Yohana 6
6
Yesu yaliisia abandu ebikhumila biraano
(Mat. 14.13-21; Mk. 6.30-44; Lk. 9.10-17)
1Olunyuma lwamakhuwa ako Yesu yasamula natsia injelekha weinyanza yaGalilaya, niyo eya Tiberia. 2Omukanda omukhongo nikumulondakhwo, shichila balola ebilolelo ebia yakhola khubalwale. 3Mana Yesu natikulukha mushikulu niyeekhalayo halala nende abeechibe. 4Ne Pasaka, nilio lisabo liabaYahudi, liali ahambi. 5Kho Yesu yachinguula tsimonitsie, nalola omukanda omukhongo nikumwitsila, nareeba Filipo ari Nakhukule heena emikaate, bano mana balie? 6Ne yasunga ako khulwa okhumuteema; okhuba omwene yamanya eshia yeetsa okhukhola. 7Filipo nakalusia, nasunga mbu Kata emikaate chietsitinari ebikhumi bibili shichibahela, buli mundu okhunyoolakhwo omutiiti, ta. 8Mulala owokhubeechibe, mbu Anderea, omwana wabwe Simoni Petero, namusunjila ari 9Aliho hano omuyia ouli nende emikaate chiraano chieishayiri nende tsinyeeni tsibili; ne ebio nabinyale shiina khubandu abanji bari nanwa? 10Yesu naboola mbu Mwikhasie abandu. Ne bwaliho obunyasi obunji habwene yaho. Kho abasaatsa nibeekhala, obukhumi bwabwe shinga ebikhumila biraano. 11Mana Yesu nabukula emikaate echio; ne namalile okhuupa Orio, yabakabila abali nibeekhaale; khandi nende tsinyeeni natsio tsirio, obunji shinga olwa beenya. 12Ne olwa bali nibeekuure, yabiila abeechibe, ari Mukhung'aasie ebisonye ebitong'a, eshindu shiosi shileshe okhukora. 13Kho nibabikhung'aasia, nibeetsusia ebimwelo ekhumi nabibili ebiebisonye biemikaate echio chiraano chieishayiri ebia abali nibaliile basikasia. 14Ne olwa abandu abo balola eshilolelo eshio eshia yakhola, basunga mbu Toto mwene, uno nomunabii oyo owitsa mushialo.
15Mana olwa Yesu yalola mbu beenya okhwitsa okhumuhamba namaani mbu bamukhole omuruchi, yaahukha khandi, natsia mushikulu omwene yenyene.
Yesu yachenda khumatsi
(Mat. 14.22-27; Mk. 6.45-52)
16Ne khubwile abeechibe bakholomokha nibatsia khunyanza; 17nibeenjila muliaro, nibachaaka okhwambukha munyanza okhutsia eKaperinaumu. Ne eshialo shiali nishiiliime, naye Yesu yali nashili okhuula ewa bali. 18Nayo inyanza niyichaaka okhwirunda khulwa imbumbuyeka ikhongo eyali niyihuutsa. 19Ne olwa bali nibafuchile eliaro shinga tsimailo tsitaru tsine, balola Yesu nachenda khumatsi, nasita ahambi nende eliaro, nibaria. 20Naye nabasunjila ari ISIE NISIE; muraria tawe. 21Kho nibachama okhumwinjisia muliaro; nebutswa habwenaho eliaro niliula khushialo eshia bali nibatsiayo.
Abandu bakhaaba Yesu
22Ne mukamba abomukanda okwasinjila khulukuku Iweinyanza injelekha yilia balola mbu eliaro lindi libulaho, habula elala lionyene; khandi mbu Yesu shiyeenjiile muliaro halala nende abeechibe ta, habula mbu abeechi batsia bonyene. 23Nebutswa amaaro karula eTiberia ahambi nende habundu tsana ewa bali nibaliile emikaate olwa Omwami yali nakhupiile mbu Orio. 24Kho olwa abomukanda balola mbu Yesu shiyali naliho ta, kata abeechibe tawe, abeene beenjila mumaaro ako niboola eKaperinaumu, nibamukhaabanga Yesu.
