LUKE 10
10
Jisu Pora bakhotur#10:1 72 Jon Pathai Diya
1Eitu pasot te Prabhu he dusera bakhotur jon basi loise, aru Tar aage te taikhan duijon duijon bhag kori kene, nagor kot te Tar nijor bhi jabole bhabna thakise eitu sob te pathai dise. 2Aru Tar pora tarkhan ke koise, “kheti katibole besi ase, kintu kam kora manuh he komti ase; eitu nimite, kam kora manuh besi pathai dibi eneka kheti malik logot te prathana koribi. 3Etiya tumikhan nijor raasta te jabi; sabi, rang-kukur majot te mer nisna Moi tumikhan ke pathai ase. 4Toka poisa nabukhibi, jhola nabukhibi, juta nabukhibi; aru raasta te dery kori kene salam kon ke bhi nadibi. 5Kon laga ghor te tumikhan jai, aage te kobi, ‘Eitu ghor te anando thakibi!’ 6Aru jodi shanti laga putro ekjon tate thake, tumikhan laga shanti tar upor te thaki jabo; kintu jodi nai, tetiya tumikhan laga shanti ghurai kene tumi logot te ahhi jabo. 7Aru eitu eke ghor te taikhan pora ki dibo eitu khai kene aru pi kene thakibi, kilemane kam kora manuh khan nijor hazira pabole jugyo ase; ekta ghor shari kene ekta ghor te najabi. 8Kon nagor te jua homoi tumikhan ke grohon kore, tate tumikhan karne ki khabole dise eitu khabi. 9Tate bemar manuh khan ke hustho kori dibi, aru taikhan ke kobi, ‘Sorgo rajyo tumikhan usor te ahhi jaise.’ 10Kintu tumikhan jua nagor kot te grohon nakore, eitu laga raasta te jabi aru kobi, 11‘Nagor raasta te thaka dhuli tumikhan birudh te amikhan laga theng pora jukari kori kene phelai di ase; eneka holebhi eitu janibi Isor laga rajyo usor te ahhi kene ase.’ 12Moi tumikhan ke koi ase, heitu din te eitu nagor pora tu Sodom sohor ke sehen koribole he sosta hobo.
Mon Naghura Sohor Karne Bedona
13“Tumi dukh ase, Chorazin! Tumi dukh ase, Bethsaida! kilemane mahan asorit kam kontu tumikhan karne korise eitu Tyre aru Sidon te kori thakile, tetiya bosta kapoor uri kene khaar upor te bohi kene, aage pora taikhan tu mon ghurai kene thakibole asile. 14Kintu bichar din te tumikhan pora tu Tyre aru Sidon ke sehen koribole he sosta hobo. 15Aru tumi, Capernaum, tumi sorgo tak pongchi kene uthi jabo neki? Tumi hades tak namai dibo.
16“Kon pora tumikhan ke hune, eitu moi ke huni ase, aru kon he tumikhan ke tiyag kore, eitu moi ke tiyag kori ase, aru kon he moi ke tiyag kore, moi ke he nahoi kintu kon pora moi ke pathaise Tar ke bhi tiyag kori ase.”
Bakhotur Jon ghurai ahha
17Bakhotur jon he khushi pora ghurai ahhise, aru koise, “Prabhu, ohusi atma khan pora bhi tumar nam te amikhan ke manise!” 18Aru Tar pora taikhan ke koise, “Akash pora saitan bijuli nisna giri jua Moi dekhise. 19Sabi, Moi tumikhan ke sanp aru bichu upor te chapa bole odhikar di dise, aru dushman laga shakti upor te odhikar dise; aru ji konu jinis pora bhi tumikhan ke dukh nadibo. 20Kintu atma khan pora tumi laga kotha manise eneka khushi nakoribi; kintu sorgo te tumikhan laga nam likhi kene thaka nimite he khushi koribi.”
Jisu He Pobitro Atma Te anando Kora
21Eitu eke homoi te, Tar Pobitro Atma te anando hoi kene koise, “Moi tumi ke dhanyabad di ase Pitri, Sorgo aru prithibi laga prabhu, kilemane gyani khan aru pondit khan pora tumi eitu kotha lukai rakhise aru huru bacha khan ke janai dise; hoi Pitri, kilemane eneka hobole he Apunar itcha thakise. 22Sob bostu khan Pitri pora moi logote he dise; aru konu manuh pora bhi Putro tu kon ase eitu najane khali Pitri he jane, aru konu manuh pora bhi Pitri tu kon ase eitu najane khali Putro he jane, aru kon ke Putro pora Pitri janai dibole monn ase taikhan ke prokahit kore.”
