LUKE 8
8
Tiruta Khan Jisu Logot Jua
1Eitu pasot te loge loge Isor laga rajyo bhall khobor tu prachar kori kene Tar sohor aru bosti sob te jai thakise. Aru barohjon Tar logot te thakise, 2aru konuba tiruta khan, kon laga bemar bhall hoise aru ohusi atma pora dhori thaka bhall hoi thakise: Mary, kon ke Magdalene eneka mate, kon pora satta ohusi atma khedai dise, 3aru Herod laga ghor jugar kora manuh Chuza laga patni Joanna, aru Susanna, aru dusera besi thakise, kon he taikhan kamai thaka pora Jisu aru chella khan ke madad kori thakise.
Bijon Hisai Diya Laga Dristanto
4Aru ketiya genti koribo napara manuh khan alag alag sohor pora eke logot te jama kori kene Tar logot te ahhise, Jisu he dristanto loi kene kotha koise: 5“Bijon hisa manuh ekjon pora tar laga bijon hisai kene jaise; aru hisai diya homoi te konuba bijon khuj raasta te girise aru eitu khan theng pora chapai dise aru akash laga chiriya khan ahhi kene khai dise. 6Aru konuba bijon pathor upor te girise; aru eitu gojali kora te he sukhi jaise, kilemane eitu jaga te paani nai. 7Aru konuba bijon katta ghans majot te girise; aru kait laga ghans dangor hoi kene bijon tu dhaki kene morai dise. 8Aru konuba bijon bhall maati te giri kene dangor hoi uthise, aru ekso tak pongchi kene dhan dhorise.” Tar pora eitu kotha kua homoi te, jur pora chillai kene koise, “Kon he hunibole kan ase, tar pora huni lobi.”
Dristanto Laga Udeshyo
9Aru ketiya Tar laga chella khan pora eitu dristant laga ortho ki ase eneka hudise, 10Tar pora koise, “Tumikhan karne hole, sorgo rajyo laga gupon kotha janibole aigya di kene ase; kintu dusera karne hole sob tu dristanto te he ase, ‘tetiya taikhan pora dekha tu dekhibo kintu nachinibo, aru huna tu hunibo, kintu nabujibo.’ 11Etiya eitu dristanto tu eneka ase: Bijon tu Isor laga kotha ase. 12Khuj raasta te kiman bijon giri jai eitu huna manuh khan tu ase; tetiya saitan ahhi kene Isor kotha ki hunise eitu taikhan laga mon pora loi jai, eneka hole he taikhan pora biswas nakoribo aru mukti napabo. 13Aru kiman bijon pathor upor te giri jai eitu khan tu, kon pora Isor kotha tu khushi pora huni loi ase; kintu eitu khan hipa nai, taikhan pora olop homoi karne he biswas kori aru porikhya homoi te harai jai. 14Aru kait thaka ghans majot te kon tu bijon girise, eitu khan tu kon pora Isor kotha huni loise taikhan ase, kintu ketiya taikhan nijor jivon raasta te jai tetiya eitu prithibi laga bhabna, dhon sampoti aru jivon aram kori thaka, eitu khan laga chinta pora phol dhora nai. 15Aru bhall maati te bijon kiman girise, eitu kon pora Isor kotha tu hunise aru huna loge loge eitu hosa aru mon sob pora dhori loise, aru eitu dhorjo kori mani lua homoi te phol dhori jai.
Tukuri Bhitorte Saaki
16“Konu manuh pora bhi bati jola pasot te eitu tukuri pora bond nakore, nahole bisona niche te bhi narakhe, kintu bati rakha jaga te rakhe, tetiya ghor bhitor te ahha khan pora puhor dekhibo. 17Kilemane eku bhi lukai kene nai ulabole he ase, nahole bujibo napara aru janibo napara eku bhi gupon te nai. 18Eitu karne ki huni ase tate tumikhan hushier koribi; kilemane kon logot te ase arubhi besi dibo, kintu kon logot te nai tai ki ase eneka bhabna kore eitu bhi loi jabo.”