Yesu niye eshiliibwa shiobulamu
25Ne olwa bamunyoola nali injelekha weinyanza, bamureeba bari Rabi, witsile hano liina? 26Yesu nakalusia nabasunjila ari Toto mwene, emusunjila mbu shimu'khaabanga shichila mwaluutsi ebilolelo ta, habula shichila mwaliile khumikaate nimwikura. 27Murakhalabanila ebiliibwa ebisasikhanga ta, habula khulwa ebiliibwa ebio ebibeetsangaho okhuula khubulamu bwobumeli, ebia Omwana wOmundu alamuheelesia; okhuba niye owa Samwana, mbu Nyasaye, yarakhwo eshibalikho. 28Kho nibamureeba bari Khukhole khurie, kho khukhole emilimo chiaNyasaye? 29Yesu nakalusia nabasunjila ari Kuno nikwo omulimo kwaNyasaye, mbu mumusuubilile oyo owa yaruma. 30Kho nibamureeba bari Mana neshilolelo shiina eshia okhola khulole nikhusuubila? Nimulimo shiina okwa okhola? 31Abakuuka beefwe balia imana mushitsiimi; shinga olwa kahandiikwa, mbu Yabaheelesia ebiliibwa ebirula mwikulu mbu balie. 32Mana Yesu nabasunjila ari Toto mwene, emusunjila mbu shiyali Musa owamuheelesia ebiliibwa ebirula mwikulu ta; ne Papa amuheelesinjia ebiliibwa biatoto ebirula mwikulu. 33Shichila ebiliibwa biaNyasaye nibio bienebio ebiikhanga nibirula mwikulu, nibiheelesia eshialo obulamu. 34Kho nibamusunjila bari Omwami, tsindaalo tsiosi okhuheelesinjie ebiliibwa ebio. 35Yesu nabasunjila ari Isie nisie ebiliibwa biobulamu; owitsa khwisie shialalumwa inzala ta; nousuubilila isie shialaliibwakhwo obuloho tsindaalo tsiosi tawe. 36Nebutswa ndamusunjila mbu mwayanduutsi, khane murashiasuubila ta. 37Bosi aba Papa yambeelesia beetsa khwisie; noyo owitsa khwisie shindalamusukuna elwanyi nahatuutu ta. 38Okhuba shindayeekha okhurula mwikulu okhukhola okokhwenya khwanje omwene ta, habula akokhwenya khwa oyo owaruma. 39Ne kano niko aka yeenya owaruma, mbu khubosi aba yambeelesiye endeshe okhukosia kata mulala khubo ta, habula mbu emulamusie khunyanga yobumaliilishi. 40Okhuba kano niko aka Papa yeenya, mbu buli mundu oumulola Omwana namusuubilila, abe nobulamu bwobumeli; nasi ndilimulamusia khunyanga yobumaliilishi.
41Kho abaYahudi nibamubuutsuluulila, shichila yasunga mbu Isie nisie ebiliibwa ebieekha okhurula mwikulu. 42Nibasunga bari Uno shiali ye Yesu, omwana waYusufu, owa khumanyile samwana nende nyina? Kho akhaboolanga arie bulaano, mbu Ndeekha nirula mwikulu? 43Yesu nakalusia nababoolela ari Murabuutsuluula abeene nabeene ta. 44Omundu yesi shianyala okhwitsa khwisie tawe, habula nakhweswa nende Papa owaruma; nasi ndilimulamusia khunyanga yobumaliilishi. 45Kahandiikwa mukabanabii mbu Ne bosi baliechesibwa nende Nyasaye. Buli mundu owahulila nende okhweka akarula khuPapa, yeetsa khwisie. 46Shikali mbu omundu yesi yakmulola Papa ta, habula oyo ourula ewaNyasaye, niye owamuluutsi Papa. 47Toto mwene, emusunjila mbu ousuubila ali nende obulamu bwobumeli. 48Isie nisie ebiliibwa biobulamu. 49Abakuuka beenywe balia imana mushitsiimi, ne bamala nibafwa. 50Bino nibio ebiliibwa ebiikhanga nibirula mwikulu; mbu omundu aliekhwo, aleshe okhufwa. 51Isie nisie ebiliibwa ebilamu ebieekha nibirula mwikulu; omundu yesi naba nalia khubiliibwa bino, alamenya obushia nobushia; toto, kata ebiliibwa ebia ndalahaana khulwa obulamu bweshialo nibio omubili kwanie.
