JOHN 21
21
Sat Jon Chella Logot Te Jisu Ula
1Eitu pasot te Jisu pora arubhi chella khan logot te, Tiberias samundor te prokahit kori dekhai dise, aru eitu eneka dekhaise. 2Simon Peter, Thomas (Twin eneka mata), Galilee te Cana laga Nathanael, Zebedee laga putro khan, aru dusera chella duijon eke logot te thakise. 3Tetiya Simon Peter pora tarkhan ke koise, “Moi maas dhoribole jai ase.” Tarkhan pora tar ke koise, “Amikhan bhi apuni logot te jabo.” Tetiya tarkhan ulai jaise aru nao ekta te bohise, kintu eitu raati te tarkhan pora eku dhora nai.
4Ketiya phujor homoi hoise, Jisu samundor kinar te khara kori thakise; kintu chella khan pora eitu Jisu ase eneka najane. 5Jisu pora tarkhan ke koise, “Hei bacha khan, tumikhan logot maas olop bhi ase na nai?” Tarkhan pora koise, “Nai.” 6Tar pora tarkhan ke koise, “Nao laga daina phale jal tu phelai dibi, aru tate tumikhan pora olop pabo.” Eitu karne tarkhan pora phelai dise, aru maas besi dhora karne tarkhan pora uthabo para nai. 7Tetiya eitu chella, kon Jisu he prem korise tar pora Peter ke koise, “Eitu Prabhu ase!” Ketiya Simon Peter pora eitu Prabhu ase eneka hunise, tar laga upor pindha kapoor lagaise (kilemane kam kora karne kapoor napindhi kene thakise), aru samundor paani te humai jaise. 8Kintu dusera chella khan pora jal bhorta maas dhori thaka tu tani kene ahhise, kilemane tarkhan maati pora besi dur nahoi kene khali ekso yards nisna he thakise.
9Ketiya tarkhan maati pongchise tate charcoal pora jui jolai kene eitu upor te maas aru roti tarkhan pora paise. 10Jisu he tarkhan ke koise, “Etiya tumikhan pora dhora maas konuba anibi.” 11Eitu karne Simon Peter nao pora ulaise aru jal tu maati te ulai loise, tate dangor maas besi thakise aru genti kori kene 153 thakise. Aru iman besi maas dhorile bhi jal tu phata nai. 12Jisu he tarkhan ke koise, “Ahhibi, aru nasta khai lobi.” Eitu homoi te chella khan kon pora bhi, “Apuni kon ase?” eneka hudibole himat thaka nai, kilemane tarkhan pora janise, eitu Prabhu ase. 13Jisu ahhise aru roti tu loi kene tarkhan ke dise, aru eneka maas bhi dise. 14Eitu Tar ponuruthan hua pasot te chella khan logot te tin bar dekhai diya thakise.
Jisu Aru Peter
15Ketiya tarkhan nasta khua khotom hoise, Jisu pora Simon Peter ke koise, “John laga putro Simon, eitu khan sob pora besi tumi Moi ke prem kori ase na nai?” Tar pora Tar ke koise, “Hoi, prabhu; moi apuni ke prem kori ase eneka apuni jane.” Tar pora tar ke koise, “Moi laga mer puali khan roikhya koribi.” 16Tar pora aru duibar tar ke hudise, “John laga putro Simon, tumi Moi ke prem kori ase na?” Tar pora Tar ke koise, “Hoi, Prabhu; moi apuni ke prem kori ase eneka apuni jane.” Tar pora tar ke koise, “Moi laga mer khan roikhya koribi.” 17Tar pora tin bar tar ke koise, “John laga putro Simon, tumi moi ke prem kori ase na?” Peter pora mon te beya paise, kilemane tar ke tin bar koise, “Tumi Moi ke prem kori ase na?” aru tar pora Tar ke koise, “Prabhu, apuni sob jani ase; apuni jani ase moi apuni ke prem kore ase.” Jisu he tar ke koise, “Moi laga mer roikhya koribi. 18Hosa kotha Moi tumikhan ke koi ase ketiya tumi jawan homoi thakise, tumi nijor pora pindhi loise aru kot te jabole monn ase tate jaise, kintu ketiya tumi bura hoi, tumi laga haat uthabo aru dusera ekjon pora he pindhai dibo, aru tumi kot te jabole monn nai tate loi jabo.” 19(Tar pora eitu kua tu, keneka niyom te Peter moribo aru eitu pora Isor ke mahima dibole ase eitu dekhai diya thakise.) Aru eitu kotha kua pasot te tarkhan ke koise, “Moi laga piche ahhibi.”
Jisu Pora Besi Prem Kora Chella
20Peter pora ghurai kene saise aru Jisu pora besi prem kora chella piche te ahha dekhise, eitu chella pora he mez te Jisu usor te bohi kene koise, “Prabhu Apuni ke thogai dibole tu kon ase?” 21Ketiya Peter pora tar ke dekhise, tar pora Jisu ke koise, “Prabhu, tar bhi keneka hobo?” 22Jisu he tar ke koise, “Jodi eitu manuh Moi naha tak jinda thakibole moi laga itcha hole, tumi ki koribo? Tumi tu moi piche te he ahhibi!” 23Eitu karne tarkhan majot te kotha eneka ulaise, eitu chella tu namoribo; kintu Jisu pora eitu manuh namoribo eneka kua nai kintu, “Moi naha tak eitu manuh ke thakibo dibole Moi itcha hole tumi ki koribo?” eneka he kua ase.
24Eitu eke chella ase, kon pora eitu khan sob laga sakhi di ase, aru kon pora eitu khan sob likhi di ase, aru amikhan pora jane tar laga sakhi tu hosa ase.
25Aru Jisu pora kora dusera kam arubhi besi ase. Jodi sob tu likhibo hole, prithibi sob tu kitab hoi kene likhile bhi eitu pora napongchibo eneka moi bhabi ase.
ទើបបានជ្រើសរើសហើយ៖
JOHN 21: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