23Tetiya chella khan phale ghurai kene tarkhan ekela ke koise, “Tumikhan pora ki dekhi ase, eitu dekha soku khan ashish! 24Kilemane Moi tumikhan ke koi ase, bhavobadi khan aru raja khan besi pora tumikhan pora ki dekhi ase eitu dekhibole monn thakise, kintu dekha nai, aru tumikhan pora huna hunibole monn thakise, kintu huna nai.”
Bhall Samaria Manuh Laga Dristanto
25Aru sabi, kanoon pondit ekjon khara hoise aru Jisu ke porikhya kori kene koise, “Guruji, ananta jivon uttarodhikari pabole moi ki koribo lage?” 26Jisu he tar ke koise, “Kanoon te ki likhi kene ase? Tumi eitu keneka porhi ase?” 27Aru tar pora jawab di kene koise, “Tumi laga mon, atma, tagot, aru gyan sob pora tumar Prabhu Isor ke prem koribi; aru tumar aspas ke nijor nisna prem koribi.” 28Aru Jisu he tar ke koise, “Tumi jawab thik dise; eneka he koribi, aru tumi jinda thakibo.”
29Kintu tar nijor he thik ase eneka hobole itcha kori kene Jisu ke koise, “Tene hole moi laga aspas tu kon ase?” 30Jisu he uttar dise, “Manuh ekjon Jerusalem pora Jericho te jai thakise, aru eitu manuh dacoit khan pora dhorise, kon pora tar ke mari kene kapoor ulai loise, aru adha mora te shari kene jaise. 31Aru eneka homoi te puruhit ekjon bhi eitu raasta te jaise; aru ketiya tar pora heitu manuh dekhise, dusera phale sai kene par kori jaise. 32Eitu nisna he Levi manuh ekjon bhi hoise, ketiya tar heitu manuh thaka jaga usor te ahhi kene dekhise, dusera phale he jai kene par kori loise. 33Kintu Samaria manuh ekjon, tar jatra jua homoi te, ketiya heijon thaka jaga tu pongchise aru tar ke dekhi kene morom lagise. 34Aru tar logot te jai kene jokhom hoi thaka manuh ghao bandhi dise, tel aru draikhya-roh lagai dise; eitu pasot te tar nijor laga janwar te uthai loise aru alohi ghor ekta te loi ahhise, aru madad korise. 35Aru aage din te, tar pora duita denarii ulai loise, aru eitu alohi ghor saa manuh ke dise, aru koise, ‘Tar ke bhall pora sabi; aru kiman besi khorcha ulabo, eitu moi ghurai ahha homoi te dibo.’ 36Eitu tin jon majot te dacoit khan laga haat te dukh pua manuh laga aspas ase eneka kon pora dekhai ase?” 37Tar pora koise, “Kon he tar ke doya dekhaise, eitu ase.” Aru Jisu pora tar ke koise, “jai kene eneka koribi.”
Martha Aru Mary
38Tarkhan raasta te jai thaka homoi te, bosti ekta pongchise; aru tiruta ekjoni nam Martha tai pora swagat korise. 39Aru tai laga bhoni ekjoni nam Mary thakise, kon he Jisu usor te bohi kene Jisu laga kotha hunise. 40Kintu seva kora kam besi pora Martha he Jisu laga kotha te dhyan kora nai; aru tai jai kene Prabhu ke koise, “Prabhu, moi laga bhoni pora seva kora sob tu khali moi ke he koribole diya apuni dekhi ase na? Moi ke madad koribole tai ke bhi kobi.” 41Kintu Prabhu he tai ke jawab di koise, “Martha, Martha, tumi kiba-kibi besi nimite mon dukh hoi kene aram napai; 42ekta he lage. Mary pora sobse bhall wala, kon tu tai pora ketiya bhi naharabo eitu basi loise.”
ទើបបានជ្រើសរើសហើយ៖
LUKE 10: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