52Kho abaYahudi nibayingana abeene nabeene, bari Omundu uno anyala arie okhukhuheelesia omubilikwe mbu khukulie? 53Mana Yesu nababoolela ari Toto mwene, emuboolela mbu nimuba nimuraliakhwo khumubili kwOmwana wOmundu nende okhunywa khumabangake ta, obulamu shibubakhwo mwinywe tawe. 54Ouliitsanga khumubili kwanje nanywa khumabanga kanje ali nende obulamu bwobumeli; nasi ndilimulamusia khunyanga eyobumaliilishi. 55Okhuba omubili kwanje nikwo eshiliibwa shiatoto, khandi amabanga kanje niko eshiokhunywa shiatoto. 56Ouliitsanga khumubili kwanje nanywa khumabanga kanje amenyanga mwisie, nasi muye. 57Shinga Papa ouli nobulamu olwa yaruma, nasi shinga olwa embeetsanga nobulamu khulwa Papa, nilwo olwa oundiitsangakhwo ali, mbu alabeetsanga nobulamu khulwanje. 58Bino nibio ebiliibwa ebio ebieekha nibirula mwikulu; shibili shinga ebia abakuuka abo balia, nibafwa, ta; oulia khubiliibwa bino alabeetsanga nobulamu obushia nobushia. 59Amakhuwa kano yakasunga musinagogi, olwa yali niyeechesilinjia eKaperinaumu.
Amakhuwa khukobulamu bwobumeli
60Kho abanji khubeechibe, olwa bakahulila, nibaboola bari Kano namasungo amatinyu; niwina ounyala okhukahulila? 61Ne Yesu, namanyile mumwoyokwe shinga abeechibe olwa bakabuutsuluulila, yabasunjila ari Khane likhuwa lino limwisichirasiye? 62Ne mwakhaba murie nimuba nimwakhalola Omwana wOmundu nakulukha nakalukha ewa yalinji khale? 63Niroho eyihaananga obulamu; omubili shikukaasila eshindu ta; amakhuwa aka ndamusunjiile niko roho, khandi niko obulamu. 64Ne balimwo abandi mwinywe abarasuubila ta. Okhuba okhurula khukhuchaaka Yesu yamanya abeenabo abarasuubila ta shinga olwa bali, nende oyo owitsa okhumukhoba. 65Nabasunjila mbu Niko akachila nimusunjiile, ndi abulaho ounyala okhwitsa khwisie narali Papa oumunyalila ta.
66Okhurula habwenaho abanji abokhubeechibe nibakalukha inyuma, nibaralondana ninaye khandi ta. 67Kho Yesu nabareeba abo Ekhuminababili ari Neenyu, mwenya okhutsia noho? 68Simoni Petero namukalusia ari Omwami, khukhatsie ewawina? Iwe oli nende amakhuwa kobulamu bwobumeli. 69Neefu khwasuubiile nikhumanya shinga olwa oli Omutakatifu waNyasaye. 70Yesu nabakalusia ari Shindamulobola inywe Ekhuminababili, ne mulala khwinywe nisetani? 71Ne yali nasunga khuYuda waSimoni Isikariote, shichila neniye owitsa okhumukhoba, nali mulala khwIkhumi nababili abo.
ទើបបានជ្រើសរើសហើយ៖
Yohana 6: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
