Luka 18
18
Oluchelo Iwomukhasi omulekhwa nende omukhalachi weshiina
1Mana naboopela oluchelo oluboola mbu bakhoyile okhusaayanga tsindaalo tsiosi, oburafwa omwoyo ta; 2ari Mwitookho lindi yalimwo omukhalachi weshiina ourariitsanga Nyasaye kata okhuteeba likhuwa khubandu ta; 3khandi mwitookho bwenomwo yalimwo omukhasi omulekhwa; ne yali namutsiilanga akhandi akhanji, ari Ukhalachile eshiina shiatoto khumusuku wanje. 4Naye yakhayakhwo tsindaalo; mana olunyumakhwo yapaara mumwoyokwe, ari Kata nindariitsanga Nyasaye kata okhuteeba likhuwa khubandu ta, 5ne ndalakhalachila omulekhwa uno eshiinashie shichila anyasinjia, shio alafutula imoni. 6Mana Omwami nasunga mbu Hulile aka omukhalachi weshiina omushiamu oyo yaboola. 7Ne Nyasaye shialakhalachila abalobolebe eshiina shiatoto, abamuhaabilanga eshiteere nende eshilo? Alashinda khuyako? 8Emusunjila mbu alabakhalachila eshiina shiabwe bwangu. Nebutswa olwa Omwana wOmundu aleetsa, alanyoola obusuubili mushibala noho?
Oluchelo IwomuFarisayo nende omusololi wobushuru
9Khandi naboopela oluchelo luno abandi abali nibeesuubilanga abeene shinga olwa bali abalunjishi nibachaya abandi bosi; 10ari Abandu babili batikulukha nibatsia muhekalu okhusaaya; mulala yali omuFarisayo, oundi yali omusololi wobushuru. 11OmuFarisayo oyo nasinjila nasaaya mumwoyokwe omwene yenyene, ari Nyasaye, ekhuupila orio, shichila shindi shingana abandi bosi ta, mbu abanuuli, abashiamu, abaheyi, kata shinga omusololi wobushuru uno ta. 12Ehonganga inzala khabili mwihonga; ehaananga eshitonye shielikhumi khubiosi ebia enyoolanga. 13Ne omusololi wobushuru naye yasinjila ehale, ne kata shiyachinguula tsimonitsie mwikulu ta; nebutswa niyeekhupa eshilifu, nasunga mbu Nyasaye, umbeele tsimbabasi, isie omwonooni. 14Emuboolela mbu omundu oyo yakholomokha natsia ebunangowe nabasilibwakhwo obulunjishi, noundi oyo ta; okhuba buli mundu owiyemekha omwene alatiitiyibwa; noyo owitiitiyia omwene aleemekhwa.
Yesu yasabila abaana abatiiti ibaraka
(Mat. 19.13-15; Mk. 10.13-16)
15Khandi bali nibamuleerela kata abaana babwe abatoro mbu abatiilekhwo; ne olwa abeechibe balola bario, babakondeshela. 16Ne Yesu nabalanga mbu beetse, nasunga ari Leshe abaana abatiiti beetse khumubili wanje; murabakaania ta; okhuba obwami bwaNyasaye nobwabafwana shinga abo. 17Emusunjila toto, mbu omundu yesi ourafuchiilila obwami bwaNyasaye shinga omwana omutiiti, shialeenjilakhwomwo nahatuutu tawe.
Omusooliili omwimilisi omuyinda
(Mat. 19.16-30; Mk. 10.17-31)
18Haho omwimilisi undi yamureeba, ari Omwechesia omulayi, nekhole endie mbu mana enaamilwe obulamu bwobumeli? 19Naye Yesu namukalusia ari Kho unanga mbu omulayi mbushiina? Abulaho ouli omulayi habula mulala, niye Nyasaye. 20Omanyile amalako, mbu Oraheya ta, Oreera ta, Oreeba ta, Orachiikha ta, Heelesia so nende mawo oluyali. 21Naye nasunga ari Ako kosi engakholanga okhurula nindi omwana. 22Ne olwa Yesu yahulila ario yamusunjila ari Oshileemile likhuwa elala. Kusia biosi ebia oli ninabio, obakabile abamanani; mana olaba nelibiikho mwikulu; mana witse, unondekhwo. 23Ne olwa yahulila amakhuwa ako, yabeelela muno muno; shichila yali omuyinda po. 24Ne Yesu namulola, naboola ari Nobutinyu muno abali nobuyinda okhwinjila mubwami bwaNyasaye! 25Shichila neshiangu ingamia okhwinjila niyibirila munduhu yoluchela, okhushila owobuyinda okhwinjila mubwami bwaNyasaye. 26Nabo abahulilakhwo nibareeba bari Kho niwina owakhanyala okhuhona? 27Naye yasunga mbu Amakhuwa akaranyalikhanga khubandu ta, kanyalikhanga khuNyasaye.
28Petero naboola ari Lola, ifwe khwalekha tsingo tsieefwe, nikhukhulondakhwo. 29Naye nabasunjila ari Emuboolela toto mbu abulaho owalekha inzu, kata omukhasiwe, kata abaana babwe, kata abeebulibe, kata abaana, khulwa obwami bwaNyasaye, 30oburanyoola ebindi ebishila ebio akhandi akhanji mundaalo tsino, nomundaalo etsiitsa obulamu bwobumeli.
Yesu yaboola akokhufwakhwe olwakhataru
(Mat. 20.17-19; Mk. 10.32-34)
31Naye nabukula abo Ekhumi-nababili nababoolela ari Lole, khutikulukha nikhutsia eYerusalemu; ne amakhuwa kosi akahandiikwa nende abanabii kaloosibwa khuMwana wOmundu. 32Okhuba alahaanwa mumakhono kAbamahanga, nanyokhoosibwa, nakholelwa amatinyu aketsisoni, nanyilikhwakhwo amare; 33balamunywekha tsikhoba, nibamwira; ne khunyanga yakhataru alalamukha khandi. 34Ne shibatiila khushisina shiamakhuwa ako kosi ta; likhuwa elo nilibabiswa, nabo nibaramanya akeene akasungwa tawe.
Omubofu omusabi yahonilibwa eYeriko
(Mat. 20.29-34; Mk. 10.46-52)
35Olwa yoola ahambi nende Yeriko, omubofu undi yali niyeekhaale khundulo weinjila, nasabanga amapeesa; 36ne olwa yahulila omukanda nikubira, yareeba mbu Nelikhuwa shi? 37Nibamuboolela mbu Yesu weNazareti abira. 38Mana nalanjisia, ari Yesu, Omwana waDaudi, umbeele tsimbabasi. 39Nabo abali nibeemiile nibamuloshela, mbu aholeele; naye nameeta bumeeta okhulanjisia, ari Iwe Omwana waDaudi, umbeele tsimbabasi. 40Yesu niyeemaho, naboola mbu aleerwe ewa yali; ne olwa yali niyoolile ahambi, namureeba mbu 41Nishiina eshia wenya ekhukholele? Naboola ari Omwami, mbu embe oulola. 42Yesu namusunjila mbu Olole. Obusuubilibwo bukhuhoniye. 43Ne nonoho nachaaka okhulola, nalonda munyumawe, niyeetsoominjia Nyasaye; abandu bosi nabo, olwa balola, nibamufumia Nyasaye.
ទើបបានជ្រើសរើសហើយ៖
Luka 18: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
