Yohana 5
5
Omundu yahonilibwa heetiba
1Olunyuma lwamakhuwa ako lisabolindi liabaYahudi lialiho; Yesu natikulukha natsia eYerusalemu.
2Ne ebweneyo eYerusalemu, ahambi neshilibwa shiamakondi, liliho litiba elilangwa muluHeburania mbu Betsezatsa, eliali nende eshitsafu shiebirookoola biraano. 3Ne mubwenomwo omukanda kwabandu kwakonangamwo, abalwale, ababofu, abalema, nabamakara, [nibalindiililanga okhwirunda khwamatsi; 4shichila malaika wOmwami yali niyeekhanga mwitiba khunduukho tsindi, natubuula amatsi; mana ouba naranjilila okhwinjilamwo inyuma wokhutubuukha khwamatsi, yahonanga obulwale bwosi obwali nibumutiilile.] 5Ne yaliho omundu undi owalinji nobuteshele emiyika amakhumi kataru namunaane. 6Olwa Yesu yamulola nakonile, namanya shinga olwa yalinjiho ario oluhoono, yamureeba ari Wenya okhukholwa omulamba? 7Omulwale namukalusia mbu Omwami, shindikhwo nende omundu ounzinjisia mwitiba olwa amatsi kaba nikakhatubuukha ta; ne olwa emba ninziitsanga oundi yaranjililanga okhwikhamwo. 8Yesu namusunjila ari Buukha wituushe licheelalio, ochende. 9Habwenaho omusaatsa oyo nahonibwa, niyeetuukha licheelalie, nachenda.
Ne inyanga eyo yali eyaSabato. 10Kho abaYahudi nibamusunjila oyo owali nahoniibwe bari Yino niSabato, ne nomusilo iwe okhwituukha licheelalio. 11Naye nabakalusia ari Omwenoyo oumboniye, neniye oumbooleele mbu Wituushe licheelalio, ochende. 12Nibamureeba bari Omusaatsa tsana oukhubooleele mbu Wituushe, ochende, niwina? 13Nebutswa owahonibwa oyo shiyamumanya mbu niwina ta; okhuba Yesu yali narulileyo, khulwa omukanda omukhongo okwali habwenaho. 14Olunyumakhwo Yesu yamunyoola nali muhekalu, namusunjila ari Lola, omalile okhuhonibwa; oroonoona khandi ta, likhuwa libii okhushila liakhakhukwila. 15Omusaatsa oyo natsia, naboolela abaYahudi mbu niye Yesu oumuhoniye. 16Nilio eliachila abaYahudi nibachaaka okhumusandia Yesu, shichila yakholanga amakhuwa ako khuSabato. 17Ne Yesu nabakalusia ari Papa akholanga emilimo kata okhuula bulaano, nasi siesi ekholanga. 18Niko akachila abaYahudi nibakhaaba okhushila okhumwira; shikhuli okhuba yoonoonia Sabato butswa ta, habula shichila yalanga Nyasaye mbu niSamwana, niyeehelania ario nende Nyasaye.
Obunyali bwaYesu, Omwana waNyasaye
19Kho Yesu nakalusia, nabasunjila ari Toto mwene, emusunjila mbu Omwana shianyala okhukhola likhuwa liosi khululwe ta, habula akeenako aka alola Samwana nakhola; okhuba amakhuwa kosi aka Samwana akhola, niko aka Omwana yesi akholanga ario. 20Okhuba Samwana aheelanga Omwana, namumanyia kosi aka omwene akholanga; ne alamumanyia emilimo echishila chino, mbu mana muchenye. 21Okhuba shinga Samwana olwa abuusinjia abafu nabalamusia, nindio Omwana yesi alamusinjia aba achama okhulamusia. 22Okhuba kata Samwana shiayaasinjia omundu yesi eshiina ta, ne amuheele Omwana jobuyaasii bwosi; 23mbu mana bosi baheelesie Omwana oluyali, shinga olwa bamuheelesinjia Samwana oluyali. Ouraheelesinjia Omwana oluyali ta, shiamuheelesinjia Samwana owamuruma oluyali tawe. 24Toto mwene, emusunjila mbu ouhulila likhuwa lianje, nasuubilila omwenoyo owaruma, ali nobulamu bwobumeli, ne shiyeenjila mubuyaasibwi ta, nebutswa amalile okhubira okhurula mukhufwa okhwinjila mubulamu.
