Umak 13
13
Agyeb-ale Ushọm Unim le bitaa ati umbee-likel
(Mat 24:1-2; Luk 21:5-6)
1Nya ana Ujeso a maa ndu gbe le ha he Ushọm Unim, undi-utung uma ken a shi he ungwu le, “Nde, Itisha! Akọ angi be tye ushu angwun kikekaa! Nde ishọm igyang na i ngbeb kunung!”
2Ujeso a de-e le, “Wo nde ishọm ikandi anyin a? Ki yi le kukọ nyin i nyin ahwu ku be ngyọ pwọm ha undema ye. A ba gyeb wa he itang puu.”
3Ujeso a ma yi kwu he ukwel angwu be ko le Olif, u nda ashi gya he Ushọm Unim. He kunyọng kumen ana Ipita le Ujems le Ujọn le Andru be le nyia bii he kiwọm he kundyel. 4Be bii le, “De li kunyọng ahwu biwọm abin bi be shi. Wo mbee de li kiwọm ashi ki be shi tyung li le kunyọng ahwu biwọm abin bi be fe sho ku fel.”
5Ujeso a de be le, “Ma baa teng undi u lam amen. 6Bendi gbam be ba ba he lizen ligi, da le be yi Ujeso Kristi a, he be fe bendi gbam umbeb. 7Ma ba gyo bekye abe kpee-kpee ha amen, ma gyo gbe le abe kigbe-kigbe. Ha he kunyọng kumen ana, ma shel ye. Ki yi kpe-kpe le abin bi shi, ukpọ umbee-likel igye anyin a wa fel ye. 8Abọng-abọng a ba ndo ha bende, lishi-lishi li be ndo ha bende. Isun i ba kwuo mbee bipi, itung i be ndo bendi kaang. Abin puu bi ba kwa kanwaa kingie nya ana ukpi-kikwu uzwaa a.
9“Men ma kwu le kakang, be ba kwa amen la ka bekandi kubọng, bendi be ba kwa amen la ka bekandi he be be maa amen ushe. Be ba kpam amen ikwun he ishọm Unim angi be kwu awu. He kuhwo kugi be ba la ko amen ushe ha bifaa-ukwob le besu he ma naa ushada ugi. 10Ki yi kpe-kpe le bendi be ba bun kisọm kinunung da bendi he abọng puu. 11He kunyọng ahwu be kwu amen gye le men he kipi be maa ushe, ma waa ufung gbe le ashi ma le kọng ye, Ukatia Kunyọng na u be de men ashi ma kọng.
12“Bendi be fel ba kung bebwaa-ndabel ka le be gwu, betyam bebwaa be be kung bebwaa-bel ke le be gwu, bebwaa be tem ba fa betya-bel le bendabel ye, be be kung abe ke le be gwu. 13Bendi puu be ba tel amen he kuhwo kugi. Ukpọ undi angwu a be ngyọ naa gen fe Unim le wu he umbee-likel u ba kwa le likpan kunyọng.”
14“Iti ma ba nda ukọng ubibi angwu u nim le abọng,#13:14 Udaniel 9:27; 11:31; 12:11 u ba kwa he kipi ashi hang a kwu ye. (Undi angwu u bo ashin, ki ndu nung he.) He kunyọng kumen ana bendi abe be yi he kubọng Ujudia be buu gye he ikwel kusi. 15Undi angwu u yi he ushọm kusi, u tem ban kunyọng le u shul gya he afee ushọm la kung biwọm bima ye. 16Undi angwu u yi he utia, u tem ban kunyọng gye he usha-ale le u la kung kihwọm kima ye. 17Ha he kunyọng kumen ana, ki ba kwa kibibi ka bengingye azam le abe be yi le bebwaa he abwo. 18Ma kọng ha Unim le kiwọm ashin ki be shi le kakwuo a ye. 19Kingie ashi bendi be be kpe ha he kunyọng kumen ana, ki ba dyam hwa kingie kiyang-yang ashi undi a kpe, kung le he kunyọng ahwu Unim a shi igye anyin. Ki tem ba kwa le kingie kisuso na ye.
20“Ada a shi ugim ndọ le u die le ati amen ana gem he kuhwo bendi bema abe a waa kung a. U die le ati kingie ana gem ye, hang undi ken ọ u ba kpan ye. 21Ha he kunyọng kumen ana gbe undi uyang-yang a be de men le, ‘Ma nde, Ukristi u yi nyin,’ ususo u de men le, ‘Ma nde-e u yi ha ana,’ ma bọng ye. 22Bendi gbam abe be ko kuhwobel le Ukristi le bitye-ugie iman be ba sha bitaa le bikwole-kuhwo gbe ki yi abe pie-pie be be lam bendi abe Unim a waa kung. 23Ukpọ ma ngye na ma kam kuhwo-men. Mi de men biwọm abin puu ndọ he itang ma.”
24“Kung le he liti angi bingie bimen ana bi mbee,
“ ‘libwee li ba gya kifufeb,
kufel ku tem be taa ye.
25Ikpen i ba mbwa le he kusi ba he itang.
Biwọm puu abi bi yi he lifung-atabe bi ba nyung he abwo.#13:25 Azaya 13:10; 34:4’
26“Bendi be ba nda-m mi Unwaa undi-gye, mi ba le he kusi le ikeb ikandi le ifem. 27Mi ba sọm idengel igi gya mbee igye puu la gbọng bendi abe Unim a waa kung ba kpee he kiteng ken.”
28“Ki yi le kiwọm ashi mi kee le mi hwọ amen gba le Ufig! He kunyọng ahwu ibubu ima i ndu hwaa ashia, ma ngya le kifọng ki ndu shul. 29Kitaa kimen na he kunyọng ahwu ma be nde biwọm bimen i bi shi, ma ngye le kunyọng ahwu mi Unwaa undi-gye, mi be ku fel kpee-kpee he ungwu-lishi. 30Kigyang na mi de men i, biwọm abin puu bi ba sha ma ukpọng ugbe bendi abe be yi he igye kunyin i, u ha be hwo mbee. 31Lifung-atabe le igye bi ba mbee. Ukpọ igie igi ife i ha ndu mbee ye, i kwa ngyọ igye kpam.”
Undi a ngye liti le kunyọng ye
(Mat 24:36-44)
32“Ki yi le undi angwu a ngye liti ọ, nyọng u ngye kunyọng ahwu biwọm abin bi be shi ye. Idengel angi he lifung-atabe ọ, mi Unwaa ọ, li ngye ye. Atyagi ufe-ufe na a ngye liti limen ana. 33Ma nde le ma kam kuhwo-men, ma kwu le kakang le gbe ma ngye kunyọng ahwu biwọm abin bi be shi ye. 34Ki ba kwa na ungikye angwu a kam le u gya litan. A kung aki ke ibọyi ima le undi-undi u shi ama. A kung de undi angwu u kang usha-ale le u kwu le kakang.
35“Men ma kwu le kakang likọye ma ngye kunyọng ahwu mi ugyang usha-ale, mi be be ye. Pisoye mi ba ba le likwu-lukwu a, pisoye le kididyan kusu a, pisoye he ashi liti a, pisoye le-iti a. 36Ma baa teng mi ba imbul-imbul nda amen ma sha ashi mi kee a ye. 37Ashi mi de men i, mi de bendi puu a le ma kwu le kakang.”
ទើបបានជ្រើសរើសហើយ៖
Umak 13: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.