Yohana 7
7
Abaana babwe Yesu shibamusuubilila ta.
1Nolunyuma lwamakhuwa ako Yesu yali nachendanga muGalilaya, okhuba shiyayeenya okhuchenda mubuYahudi ta, shichila abaYahudi bali nibeenya okhumwira. 2Ne Lisabo liabaYahudi, mbu Lisabo liAmatili, liali nilili ahambi. 3Kho abasiani babwe nibamusunjila bari Rula hano, otsie ebuYahudi, mbu abeechibo nabo balole emilimochio echia okholanga. 4Okhuba abulaho oukhola likhuwa mabiswi, olwa omwene yeenya okhumanyikha ebulafu, tawe. Noba nokholanga amakhuwa kano, wilolosilie eshialo shiosi. 5Okhuba kata abasiani babwe shibali nibamusuubiliile ta. 6Kho Yesu nabasunjila mbu Eshise shianje shishili okhuula; ne eshise shieenywe shibeetsangaho tsindaalo tsiosi. 7Eshialo shishinyala okhumukiya inywe ta; ne shingiyanga isie, shichila eshirumbulilanga shinga ebiima biashio olwa bili ebibii. 8Mutikulushe mutsie khwisabo; isie shinzia bulaano khwisabo lino ta; shichila eshise shianje shishili okhuusibwa. 9Kho nababooleele amakhuwa ako, yahonga eGalilaya.
Yesu yatsia khwisabo liamaheema
10Ne olwa abasiani babwe abli nibamalile okhutikulukha okhutsia khwisabo, yesi yatikulukha natsiayo; ne shiyatsia habulafu ta, habula shinga mabiswi. 11AbaYahudi nabo nibamukhaaba mwisabo, nibareeba bari Akhali heena omundu tsana? 12Okhumoonyana okhunji nikhubaho mumikanda khukeke; abandi nibaboola mbu Nomundu omulayi; nabandi bari Tawe; ne akosinjia butswa emikanda. 13Nebutswa yabulaho owasunga khukeke habulafu ta, khulwa okhuria abaYahudi.
14Ne habwenaho hakari mundaalo tsielisabo Yesu yatikulukha niyeenjila muhekalu niyeechesia. 15Mana abaYahudi nibachenya, bari Omundu uno yamanya arie okhusooma, olwa arayeechesibwa ta? 16Kho Yesu yakalusia, nabasunjila mbu Obwechesii bwanje shinobwanje khubwanje ta, ne nobwa oyo owaruma. 17Omundu yesi naba narakhwo omwoyo okhukhola aka ye yeenya, alamanya obwechesii nibuba nibuli obwaNyasaye, nohomba nimba nimboolanga khubwanje. 18Ouboolanga khububwe yeekhaabila oluyali lulwe omwene; ne oukhaaba oluyali lwa oyo owamuruma, omwenoyo nowatoto, kata obushiamu shibulimwo muye ta. 19Musa shiyamuheelesia amalako? Ne shialiho khwinywe oukholanga akamalako ta. Mbushiina nimwenya okhunzira? 20Abomukanda nibamukalusia bari Oli nende lidimoni; niwina owenya okhukhwira? 21Yesu nakalusia, nababoolela mbu Ndakhola omulimo mulala, ne mwesi mwachenya khukwo. 22Kano niko akachila Musa namuheelesia eshishebo; nebutswa shikali mbu shiarula khuMusa ta, habula khubakuuka; neenyu khunyanga yaSabato mushebanga omundu. 23Omundu naba nanyoola okhushebwa khuSabato, mbu amalako kaMusa kaleshe okhwonoonibwa, mbushiina nimu'sinyishila shichila ndamaukhola omundu abe omulamba khuSabato? 24Murakhalakanga khuka mulolanga ta, ne mukhalache obukhalachi obulunji.
Uno niye Kristo tsana nohomba?
