JOHN 20
20
Ponuruthan Kora
1Etiya hopta te prothom din, ekdom phujor te puhor nahua aage te, Mary Magdalene kobor sthan te ahhise, aru pathor tu kobor sthan pora hatai kene dekhise. 2Eitu karne tai polai kene Simon Peter aru dusera chella, kon Jisu he prem korise, tarkhan logot te ahhise, aru koise, “Tarkhan he kobor sthan pora Prabhu ke uthai kene loi jaise aru tarkhan pora kot rakhise, eitu amikhan pora najane.” 3Eitu karne Peter aru dusera chella bhi ulai kene jaise, aru koborsthan phale jai thakise. 4Tar duijon bhi eke logot te polai jaise, kintu dusera chella pora Peter aage te polaise aru koborsthan tu pahila pongchise. 5Aru matha niche kori kene bhitor te saise, tar pora norom kapoor tate giri kene dekhise, kintu tar bhitor te jaa nai. 6Tetiya tar laga piche te Simon Peter ahhise, aru sidha koborsthan bhitor te jaise. Tar pora norom kapoor tate giri kene, 7aru gamusa, kon tu Jisu laga matha te rakhi dise, eitu bhi norom kapoor logot te nahoi kene, tai nijor alag kori kene dekhise. 8Tetiya dusera chella, kon pora koborsthan aage te pongchise, tar bhi bhitor te jaise, aru tar pora dekhise aru biswas kori loise; 9kilemane tarkhan pora eitu homoi tak tu hole, Tar mora pora jinda hoi uthi jabo eneka Hastro te koi thaka tu nabuji kene thakise. 10Eitu pasot te chella khan nijor ghor te ghurai jaise.
Mary Magdalene Logot Te Jisu Ulaise
11Kintu Mary pora koborsthan bahar te kandi thakise, aru kandi kene tai pora koborsthan bhitor te sabole jaise. 12Aru tai pora sorgo dut duijon boga kori kene, Jisu rakha jaga te, ekjon matha phale aru ekjon theng phale, bohi kene dekhise. 13Tarkhan pora tai ke koise, “Hei tiruta, tumi kile kandi ase?” Tai pora tarkhan ke koise, “Tarkhan pora moi laga Prabhu ke loi jaise, aru tarkhan pora kot rakhise eitu moi najane.” 14Eitu kua homoi te he, tai ghuraise aru Jisu khara kori kene dekhise, kintu tar tu Jisu ase eneka tai najane. 15Jisu pora tai ke koise, “Hei tiruta, tumi kile kandi ase? Tumi kon ke bisari ase?” Tetiya mali ekjon ase eneka bhabna kori kene, tar ke koise, “Sahab, jodi apunikhan pora Tar ke loi jaise, tetiya kot te rakhise moi ke kobi, aru moi jai kene Tar ke loi lobo.” 16Jisu pora tai ke koise, “Mary.” Tai ghuraise aru Aramaic te Tar ke koise, “Rabboni!” (kon tu ortho ase guru-ji). 17Jisu pora tai ke koise, “Moi ke nachubi, kilemane Moi etiya tak Pitri usor te uthi jua nai; kintu Moi laga bhai khan logot te jabi aru tarkhan ke kobi, ‘Moi laga Pitri aru tumikhan laga Pitri usor te Moi uthi jai ase, Moi laga Isor aru tumikhan laga Isor usor te Moi uthi jai ase.’” 18Mary Magdalene jai kene chella khan logot te janai dise, “Moi Prabhu ke dekhise”—aru Prabhu pora tai ke ki koise, eitu sob tarkhan ke koi dise.
Jisu He Chella Khan Logot Dekhaise
19Heitu hopta prothom din, sham phale, Jews khan bhoi pora chella khan thaka ghor tu dorja te tala lagai kene thakise kintu Jisu ahhi kene tarkhan majot te khara korise, aru koise, “Tumikhan logot te shanti thakibi.” 20Ketiya Tar pora eitu koise, tar laga haat aru panjar dekhai dise. Tetiya chella khan Prabhu ke dekhi kene khushi hoise. 21Jisu he tarkhan ke arubhi koise, “Tumikhan logot te shanti hobi. Pitri pora keneka Moi ke pathaise, eitu nisna he Moi bhi tumikhan ke pathai di ase.” 22Aru eitu koi diya pasot te, Tar mukh pora hava pathaise aru koise, “Pobitro Atma loi lobi. 23Jodi konuba laga paap tumikhan pora khyama kori, tarkhan khyama pai loise; jodi tumikhan pora khyama nadi kene ase, eitu diya nai.”
Jisu Aru Thomas
24Eitu homoi te, ketiya Jisu tarkhan logot te ahhise, tetiya Thomas, barohjon majot te ekjon, kon ke Didimus eneka koi, tar thaka nai. 25Eitu karne dusera chella khan pora tar ke koise, “Amikhan pora Prabhu ke dekhise.” Kintu tar pora tarkhan ke koise, “Tar laga haat te gojal dagi moi nadekha tak, aru tate moi laga anguli pora nachua tak, aru moi laga haat pora tar laga panjar te nachua tak, moi ketiya bhi biswas nakoribo.”
26Ath din pasot te, chella khan arubhi ghor bhitor te jama kori kene thakise aru Thomas bhi thakise. Dorja khan sob tala lagai thakile bhi, Jisu ahhise aru tarkhan majot te khara korise aru koise, “Tumikhan logot te shanti thakibi.” 27Tetiya Tar pora Thomas ke koise, “Tumi laga anguli pora iyate chui dibi, aru Moi laga haat sabi; aru tumi laga haat ulai lobi, aru Moi laga panjar te chui dibi. Obiswasi nahobi, kintu biswas koribi.” 28Thomas pora uttar dise, “Moi Prabhu, aru moi Isor!” 29Jisu he tar ke koise, “Tumi biswas kori loi ase kilemane tumi Moi ke dekhise? Kon pora dekha nai, hole bhi biswas kori loi ase tarkhan kiman bhi ashish ase.”
Eitu Kitab Laga Udeshyo
30Ei homoi te chella khan majot te Jisu pora arubhi dusera asorit kam besi korise, kon tu eitu kitab te likha nai; 31kintu iyate likha tu, tumikhan pora Jisu Khrista tu Isor laga Putro ase eneka, aru Tar laga nam te biswas kora darai tumikhan ananta jivon pabo karne likhise.
ទើបបានជ្រើសរើសហើយ៖
JOHN 20: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
