Luka 17
17
Akokhurechekha abandu bakwe mubwonooni
(Mat. 18.6-7,21-22; Mk. 9.42)
1Nababoolela abeechibe ari Shilinyalikha ebiisichirasio okhuchweya okhwitsa ta; nebutswa woowe khumwenoyo ouchila nibiitsa! 2Bwakhaba bulayi khuye oluchina lwabohwa mwikosilie, nasukunwa munyanza ario, okhushila mbu yeesichirasie khalala khurutuutu runo. 3Mwirecheshe; omusiani weenywe naba niyoonoona, omukondeshele; ne naba niyeekalukhasia, omuleshele. 4Ne naba nakhwonoonela okhuula musaafu khunyanga ndala nakhukalushila okhuula musaafu, naboolanga ari Ndikalukhasiye; olamuleshelanga.
Okhwinjiyilie obusuubili bweefwe
5Abarume abo nibamusunjila Omwami bari Okhwinjiyilie obusuubili bweefwe. 6Naye Omwami nakalusia ari Nimuba nimuli nende obusuubili shinga imoni ndala yolufwa Iwelisaatsi, mwakhaboolela omukhuyu kuno mbu Siulikha, wiraache munyanza; nakwo kwakhamuhulila.
Aka omusumba ahhoyile okhukhola
7Ne ali heena mwinywe, nali nomusumbawe oulimanga kata okhwaya amakondi, wakhamusunjila niyakharula mumukunda, ari Yitsa bwangu, wikhale olie? 8Ne shialamusunjila ari Ungasilie ebiokhulia; wibohe, ukhalabanile, okhuula olwa nembe nindiile ninywa; mana olunyumakhwo wesi olalia nonywa? 9Amukhupilanga omusumbawe mbu Orio, shichila ukholile akeenako aka alachilwe noho? 10Nineenywe mwesi murio, olwa mulaba nimukholile kosi aka mwalachilwe, muboole muri Khuli abasumba abarakaasa ta; khwakholile butswa akali nikakhukhoyeele okhukhola.
Yesu yasiiya abobuchele ekhumi
11Ne olwa bali nibali khunjila nibatsiitsanga eYerusalemu, yabira hakari weSamaria nende Galilaya. 12Ne olwa yali nashiinjila mwitaala lindi yabukaana nende abandu ekhumi abobuchele, abali nibasinjiile ehale, 13nibachinga emioyo nibasunga bari Yesu, Omwami, okhubeele tsimbabasi. 14Nolwa yabalola yababoolela ari Tsie mwilolosie imbeli wabakuhani. Mana olwa bali nibashitsia, basiiyikha. 15Mana mulala khubo, olwa yalola shinga olwa ahoniibwe, yakalukha, namwitsoomia Nyasaye nomwoyo omukhongo; 16niyeekhupa mafumama hamakuluke, namukhupila orio; ne yali omuSamaria. 17Mana Yesu nakalusia ari Shibasiiyilwe bosi ekhumi ta? Nabo shienda bali heena? 18Shibanyooleeshe abakhakalukha mbu bamwitsoomie Nyasaye ta, habula omurende uno? 19Namusunjila ari Buukha, otsie butsia; obusuubilibwo bukhuhoniye.
Okhwitsa khwObwami bwaNyasaye
(Mat. 24.23-28,36-41)
20Ne olwa yareebwa nende abaFarisayo mbu Obwami bwaNyasaye buliula liina? Yakalusia nababoolela ari Obwami bwaNyasaye shibwitsa nebilolelo ebilolekha tawe; 21kata shibalasunga bari Lole, hano! Kata bari, Halia! Ta; okhuba lole, Obwami bwaNyasaye buli hakari weenywe. 22Nasunjila abeechibe ari Tsindaalo tsiliitsa olwa muliikomba okhulola lulala olwokhutsindaalo tsiOmwana wOmundu, ne shimulilulola ta. 23Mana balimusunjila bari Lole halia! Lole hano! Ne murarula ewa muli, kata okhubalondakhwo tawe; 24shichila shinga oluhenu olwa luhenukha nilulangaasia okhurula olubeka olwo hasi welikulu okhuula khulubeka olwo hasi welikulu, nolwa Omwana wOmundu aliba khunduukhoye. 25Ne mbelio akhoyile okhwifwila amakhuwa amanji, nokhulobwa nabolwibulo luno.
26Ne shinga olwa keekhola mundaalo tsiaNoa, nolwa kaliba kario mundaalo tsiOmwana wOmundu. 27Baliitsanga, banyweetsanga, bateeshinjia, bateeshibungwa, okhuula khunyanga eyo olwa Noa yeenjila musafina, omuyembo nikuula nikubahesia bosi pe. 28Khandi keekhola kario mundaalo tsiaLoti; baliitsanga, banyweetsanga, bakulanga, bakusinjia, baraakanga, boombakhanga; 29ne khunyanga olwa Loti yarula muSodomu likulu liakwisia ilami nende omulilo shinga ifula, nibibatibia bosi pe. 30Ne kalaba kari nanwa khandi khunyanga eyo olwa Omwana wOmundu alifwimbukha.
31Khunyanga eyo, oyo oulaba nali hekulu khushilama shieinzuye, emianduchie nichili munzu, aleshe okhwikha mbu abirusiemwo; kata ouba nali mumukunda yesi ario, arakalukha ingo ta. 32Mwitsulile omukhasi waLoti. 33Omundu yesi oukhaaba okhunyoola obulamubwe, alabukosia; ne omundu yesi oulabukosia obulamubwe alabulinda bulayi.
34Emuboolela mbu mushilo shieneshio abandu babili baliba nibali khushitali shilala; mulala alibukulwa, oundi alilekhwa. 35Abakhasi babili baliba nibasielanga halala; mulala alibukulwa oundi alilekhwa. [36Abasaatsa babili baliba nibali mumukunda; mulala alibukulwa, oundi alilekhwa.] 37Nibakalusia nibamureeba bari Niheena, Omwami? Nabasunjila ari Ewa omulambo kuli, ebweneyo niyo ewa tsingosia tsilakhung'aanila.
ទើបបានជ្រើសរើសហើយ៖
Luka 17: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
