Yohana 8
8
Omukhasi owanyoolelesibwa naheyanga
53[Nibatsia buli mundu ebunanzu wuwe.
1Ne Yesu yatsia enashikulu shiFmitseituni. 2Kho mumabwibwi niyeenjila khandi muhekalu, abandu bosi nibamwitsila; niyeekhala, nabeechesia. 3Abahandiichi nende abaFarisayo nibaleera omukhasi owanyoolelesibwa naheya; nibamusinjisia hakari, 4nibamusunjila bari Omwechesia, omukhasi uno yanyoolelesiibwe mukhukhola khwene naheya. 5Ne mumalako Musa yakhulaka mbu khubalase abafwana bario namachina; kho nawe osunga orie khuye? 6Ne basunga bario nibamuteema, mbu babe nende elia bamwinjilila ninalio. Naye Yesu niyeenama hasi, nahandijka nende olwalalwe hasi. 7Ne olwa balumilila okhumureeba, yachinguukha, nabasunjila ari Omundu khwinywe oubula eshionoono, abe ye ouranjilila okhumulasa nelichina. 8Mana niyeenama khandi, nahandiika nende olwalalwe hasi. 9Nabo olwa bahulila bario, barula mulala mulala, nibachaachila khuwashila obukofu, kata okhuula khuwamaliilikha; naye Yesu natong'a yenyene, nomukhasi ewa yali hakari yaho. 10Yesu nachinguukha, namureeba ari Mama, bali heena? Shialiho omundu oukhukhalachila eshiina? 11Naye nakalusia ari Abulaho, Omwami. Yesu nasunga mbu Kata siesi shikhukhalachila eshiina ta; tsia butsia, nokhurula olwa leelo oroonoona khandi ta.]
Yesu niye obulafu bweshialo
12Mana Yesu nabasunjila khandi, ari Isie nisie obulafu bweshialo; ounondakhwo shialachenda mushiilima ta, ne alaba nobulafu bwobulamu. 13AbaFarisayo nibamusunjila mbu Wirumbulilanga omwene akobuloli; oburumbusibwo shibuli obwatoto ta. 14Yesu nakalusia nabasunjila mbu Kata nindirumbulila omwene obuloli, obuloli, oburumbusi bwanje nobwatoto; okhuba emanyile ewa ndarula, nende ewa enzia; ne inywe shimumanyile ewa ndarula kata ewa enzia tawe. 15Inywe mukhalachilanga khukomubili; isie shikhalachilanga omundu yesi ta. 16Toto, ne nimba nikhalakanga, obukhalachi bwanje nobwatoto; okhuba shindi sienyene ta, habula isie halala nende Papa owaruma. 17Toto, ne mumalako keenywe kahandiikwa mbu oburumbusi bwobuloli bwabandu babili nobwatoto. 18Nisie omwenoyo owirumbulilanga omwene akobuloli, khandi Papa owaruma yandumbulila akobuloli. 19Kho nibamureeba bari So ali heena? Yesu nakalusia mbu Shimumanyile kata isie kata Papa ta; nimuba nimwakhamanyile isie mwakhamumanyile nende Papa yesi. 20Yaboola amakhuwa ako olwa yali niyeechesinjia muhekalu, nali hebiishilo; ne yabulaho owamutiilakhwo, shichila eshiseshie shiali nishishili.
Ewa enzia, shimunyala okhwitsayo ta
21Mana nabasunjila khandi, ari Isie nzinyokha, ne mula'khaaba; ne mulafwila mubwonooni bweenywe; ewa enzia, shimunyala okhwitsayo tawe. 22Kho abaYahudi nibasunga bari Yeetsa okhwiyira omwene noho? Shichila aboola mbu Ewa enzia, shimunyala okhwitsayo tawe. 23Naye nababoolela mbu Inywe muli abahasi; isie endi oweikulu. Inywe muli abeshialo shino; isie shindi oweshialo shino tawe. 24Niko akachilile nimusunjiile mbu mulafwila mubionoono bieenywe; shichila nimurasuubila mbu ISIE NISIE ta, mulafwila mubionoono bieenywe. 25Kho nibamureeba bari Niwe wina? Yesu nababoolela mbu Kata nakeenako aka ndamubooleele okhurula khukhuchaaka. 26Endi nende amakhuwa amanji okhuboola nende okhukhalaka khwinywe; nebutswa owaruma nowatoto; nakeenako aka ndahulila okhurula khuye emboolela eshialo. 27Kata shibatiila khushisina, mbu yababoolela akaSamwana, tawe. 28Mana Yesu nasunga mbu Olwa muliba nimumuchinguulile Omwana wOmundu, habwenaho mulimanya mbu ISIE NISIE, khandi mbu shikholanga likhuwa liosi khubwanje ta, habula shinga Papa olwa yanzechesia, nolwa emboolanga amakhuwa kano. 29Naye owaruma ali ninasi; shiyayandekha sienyene ta; okhuba tsindaalo tsiosi ekholanga akeenako akamuchamisia. 30Olwa yali nashiboola amakhuwa ako, abanji nibamusuubilila.
