kon hobo, eneka kotha ulai kene juji thakise. 47Kintu ketiya Jisu pora tarkhan mon te bhabna tu jani loise, Tar pora bacha ekjon anikene tar usor te bohibole dise, 48aru tarkhan ke koise, “Kon pora moi laga nam te eitu bacha ke grohon kore, moi ke grohon kori ase, aru kon pora moi ke grohon kore, kon pora moi ke pathaise Tar ke grohon kori ase; kilemane tumikhan majot te kon he sob pora huru ase, hei jon he dangor ase.”
Kon Amikhan Laga Birudhi Nahoi Amikhan Logot Te Ase
49John pora jawab di kene koise, “Guruji, manuh ekjon pora apunar nam te ohusi atma khedai diya amikhan pora dekhise, aru amikhan pora tar ke mana kori dise, kilemane tar tu amikhan logot te ahha nai.” 50Kintu Jisu he tar ke koise, “Tar ke mana nakoribi; kilemane kon manuh tumikhan ke birudh nakore, eitu tumikhan logot te ase.”
Samaria Bosti Te Jisu Ke Tiyag Kora
51Ketiya Tar sorgo te jabole din usor te ahhise, Tar Jerusalem phale jabole he bhabi thakise. 52Aru Tar aage te khobor diya manuh ekjon pathaise, kon pora Samaria manuh khan laga bosti ekta te jai kene tate Jisu nimite jugar korise. 53Kintu manuh khan pora Tar ke swagat kora nai, kilemane Tar laga mon tu Jerusalem te jabole he thakise. 54Aru Tar laga chella, James aru John pora ketiya eitu janise, tarkhan pora koise, “Prabhu, sorgo pora jui nami kene eitu khan sob khotom hobo karne, amikhan pora hukum dibole itcha ase na nai?” 55Kintu Tar pora ghurai kene tarkhan ke gali dise. 56Aru tarkhan dusera ekta bosti te jai jaise.
Jisu Piche Jua Dam Ase
57Tarkhan raasta te jua homoi te, manuh ekjon pora tar ke koise, “Apuni kot te jalebhi moi apuni laga piche te jabo.” 58Aru Jisu he tar ke koise, “Shiyal khan gant ase, aru akash laga chiriya khan bah ase; kintu Manuh laga Putro Tar matha rakhibole jaga bhi nai.” 59Dusera ekjon ke Tar pora koise, “Moi laga piche te ahhibi.” Kintu eitu manuh pora koise, “Prabhu, pahila moi jai kene baba ke moidam dibole dibi.” 60Kintu Jisu he tar ke koise, “Mora manuh khan pora mora manuh khan ke moidam dibole dibi; kintu tumi karne hole, Jai kene Isor laga rajyo khobor janai dibi.” 61Aru dusera ekjon pora koise, “Moi bhi apuni laga piche te ahhibo, Prabhu; kintu pahila ghor manuh khan ke jai kene salam kotha kobole dibi.” 62Jisu he tar ki koise, “kon manuh he nijor haat te hal dhori kene piche phale sai, eitu sorgo rajyo karne jugyo nahoi.”
ទើបបានជ្រើសរើសហើយ៖
LUKE 9: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
