PASONIR KORMO 1
1
Pobitro Atma Laga Protigya
1Oh! Theophilus, moi laga prothom kitab te, Jisu pora shuru kora kam aru sikhai diya kotha sob, 2Tar mora pora jinda uthai kene sorgot te loi najua din tak te Pobitro Atma pora Tar basi lua pasonir khan logot te hukum diya sob likhi dise. 3Tar dukh kosto hua pasot te besi proman di kene Tar jinda hoise eneka Tar nijor ulai kene dekhai dise, chalis din majot te tarkhan logot te Tar ulai kene dekhai dise aru Isor rajyo laga kotha koise.
4Aru tarkhan logot te tar thaka homoi te, Jerusalem pora najai kene thakibole tar pora hukum di thakise, kintu Pitri pora ki protigya dise eitu nimite te rukhi thakibole koise. Aage te Tar pora koise; 5“John pora tu paani te he baptisma dise, kintu besi dery nahoi kene tumikhan Pobitro Atma te baptisma kori lobo.”
Uthi Jua
6Eitu karne ketiya tarkhan sob jama korise, tarkhan pora Tar ke hudise, “Prabhu, Apuni Israel khan nimite rajyo tu etiya di dibo neki?” 7Tar pora tarkhan ke koise, “Pitri he nijor odhikar pora ki bonai loi loise eitu laga homoi nahole din janibole tumikhan laga kam nahoi. 8Kintu ketiya Pobitro Atma tumikhan upor te ahhi jabo tetiya tumikhan shakti pabo aru tumikhan pora Jerusalem te aru Judea sob jaga te aru Samaria aru prithibi hekh tak te Moi laga sakhi janai dibo.” 9Aru ketiya Tar pora eitu kotha koi dise, tarkhan pora sai thaka homoi te, Tar uthi jaise aru megh ekta pora he Tar ke soku pora nadekhi kene loi jaise. 10Aru Tar ke loi jua sorgo phale tarkhan pora sai thaka homoi te, sabi, manuh duijon boga kapoor lagai kene tarkhan usor te khara korise, 11aru koise, “Galilee manuh khan, kile khara kori kene sorgo phale sai ase? Eitu Jisu, kon tumikhan majot pora sorgo te uthi jaise, tumikhan pora keneka sorgo te jua dekhise, eitu eke nisna he Tar arubhi wapas ahhibo.”
Judas Bodli Matthias Basi Lua.
12Eitu pasot te tarkhan sob Olive pahar kon tu Jerusalem usor te bisram din laga jatra dur (adha mile) thakise, tate pora ghurai kene Jerusalem te ahhi jaise, 13Ketiya ahhi kene tarkhan bohi thaka jaga pongchise, tarkhan sob upor kamra te jama korise, Peter aru John aru James aru Andrew, Philip aru Thomas, Bartholomew aru Matthew, Alphaeus laga putro James aru Simon Zealot aru James laga putro Judas. 14Tarkhan sob bhi mon ekta hoi kene, aru logot te mahila khan aru Jisu laga amaa Mary aru Tar laga bhai khan, prathana te homoi sob di kene thakise.
15Eitu din te bhai khan majot te Peter khara korise, (tate jama kori thaka manuh khan 120 nisna thakise) aru koise, 16“Bhai khan, Hastro kotha, kon tu Pobitro Atma darai David nijor mukh pora Judas, kon Jisu dhora manuh khan ke raasta dekhai diya ekjon hoise, tar laga kotha ki aage pora koi rakhise, eitu hidho hobo he lagibo. 17Kilemane tar bhi amikhan majot te ekjon thakise aru eitu Porisarjo kam te tar laga bhag bhi thakise.” 18(Etiya eitu manuh pora kora beya kam laga inam pora maati ekta kini loise, aru tar tu matha niche hoi kene girise aru tar laga pet phati kene narih sob ulai kene morise. 19Aru Jerusalem te thaka manuh khan sob pora eitu jani kene ase, eitu nimite he eitu maati tu tar khan laga kotha te Akeldama, eneka mate, kontu matlab ase, Khoon laga Maati). 20“Geetmala kitab te eitu likhi kene ase,
“‘Tar thaka jaga tu manuh nathaka jaga hobole dibi,
aru tate kon manuh bhi thaki bole nadibi’;
aru
“‘Dusera manuh ekjon pora tar laga kam tu koribole dibi.’
21Eitu karne amikhan majot te ekjon, kon pora Prabhu Jisu aru amikhan logot te homoi sob te ahha jua kori thakise, aru 22John pora baptisma diya din pora shuru hoi kene amikhan majot pora Tar uthai kene sorgot te loi jua din tak te sakhi dibole—eitu khan majot pora ekjon amikhan logot te ponuruthan laga sakhi dibo he lagibo.” 23Aru tarkhan pora duijon laga nam anise, Barsabbas koi kene Joseph, kon ke Justus eneka bhi mate, aru Matthias. 24Aru tarkhan pora prathana kori kene koise, “Hei Prabhu, Apuni sob manuh khan laga mon bhabna janibo pare eitu karne, 25ki kam Judas pora shari di kene nijor jaga te jaise, eitu Porisarjo kam aru pasonir kam koribo nimite eitu duijon majot te Apuni kon ke monjur ase eitu dekhai dibi.” 26Aru tarkhan pora tar duijon nimite shithi-khel khelise, aru eitu Matthias upor te girise, aru ekgharo jon pasonir logot te tar bhi genti kori loise.
ទើបបានជ្រើសរើសហើយ៖
PASONIR KORMO 1: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