Jisu Laga Amaa Aru Bhai Khan
19Tetiya Jisu laga amaa aru bhai khan Tar logot te ahhise, kintu genti koribo napara manuh khan nimite Tar usor te ahhibole para nai. 20Tetiya Tar ke koise, “Apuni log koribole amaa aru bhai khan bahar te khara kori ase.” 21Kintu taikhan ke Tar pora koise, “Kon he Isor laga kotha huni aru mani loi, eitu khan Moi laga amaa aru bhai khan ase.”
Jisu He Tofan Rukhai Diya
22Ek din chella khan logot te Tar nao ekta te bohise, aru Tar he tarkhan ke koise, “Amikhan pukhuri tu bar kori kene dusera kinar phale jabo.” tetiya tarkhan ulai jaise, 23aru tarkhan jua homoi te Jisu ghumai jaise. Tetiya tofan hava ekta pukhuri te ahhise, aru tarkhan laga nao tu paani pora bhorta hoi kene, bipot te thakise. 24Aru tarkhan pora Jisu ke uthai kene koise, “Malik, malik, amikhan harai jai ase!” Tetiya Tar uthise aru tofan hava aru dhou paani ke gali dise; aru eitu rukhi jaise, aru chup chap hoise. 25Jisu he tarkhan ke koise, “Tumikhan laga biswas kot ase?” Tetiya tarkhan bhoi korise, aru asorit hoi kene ekjon he ekjon ke koise, “Eneka hole eitu kon hobo, Tar pora hava aru paani ke bhi hukum diye, aru eitu mani ase?”
Ohusi Atma Pora Dhori Thaka Manuh Jisu He Hustho Kora
26Tetiya tarkhan dusera jaga phale thaka Gerasenes desh, Galilee jaga usor thaka te ahhise. 27Aru Jisu he nao pora ulai kene maati pongcha homoi te, eitu sohor pora manuh ekjon, kon logot te bhut thakise, tar pora Jisu ke log korise; tar besi din kapoor napindhi kene he thakise, aru tar ghor te nahoi kene koborsthan te he thakise. 28Ketiya tar pora Jisu ke dekhise, jur pora chillai kene Jisu usor te athukarhi kene dangor awaz pora koise, “Sobse mahan Isor laga Putro Jisu, apuni moi logot te ki koribole ase? Moi onurudh kori ase, moi ke tarona nadibi.” 29Kilemane eitu manuh pora ulabole Jisu pora bhut ke hukum di kene thakise. (Kilemane besi par bhut pora tar ke dhorise. Aru tar ke luha rosi nahole dusera rosi pora bandhi kene roikhya korilebhi eitu bhangi kene bhut pora tar jungol te loi jabo eneka thakise.) 30Tetiya Jisu pora tar ke hudise, “Tumi laga nam ki ase?” Aru tar pora koise, “Legion,” kilemane tar logot te bhut besi ghusi kene thakise. 31Aru abyss te jabole hukum nadibi eneka taikhan pora Jisu ke onurudh korise. 32Tetiya eitu pahar jaga phale gahuri besi palli thakise; aru taikhan pora gahuri logot te humai jabole onurudh korise. Eitu karne Jisu he jabole dise. 33Tetiya ohusi atma tu heitu manuh pora ulai kene gahuri khan majot te humai jaise, tetiya gahuri khan sob tu rangkhang phale polai kene samundor paani te dhubi jai kene morise.
