Genesis 13
13
Aburamu naLoti nibaahukhana
1Mana Aburamu natikulukha okhurula eMisiri, ye, nende omukhasiwe, nende biosi ebia yali ninabio, nende Loti yesi, nibatsia mushialo shieNegebu. 2Ne Aburamu yali omuyinda muno wemiruko nende ifeetsa nende itsahaabu. 3Naye natsiililila muluchendo okhurula mushialo shieNegebu niyoola eBeteli, habundu aha liheemalie liali olwambeli, hakari weBeteli nende Ai; 4okhuula hashimalilo shiemisango eshia yali niyoombakhayo olwambeli, aha shiali; nahabwenaho Aburamu niyeekayakaya khuliira liOMWAMI. 5Naye Loti, owali nachendanga nende Aburamu, yesi yali nende ebiayo, nende tsing'ombe, nende amaheema. 6Ne eshialo eshio shishiabahela khulwa okhumenya halala ta, okhuba emiandu chiabwe chiali eminji, okhuula olwa bakhaywa okhumenya halala. 7Ne obusoolo bwaliho hakari wabaayi bemiruko chiaAburamu nende abaayi bemiruko chiaLoti; ne abaKanaani nende abaPerizi bali nibamenya mushialo mundaalo tsienetsio.
8Kho Aburamu nasunjila Loti ari Ekhusaaya mbu obusoolo buleshe okhubaho hakari wanje ninawe, khandi nende hakari wabaayi banje nende abaayi bobo; okhuba oli omwana wanje. 9Eshibala shino shiosi shishiliho imbeliwo? Chama khwahukhane ninawe; iwe noba notsia khumukhono mukhasi, nasi enzie khumusaatsa; nohomba iwe notsia khumukhono musaatsa, nasi enzie khumukhasi. 10Mana Loti nachinguula tsimonitsie narangaala Omuhololookhwe kwosi kwaYorodani, shinga olwa kwanyira po khulwa amatsi hosi hosi, OMWAMI olwa yali nashili okhumulula Sodomu nende Gomora; shiali shinga omukunda kwOMWAMI, khandi shinga eshibala shiaMisiri, notsiitsanga eZoari. 11Kho Loti niyeelobolela omwene Omuhololookhwe kwosi kwaYorodani; mana Loti nahuya natsia enabukwe; nibaahukhana abeene bonyene. 12Aburamu namenya mushialo shiaKanaani, ne Loti namenya mumataala komuhololookhwe, nasitinjia liheemalie okhukalushila eSodomu. 13Ne abandu baSodomu bali abamayaanu khandi aboonooni imbeli w okhushila muno.
14OMWAMI naye namuboolela Aburamu, olwa Loti yali namalile okhwahukhana ninaye, ari Kho bulaano, chinguula tsimonitsio, habundu yaho aha oli, ohenje elubeka lwenotsi, nende esautsi, ebukwe, nende mumbo; 15okhuba eshibala shiosi eshia olola, eKhuheelesia, iwe nende olwibulolwo okhuula khubisoni nebisoni. 16Ne ndalakhola olwibulolwo lube shinga olufu olwokhushialo; khane omundu naba nanyala okhubasia olufu lweshialo, kho olwibulolwo nalwo lulibasibwa. 17Buukha, olambuule eshialo oburambi bwashio nende obuchiikha bwashio; okhuba ekhuheelesia iwe eshialo shino. 18Mana Aburamu yasitia liheemalie natsia namenya ahambi nende emiruba chieMamure, echili muHeberoni, namuumbashilayo OMWAMI eshimalilo shiemisango ebweneyo.
ទើបបានជ្រើសរើសហើយ៖
Genesis 13: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975