Genesis 12
12
Omulango kwaNyasaye khuAburamu
1Ne OMWAMI yali niyamusunjila Aburamu ari Rula mushialo shieenywe, khandi mubaluyiabo, khandi munzu yeenywe, otsie mushialo eshia ekhumanyia; 2nasi ekhukhole iwe obe lihanga likali, nikhuheelesia ikhabi, nikhulunduyia eliiralio; nawe oleelenje ikhabi; 3khandi ndalabaheelesinjia ikhabi abeenabo abakhusabila iwe ikhabi; ne omwenoyo oukhufwola, nasi ndalamurumbulilakhwo mbu ali mushilaamo shiobubii, ne mwiwe nimwo omwa abebilibwa biosi bieshialo balanyoolelangamwo ikhabi.
4Kho Aburamu narula, shinga olwa OMWAMI yali niyamuboolela; natsia halala nende Loti; ne Aburamu yali owemiyika amakhumi musaafu nende chiraano olwa yarula eHarani. 5Aburamu nabukula Sarai omukhasiwe, nende Loti omwana womwana wabwe, nende emiandu chiabwe chiosi echia bali nibanyoolile, nende abandu abali nibeemeetile khubo eHarani, nibarula okhutsia mushibala shiaKanaani; nibamala niboola mushibala shiaKanaani. 6Kho Aburamu yabira mushialo niyoola habundu ahalangwa mbu Shekhemu, khumuruba kweMore. AbaKanaani nibo abalinjimwo mushialo mundaalo etsio. 7Mana OMWAMI namuloleshela Aburamu naboola mbu Ndiliheelesia olwibulolwo eshibala shino; naye niyoombashilayo OMWAMI owali namulolesheele, eshimalilo shiemisango. 8Nahuyaho natsia niyoola khushikulu khulubeka Iwebukwe noli eBeteli, nakhoma liheemalie, Beteli niyili elubeka lwamumbo nende Ai elubeka Iwebukwe; nahabwenaho niyoombashila OMWAMI eshimalilo shiemisango, niyeekongoyela khuliira liOMWAMI. 9Mana Aburamu yachenda, natsiililila imbeli khulubeka IweNegebu.
Aburamu muMisiri
10Ne yaliho inzala mushibala shieneshio Aburamu nakholomokha natsia eMisiri okhumenyakhwoyo; shichila inzala yaliho ingali mushibala. 11Ne olwa yali nali ahambi okhwinjila eMisiri, yamusunjila Sarai omukhasiwe mbu Lola, emanyile shinga olwa oli omukhasi owelikondo lilayi; 12kho olwa abaMisiri balakhulola, balaboola mbu Uno nomukhasiwe; kho balanzira isie, ne iwe balakhulekha. 13Kho chama osunje shinga olwa oli mbootswa; mbu mana embe bulayi khululwo, khandi mbu nambe mwoyo khululwo. 14Ne olwa Aburamu yali niyeenjiile eMisiri, abaMisiri bamulola omukhasi shinga olwa yali owelikondo lilayi muno. 15Abakhulundu baFarao nibamulola, nibamwitsoomilia Farao; kho omukhasi nayiilwa munzu yaFarao. 16Naye namukholela Aburamu amalayi khululwe; naye naheebwa amakondi, nende tsing'ombe, nende tsisishili tsisaatsa, nende abakholi beshisaatsa nende abeshikhasi, nende tsisishili tsikhasi, nende tsingamia.
17Ne OMWAMI yamuupia Farao khushibii eshikhongo, halala nende abomunzuye bosi, khulwa Sarai omukhasi waAburamu. 18Farao namulanga Aburamu, nasunga ari Ukholeele likhuwa shiina lino? Mbushiina noramboolela mbu nomukhasiwo? 19Mbushiina noboola mbu Nomukhaana weefwe, kho nimubukula abe omukhasi wanje? Kho bulaano omukhasiwo ngwoyo; mubukule otsie ewa otsia. 20Farao nalaka abandube khululwe; nibamukooba, nende omukhasiwe, nende biosi ebia yali ninabio.
ទើបបានជ្រើសរើសហើយ៖
Genesis 12: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975