Luka 16
16
Oluchelo Iwomunyapara omushiamu
1Olundi yabasunjila abeechibe ari Yaliho omusaatsa undi omuyinda owali nali nende omunyapara; omwenoyo namoonywa ewuwe mbu amalanga butswa emianduchie. 2Namulanga, namureeba ari Kano kakhali karie aka embulilanga khwiwe? Umbasilie ebiobunyaparabwo, shichila shionyala okhuba omunyapara khandi ta. 3Omunyapara oyo nasunga mumwoyokwe ari Nekhole endie, olwa omwami wanje ambiniyekhwo obunyapara? Shindakhanyala okhulima ta; okhusabanga ebindu nokhwetsisoni khwisie. 4Emanyile eshia ekhoyile okhukhola, mbu olwa emba nimbinibwakhwo obunyapara, mana banzinjisie munzu tsiabwe. 5Nalanga abeekobi bomwamiwe, mulala mulala, nareeba owambeli ari Likobilio khumwami wanje lili lirie? 6Nakalusia mbu Tsibaatsil eshikhumi tsiamafura. Namusunjila mbu Bukula lihandiikolio, wikhale bwangu ohandiiche amakhumi karaano. 7Mana nareeba oundi ari Nawe, likobi lilio lili lirie? Naye ari, Tsikoro eshikhumi tsieingano. Namuboolela mbu Bukula lihandiikolio, ohandiiche amakhumi munaane. 8Omwamiwe namupaaka omunyapara oyo omushiamu, shichila yakholile akobuchesi; okhuba abaana beshialo shino mulwibulo lwabwe abeene nabachesi okhushila abaana bomubasu. 9Nasi emusunjila mbu mwikhoonyele obuyinda obushiamu okhwinyoolela abeene abeetsa, mbu olwa bulaba nibuhweele, mana bamwinjisie mubimenyo biobumeli.
10Ouli omwisiikwa mumakhuwa amatuutu, khandi nomwisiikwa mumakhongo; ne ouli omushiamu mumakhuwa amatuutu, khandi nomushiamu mumakhongo. 11Kho nimuba nimurabeelenje abeesiikwa mubuyinda obushiamu ta, ali heena owakhamwechekhakhwo obuyinda bwatoto? 12Kata nimuba nimurabeelenje abeesiikwa khubindu biabeene ta, ali heena owakhamuheelesia ebiakhaba bieenywe abeene?
13Abulaho omusumba yesi ounyala okhukhalabanila abaami babili ta; shichila alachwang'a mulala khubo namuheela oundi; kata mbu alahambana nende mulala khubo namuchaya oundi. Shimunyala okhukhalabanila Nyasaye khandi nende emiandu ta.
Akamalako nende Obwami bwaNyasaye
14Nabo abaFarisayo, abali nibaheelanga amapeesa muno, nibahulila amakhuwa ako; nibamuleka. 15Nabasunjila ari Inywe ninywe abeeha obulunjishi mumoni tsiabandu; ne Nyasaye wamanya emioyo chieenywe; shichila eshiheebwa oluyali mubandu, neshisinyo mumoni tsiaNyasaye.
16Akamalako nende abanabii kalinjiho okhuula khuYohana; okhurula mundaalo etsio injiili yobwami bwaNyasaye yilwatsungwa, ne buli mundu yeenjilangamwo namahababa.
17Ne neshiangu likulu nende eshibala okhuhwaho, okhushila akharoonyelesi khalala khamalako okhukwa.
Aka Yesu yeechesia khukokltulekhana khwomusaatsa nomukhasiwe
(Mat. 19.1-12; Mk. 10.1-12)
18Buli mundu owilusia omukhasiwe nateeshia oundi, aheeya; noyo outeeshia omukhasi ouba niyeelusiibwe nomusaatsawe yesi aheeya.
Omuyinda nende Lazaro
19Yali naliho omusaatsa undi omuyinda, ne yali niyeefwalanga tsingubo tsieisambarau nende ikitani indorotoro, naliitsanga eshiami buli nyanga nende obusangaali. 20Ne omumanani undi oweliiralie mbu Lazaro yali niyaalisibongwa hashilibwashie, owa amakonzo kamala omubilikwe pe, 21niyeekomba okhwikura khumbungulusi etsiabungulukhanga okhurula khumeesa yomuyinda oyo; ne kata tsimbwa tsieetsanga nitsikhomba amakonzoke. 22Mana omumanani oyo nafwa, nachingwa nende abamalaika nayilwa khushilifu shiaAburahamu; mana omuyinda yesi yafwa nayabilwa. 23Ne nali eMakombe, nanyasibungwa muno, yachinguula tsimoni, nalola Aburahamu nali ehale, nende Lazaro nali khushilifushie. 24Nalanjisia, nasunga mbu Papa Aburahamu, umbeele tsimbabasi, orume Lazaro mbu yeene obutsunzu bwolwala mumatsi, anyisie olulimi lwanje; okhuba esaalilanga muno mulumemu luno. 25Ne Aburahamu nakalusia ari Mwana wanje, yitsulila mbu iwe mundaalo tsiobulamubwo wanyoolanga amalayiko, ne Lazaro ario yanyoolanga amabii; ne bulaano, hano, ye alemibwa omwoyo, nawe oli mubusaalili. 26Ne halala nende ako, hakari weefwe ninawe liliho libanda lietsinjengulukho eliareebwaho, mbu abeenya okhurula hano bamutsiile ewa muli baranyala ta, khandi mbu oundi yesi oweyo aleshe okhwambukha okhukhwitsila ifwe. 27Namusunjila mbu Ekhusaaya, papa chama omurume ebunango weefwe; 28shichila endikhwo nende abaana beefwe baraano; mbu abarumbulile akobuloli, nabo baleshe okhwitsa habundu hano hamanyasio. 29Aburahamu yamusunjila ari Bali ninabo Musa nende abanabii; babahulilenje bo. 30Naye ari 'A, tawe, papa Aburahamu; nebutswa oundi naba nabatsiila okhurula mubafu, baleekalukhasia. 31Naye namusunjila mbu Nibaba nibarahulilanga Musa nende abanabii, shibalafuchiilila ta, kata olwa omundu alamukha okhurula mubafu.
ទើបបានជ្រើសរើសហើយ៖
Luka 16: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