25Toto mwene, emusunjila mbu eshise shiitsa, kata bulaano shiulile, olwa abafu balahulila omwoyo kwOmwana waNyasaye; nabo abakuhulila balaba nobulamu. 26Okhuba shinga Samwana olwa ali nobulamu mumwene, nindio yamunyalila Omwana naye okhuba nobulamu mumwene; 27khandi yamuheelesia obunyali okhukhalaka ebiina, shichila niye Omwana wOmundu. 28Murachenyela kano ta; okhuba eshise shiitsanga olwa bosi abali mubilindwa balahulila omwoyokwe, 29nibarulamwo; abo abakholanga obulayi balarulila obulamushi bwobulamu; nabo abakholanga obubii balarulila obulamushi bwobukhalakwi.
Abarumbula akobuloli khukaYesu
30Isie khubwanje shinyala okhukhola likhuwa liosi ta; shinga olwa embulilanga nilwo olwa ekhalakanga endio; obukhalachi bwanje nabwo nobulunji; shichila shikhaabanga akokhwenya khwanje omwene ta, habula akokhwenya khwa oyo owaruma. 31Nimba nindirumbulila omwene akobuloli, oburumbusi bwanje shibuli obwatoto ta. 32Oundi niye ourumbulila akobuloli; nasi emanyile mbu oburumbusi obwa arumbula khwisie nobwatoto. 33Mwarumile abandu ewaYohana, naye warumbuule akobuloli khubwatoto. 34Ne oburumbusi obwa efuchiilila isie shiburula khubandu ta; nebutswa emboola amakhuwa kano mbu muhonibwe. 35Ye yali itaha eyo eyakhanga niyilangaala; neenyu mwafuchiilila okhwikhoyela obulafubwe tsindaalokhwo. 36Nebutswa oburumbusi obwa endi ninabwo bushila obwaYohana; okhuba emilimo echia Papa yambeele mbu emalilisie, emilimo chiene echia ekholanga, echienechio chirumbulilanga, mbu Pape yaruma. 37Naye Papa owaruma, ye yarumbuule akobuloli khwisie. Inywe shimwahulilakhwo omwoyokwe tsindaalo tsiosi, kata okhulola likondolie ta. 38Kata likhuwalie shimuli ninalio nilimenya mwinywe, okhuba shimumusuubililanga omwenoyo owa yaruma tawe. 39Murunilisinjia mumahandiiko, shichila mukaalanga mbu muli nobulamu bwobumeli muko; mbula, niko akarumbulilanga akobuloli; 40nebutswa mulobanga okhunzitsila mbu mube nobulamu. 41Isie shifuchiililanga oluyali olurula khubandu ta. 42Ne emumanyile, shinga olwa mubula nobuheeli bwaNyasaye mwinywe. 43Ndeetsa muliira liaPapa, neenyu nimuranzinjisia ta; oundi naba niyeetsa muliira lilie omwene, omwenoyo mwakhamufuchiilila. 44Munyala murie okhusuubila, inywe abafuchiilila oluyali olurula khubashieenywe, ne nimurakhaaba oluyali olurula khuNyasaye ouli mulala yenyene ta? 45Murakaala mbu ndalamwinjilila itookho ewaPapa ta; aliho oumwinjilila, niye Musa, owa mwachoomiakhwo obunaayi bweenywe. 46Okhuba nimuba nimwakhasuubiile Musa, mwakhasuubiile isie; shichila yahandiika khukanje. 47Ne nimuba nimurasuubila amahandiiko keke ta, mulasuubila murie amakhuwa kanje?
ទើបបានជ្រើសរើសហើយ៖
Yohana 5: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