25Kho abandi khubeYerusalemu nibareebana, bari Uno shiali ye owa beenyanga okhwira? 26Lole, aboolanga katong'ane, nibaramusunjila likhuwa ta. Kakhanyala okhuba mbu abakhulundu bamanya shinga uno olwa ali ye Kristo watsana? 27Nebutswa khumumanyile omundu uno ewa arula; ne olwa Kristo oyo aleetsa, abulaho oulamanya ewa arula ta. 28Kho Yesu yalanjisia muhekalu, niyeechesia, naboola mbu Mwa'manya, khandi mumanyile ewa erula; shindayeetsa khubwanje ta, ne owaruma nowatoto; omwenoyo shimumumanyile ta. 29Isie emumanyile; shichila erula khuye, khandi neniye owaruma. 30Khulwako beenya okhumuhamba; ne omundu yesi shiyamukwakhwo ta, shichila eshiseshie shiali nishishili okhuula. 31Nebutswa abanji abomumukanda bamusuubilila; nibareeba bari Olwa Kristo oyo yakheetse, yakhakhole ebilolelo ebinji okhushila ebia omundu uno yakholile?
Abakhalabani barumwa okhuhamba Yesu
32AbaFarisayo nibahulila abandu nibamoonyananga amakhuwa ako khukeke; abakhulundu babakuhani nende abaFarisayo nibaruma abakhalabani okhumuhamba. 33Kho Yesu nasunga mbu Bulaano shishili eshise eshitiiti nishiliho nineenywe, mana enzia ewa oyo owaruma. 34Mula'khaaba, ne shimula'nyoola ta; ne ewa emba nindi, inywe shimunyala okhwitsayo ta. 35Kho abaYahudi nibasungana abeene nabeene, bari Niheena ewa omundu uno yeetsa okhutsia, aha khuranyala okhumunyoola ifwe ta? Alatsia khubOmusalaano abali muba Yunani, mbu abeechesie abaYunani, noho? 36Nelikhuwa shiina elia aboolile, mbu Mula'khaaba, ne shimula'nyoola ta; ne ewa emba nindi, inywe shimunyala okhwitsayo ta?
Emialo chiamatsi amalamu
37Haho khunyanga eyaheelelesia, niyo inyanga ikhongo yelisabo, Yesu yasinjila nalanjisia, ari Omundu yesi owa obuloho bulia, yeetse khwisie anywe. 38Ousuubilila isie, shinga amahandiiko olwa kasunga, emialo chiamatsi amalamu chilarula mumwoyokwe. 39Ne likhuwa elo yasunga khukaRoho, owa abamusuubililanga bali nibali okhunyoola; okhuba Roho yali nashili okhuhaanwa; shichila Yesu yali nashili okhwemekhwa muluyali.
Obwahukhani bweekhola mubandu
40Kho abandi abomumukanda, olwa bahulila amakhuwa ako, basunga mbu Toto mwene, uno niye omunabii tsana. 41Abandi nibasunga mbu Uno niye Kristo watsana. Nebutswa abandi nibasunga bari Ne Kristo oyo arulila eGalilaya noho? 42Amahandiiko shikaboola mbu Kristo yeetsa okhurula mulwibulo lwaDaudi, khandi okhurula eBetselehemu, litaala elo ewa Daudi yalinji? 43Mana obwahukhani nibwikhola mumukanda khululwe. 44Abandi khubo nibeenya okhumuhamba; habula yabulaho owamukwakhwo.
Abakhulundu babaYahudi babula obusuubili
45Kho abakhalabani abo nibatsia khubakhulundu babakuhani nende abaFarisayo; nabo nibabareeba bari Mbushiina nimuramuleerile ta? 46Abakhalabani abo nibakalusia mbu Abulaho owaboola shinga oyo ta. 47Kho abaFarisayo nibakalusia bari Nineenywe mwesi mushiamiibwe? 48Aliho khubakhulundu oumusuubiliile, kata khubaFarisayo? 49Nebutswa omukanda kuno okuramanyile amalako ta, kuli mushilaamo shiobubii. 50Naye Nikodemo, omwenoyo owamwitsila khale, ne nali mulala khubo, nabasunjila ari 51Amalako keefwe yikhalachilanga omundu eshiina, oburaranjilila okhuhulila aka omwene ali ninako nende okhumanya aka akhola noho? 52Nibakalusia nibamureeba bari Nawe wesi oli oweGalilaya? Khaaba, olole mbu abulaho omunabii yesi ourulila eGalilaya ta.
ទើបបានជ្រើសរើសហើយ៖
Yohana 7: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
