Genesis 9
9
Indakano yaNyasaye nende Noa
1Nyasaye naheelesia Noa nende abaanabe ikhabi, nababoolela ari Mwibulane nimwinjiha, nimwitsula mushialo. 2Buli shilamu shiomushibala, khandi buli linyonyi eliokhwikulu, bilamuriitsanga inywe nibimutechelela; halala nende biosi ebiselasela khushibala, nende tsinyeeni tsiosi etsiomunyanza, bihaanilwe mumukhono kweenywe. 3Buli shindu eshichenda eshili mwoyo shilabeetsanga eshiokhulia shieenywe; shinga olwa ndamuheelesia emiani chiamasaafu, nolwa emuheelesiye biosi. 4Ne inyama niyishili nende obulamu bwayo, niko amalasile kayo, muraliitsangakhwo tawe. 5Toto mwene, ndalabanzanga amabanga keenywe, niko amabanga kobulamu bweenywe; mumukhono kwabuli solo ndalakabanzanga, khandi mumukhono kwomundu, nikwo omukhono kwomwana wabwe buli mundi, ndalabanzanga obulamu bwomundu. 6Ouraatsinjia amabanga komundu, naye akeke amabanga kalaraatsibwa nende omundu; shichila khwikondo liaNyasaye nilio elia yalonjelakhwo abandu. 7Neenyu, mwibulane nimwinjiha; mwitsulenje mushialo, nimwinjihamwo.
8Nyasaye naboolela Noa halala nende abaanabe ari 9Nasi, lole, esinjisia indakano yanje nineenywe, khandi nende olwibulo Iweenywe inyuma weenywe; 10khandi nende buli shilamu eshia muli ninashio, amanyonyi, nende tsisolo, nende buli shili mwoyo eshiomushibala halala nineenywe; khubiosi ebirula musafina, kata buli shilamu eshiomushibala. 11Nasi ndalasinjisia indakano yanje nineenywe; kata ebili mwoyo biosi shibilimululwa nende amatsi akomuyembo khandi ta; kata shikulibakhwo omuyemoo okhumulula eshibala khandi tawe. 12Nyasaye naboola ari Shino neshilolelo shieindakano eya ekhola hakari wanje nineenywe nende shia eshili mwoyo eshia muli ninashio, khulwa tsinzibulo tsiebisoni nebisoni; 13mbu ndareele olulindi lwanje mulucheka, nalwo lulabeetsanga eshilolelo shieindakano nakari wanje nende eshialo. 14Kho kalabeetsanga kari nanwa, olwa endeera olucheka ikulu weshialo, mbu olulindi Iwenolwo lulalolekhanga mulucheka, 15nasi ndaleetsulila indakano yanje eyili hakari wanje nineenywe nende shia eshili mwoyo khubili nomubili biosi; kata amatsi ako shikalaba omuyembo okwakhamulula ebili mwoyo biosi khandi tawe. 16OIulindi nalwo lulabeetsangaho mulucheka; nasi ndalaluhenganga, mbu enzitsulile indakano eyiralihwaho ta, eyiliho hakari waNyasaye nende shia eshilamu khubili nomubili biosi ebili khushialo. 17Nyasaye namusunjila Noa ari Shino nishio eshilolelo shieindakano eya ndasinjisiye hakari wanje nende ebili mwoyo biosi ebili khushibala.
Noa nende abaanabe
18Abaana baNoa abarula musafina mbabano, mbu Shemu, nende Hamu, nende Yafetsi; Hamu naye niye samwana Kanaani. 19Bano bataru nibo abaana baNoa; ne khubano abandu basalaana khushibala.
20Noa naye yachaaka okhuba omulimi, naraaka omukunda kwemitsabibu; 21kho nanywakhwo khudivai, nameela; mana naba eshihechenye mwiheemalie. 22Naye Hamu, samwana Kanaani, nalola eshihechenye shiasamwana, nababoolela abaana babwe babili nibali elwanyi. 23Shemu nende Yafetsi nibabukula ingubo nibachira khumabeka kabwe bombi, nibatsiila mafutara, nibafuunikha eshihechenye shiasaabwe; ne bali nibamufutariile, nibaralola eshihechenye shiasaabwe ta. 24Mana Noa nalaba tsimoni mukhumeelakhwe, namanya aka omwanawe omushe abeele namukholeele, 25nasunga ari
Kanaani ali mushilaamo shiobubii;
alaba omutiiti mubakholi khubaana babwe.
26Khandi ari
OMWAMI yeetsoomibwe, niye Nyasaye waShemu;
Kanaani naye abe omukholiwe.
27Nyasaye amubambusie Yafetsi,
amenye mumaheema kaShemu;
Kanaani naye abe omukholiwe.
28Kho inyuma womuyembo okwo Noa yayindila emiyika ebikhumi bitaru nende amakhumi karaano. 29Netsindaalo tsiosi tsiaNoa tsiahela emiyika ebikhumi shienda nende amakhumi karaano; mana nafwa.
ទើបបានជ្រើសរើសហើយ៖
Genesis 9: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975