Obwatoto bulamukhola abalekhuule
31Kho Yesu yabasunjila abaYahudi abo abali nibamusuubiliile ari Nimuba nimumenya mwikhuwa lianje, kho muba abeechi banje toto; 32ne mulamanya obwatoto; nabwo obwatoto bulamukhola abalekhuule. 33Nabo nibamukalusia bari Iwfe khuli olwibulo lwaAburahamu; khushili okhubakhwo mububohwi khumundu yesi tsindaalo tsiosi ta; nawe oboola orie mbu Mulakholwa abalekhuule? 34Yesu nabakalusia ari Toto mwene, emusur jila mbu buli mundu oukholanga ebionoono nomusumba wobwonooni. 35Omusumba shiamenya munzu obushia nobushia ta; omwana amenyanga obushia nobushia. 36Kho Omwana naba namukhola abalekhuule, mulaba abalekhuule toto. 37Emanyile shinga olwa muli olwibulo lwaAburahamu; ne mukhaabanga okhunzira, shichila likhuwa lianje shilinyoola obwiyangu mwinywe ta. 38Emboolanga akeenako aka ndaluutsi halala nende Papa; neenyu mwesi mukholanga akeenako aka mwahuliile khuseenywe.
Setani niye seenywe
39Nibakalusia nibamusunjila mbu Seefwe niye Aburahamu. Yesu nabasunjila mbu Nimuba nimuli abaana baAburahamu, khole emilimo chiaAburahamu. 40Ne bulaano mukhaaba okhunzira isie, omundu oumubooleele akatoto, aka ndahulila okhurula khuNyasaye; Aburahamu shiyakhola ario ta. 41Inywe mukholanga emilimo chiaseenywe. Nibamusunjila bari Ifwe shikhwayeebulwa mubuheyi ta; khuli nende Seefwe mulala, niye Nyasaye. 42Yesu nabasunjila ari Nyasaye alaba nali Seenywe, khane mwakha'heela isie; shichila ndarula khuNyasaye ninzitsa; okhuba kata shindayeetsa khubwanje ta, habula ye yaruma. 43Mbushiina nimuratiila khushisina shiokhuboola khwanje ta? Mbula, shichila shimuhulilanga likhuwa lianje ta. 44Inywe muli baseenywe Setani, nobwikombi bwaseenywe nibwo obwa mwenyanga okhukhola. Ye yalinji omwiri okhurula khukhuchaaka, narasinjila mubwatoto ta, shichila obwatoto bubula muye. Olwa aboola obubeeyi, aboola khukeke omwene; okhuba niye omubeeyi, khandi nomwibusi wabwo. 45Nebutswa okhuba emboolanga obwatoto, shimusuubilanga ta. 46Niwina khwinywe ouhula mushiina mbu endi omwonooni? Nimba nimboola obwatoto, mbushiina nimurasuubila ta? 47Ouli waNyasaye ahulilanga amakhuwa kaNyasaye; ne niko akachila nimurakahulilanga ta, mbu shimuli baNyasaye tawe.
Yesu nende Aburahamu
48AbaYahudi nabo nibakalusia nibamusunjila bari Shikhuboola habwene mbu oli omuSamaria, khandi oli nelidimoni? 49Yesu nakalusia ari Isie, lidimoni shilili mwisie ta; nebutswa isie eheelesinjia Papa oluyali, ne inywe mufwolanga oluyali lwanje. 50Nasi shikhaabanga oluyali lwanje omwene ta; aliho oukhaabanga nende okhuyaasia. 51Toto mwene, emusunjila mbu omundu naba nahulila likhuwa lianje, shialalolakhwo khukhufwa tawe. 52AbaYahudi abo nibamusunjila bari Bulaano khumanyile shinga olwa oli nende lidimoni. Aburahamu yafwa, nende abanabii; nawe oboola mbu Omundu naba nahulila likhuwa lianje, shialakoonyelelakhwo khukhufwa ta. 53Iwe oshila kuuka weefwe Aburahamu, owafwa, noho? Khandi abanabii nabo bafwa; wikhola wina? 54Yesu nakalusia mbu Nimba nindiheelesia oluyali, kho oluyali lwanje nibutswa; Papa niye oumbeelesia oluyali; owa neenyu muboolangakhwo mbu niye Nyasaye weenywe; 55khane shimumumanyile ta; nasi ndamumanya; ne kata nimba ningaana mbu shindamumanya tawe, ndakhaba omubeeyi shingana inywe; nebutswa ndamumanya, khandi embulilanga likhuwalie. 56Kuuka weenywe Aburahamu yeekhoyela okhulola induukho yanje; nachilola, nasangaala. 57Mana abaYahudi nibamusunjila bari Iwe oshili okhuula khumiyika amakhumi karaano; ne wamulola Aburahamu? 58Yesu nababoolela ari Toto mwene, emusunjila mbu Olwa Aburahamu yali nashili okhubaho, ISIE NISIE. 59Kho nibatoola amachina okhumulasa; ne Yesu niyeebisa, narula muhekalu.
ទើបបានជ្រើសរើសហើយ៖
Yohana 8: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