34Ketiya gahuri pala khan pora ki hoise eitu dekhise, taikhan polai kene sohor jaga aru nagor sob te eitu koi dise. 35Tetiya ki hoise, eitu sabole manuh khan sob ulai jaise, aru taikhan Jisu usor te ahhise, aru kon logot te ohusi atma ulai jaise eitu manuh Jisu usor te bohi kene kapoor thik pindhi kene, mon mogos thik hoi kene dekhise, aru taikhan pora bhoi korise. 36Aru kiman jon pora eitu dekhise taikhan pora heitu ohusi atma pora dhori thaka manuh tu keneka bhall hoise, eitu sob manuh ke koi dise. 37Tetiya Gerasenes usor te thaka desh laga manuh khan sob pora taikhan jaga pora jai jabi eneka Jisu ke koise; kilemane taikhan ekdom bhoi lagise; eitu karne Jisu he nao te bohi kene ghurai ahhi jaise. 38Aru manuh kon pora ohusi atma jai jaise, tar pora Jisu logot te thakibole onurudh korise; kintu Jisu he tar ke pathai kene koise, 39“Tumi laga ghor te ghurai jabi, aru Isor pora kiman dangor kam tumar karne korise, eitu janai dibi.” Aru tar jai jaise, aru sohor sob jaga te jai kene Jisu he tar karne kiman dangor kam korise eitu janai dise.
Jisu Pora Tiruta Ekjoni Aru Jairus Laga Sowali Hustho Kora
40Tetiya Jisu ghurai ahha homoi te genti koribo napara manuh khan pora Tar ke swagat korise, kilemane taikhan sob Jisu ke rukhi thakise. 41Aru tate Jairus koi kene ekjon ahhise, tar tu girja ghor laga sasonkorta ekjon thakise; aru Jisu laga theng te athukarhi kene tar laga ghor te ahhibi eneka onurudh korise, 42kilemane tar laga khali ekjoni sowali kon umor baroh saal asile, tai tu moribole thakise.
Tetiya Jisu tate jua homoi te manuh khan pora Tar ke dhaka marise. 43Aru tiruta ekjoni baroh saal khoon jua bemar hoi thakise, aru tai kamai thaka sob khorcha korile bhi konu doctor pora bhi tai ke hustho koribo para nai, 44Jisu laga piche te tai ahhi kene, tar laga anchal kapoor te chuise; aru loge loge khoon jua tu rukhi jaise. 45Tetiya Jisu he koise, “Moi ke chua tu kon ase?” Tetiya sob manuh pora najane eneka koise, tetiya Peter he koise, “Malik, genti koribo napara manuh khan pora apuni usor te ahhi kene dhaka mari ase!” 46Kintu Jisu he koise, “Konuba ekjon he moi ke chuise; kilemane moi laga shakti ulai jua moi janise.” 47Aru lukabo napare eneka ketiya tiruta pora janise, tai kapi kapi kene ahhise aru Jisu usor te athukarhi kene sob manuh aage te tai kile chuise aru keneka loge loge bhall hoise eitu shikar kori kene koise. 48Aru Jisu he tai ke koise, “Putri, tumar biswas pora tumi bhall hoise; shanti te jabi.”
49Jetiya Tar aru kotha tu koi thakise manuh ekjon sasonkorta laga ghor pora ahhi kene koise, “Apuni laga sowali tu morise; guruji ke etiya digdar eku nadibi.” 50Kintu Jisu he eitu huni kene tar ke koise, “Bhoi nakoribi; khali biswas he koribi, aru tai tu bhall hoi jabo.” 51Aru ketiya Tar ghor pongchi ahhise, Tar logot te kon bhi ghor bhitor te jabole diya nai, khali Peter, John aru James, aru sowali laga amaa baba he jaise. 52Aru sob manuh mon dukh hoi kene sowali nimite kandi thakise; kintu Jisu he koise, “Nakandibi; kilemane sowali tu mora nai, kintu ghumai ase.” 53Aru manuh khan pora Jisu ke hangsai dise, kilemane taikhan pora jane, sowali tu hosa bhi morise. 54Kintu sowali laga haat te dhori kene matise aru koise, “Putri, uthibi.” 55Aru tai laga atma ghurai ahhise, aru tai loge loge uthi jaise; aru sowali ke kiba ekta khabole dibi eneka Jisu he janai dise. 56Aru tai laga amaa baba he asorit lagise; kintu ki hoise, eitu kon ke bhi nakobi eneka Jisu he taikhan ke mana korise.
ទើបបានជ្រើសរើសហើយ៖
LUKE 8: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
