Umak 14
14
Be wu Ujeso behwu he Ubetani
(Mat 26:1-5; Luk 22:1-2; Jọn 11:45-53)
1Ki teng ati afee a he be shi kipam ashi be ko le kipam agbele-gyọng, ashi be shi zi ibred angi i mbwee ye. Bekandi bishang Unim le bitisha Iten be maa kee kukwo ahwu be kwu Ujeso he kundyel gwu. 2Be de le be shi ashi he kunyọng kipam ye, teng bendi be pel he ahe ndo ha abe.
3Ujeso a ma yi he Ubetani he ushọm Usaimọn angwu akpaa a ma tang he. He kunyọng ahwu a maa zi lizi, ungingye ususo abe le udim behwu abe be kaa kate kaang. Be kung ashia angi be ko le unad agyang angyel a shi behwu bemen abe be nung nyin ana. Ungingye angwuna a ma kung udim umen ana bun kityung, kung behwu wu Ujeso he lishi.
4Bendi besuso be ma fel he ingyo, be fel bii bende le kibang ki yi atan-lengi angwu u ban behwu abena kitaa ana? 5Hang be kung abe ndyeb zi gbe-gyọng igaa ikwudi ikie kung ke bendi-likaa. Be shwan le he.
6Ujeso a de be le, “Ma tyang ungingye angwun. Kibang a, ma ben he? A shi kiwọm kinunung a ke-m. 7Bendi-likaa be yi utung ha amen mbee kunyọng.#14:7 Iten lefee 15:11 He kunyọng ahwu ma kee, ma sha kinunung ha abe. Ukpọ mi ba kwa utung ha amen mbee kunyọng ye. 8Ungingye angwun a shi ashi u nya shi mbee. A wu-m behwu abe be nung nyin he u kam likwọm ligi ndọ iti-kishi a. 9Kigyang-kigyang mi de men, he kiteng kiyang-yang mbee igye puu be be bun kisọm kinunung, be ba kọng gba le kinunung ashi a shi, he bendi be wel gbe le he.”
10Ujudas Iskariyọt angwu a ma yi he liwu bendi-utung Ujeso abe lihwo le be befee, a le hwaa le bekandi bishang Unim he u ndyeb Ujeso zi ha abe. 11Be fel le igọ he kunyọng ahwu be gyo ashi a de be. Be ke-e ukyeb le be ka he unde. Ujudas a maa fel kee kukwo ahwu u kwu Ujeso ke be.
Lizi umbee-likel
(Mat 26:17-25; Luk 22:7-14, 21-23; Jọn 13:21-30)
12He ukpi-kikwu liti kipam ashi be zi ibred angi i mbwee ye, be maa gwa inwaa itia kipam agbele-gyọng. He liti limen ana bendi-utung Ujeso be bii he le, “He kung wo kee le li kwu zi kipam agbele-gyọng?”
13Ujeso a ko bendi-utung bema, bendi befee, he u sọm abe. A de be le be gye he lifung-ushu. Be la nda ungikye ken angwu a so kiki umbwo. 14Be pwọm he gye he usha-ale angwu u gye. Be le de ugyang usha-ale le, “Itisha a bii le: ushọm angwu kung nyin ufe le bendi-utung bema be be kwu shi kipam agbele-gyọng? 15Nyin u tyung amen kipo ashi ki dyam he ushọm kusi ashi be kam biwọm ndọ ha. Ma shi lizi ndọ ha nyọng li.”
16Be bo gye he lifung-ushu, le nde biwọm puu nya ana Ujeso a de be. Be shi lizi angi be zi he kipam agbele-gyọng.
17Likwu-lukwu li ma gyeb, Ujeso a be le bendi-utung bema abe lihwo le be befee ha. 18He kunyọng ahwu be maa zi lizi, Ujeso a de be le, “Mi de men likọng likandi, kigyang-kigyang, undi ken le he liwu limen a kam le u ndu ndyeb mi za. Undi umen ana u za lizi utung ha ami nyọng ki yi i.”
19Be fel le kimbwee. Undi-undi u fel bii he le, “Ki nya yi-m mi a?”
20A fan le, “Undi umen u yi nyin liwu limen bendi lihwo le be befee i. Ufe na u tib ibred ima he unwaa-ndọ utung-utung ha ami. 21Mi Unwaa undi-gye ufe a, mi ba hwa na be fee gbe le mi he kushia Unim. Ukpọ ki ba kwa kibibi ka undi angwu a ndyeb mi zi. Be hwan undi umen ana ye, hang ki yi ding.”
22Nya ana be maa zi lizi, Ujeso a kung ibred kwu he kubwo, a pee Unim. A kung ibred bun ibun-ibun kung ke bendi-utung bema. A de be le, “Ma kpe. Ashin ki yi inyia-hwo igi a.”
23A mbee kung ugba-ala kutyo kwu he kubwo, mbee pee Unim. A mbee kung ke be. Befe puu be kpe ngwo.
24Ujeso a de le, “Ashin ki yi anung agi, anung azu angi mi wu ke bendi gbam. 25Mi da amen kigyang a le mi tem ngwa udung agbe ukwan uvine angwun ye kpam la kwọm he liti angi mi be le ngwo angwu ufufe he kiteng kusu Unim.”
26He kunyọng ahwu be gyam kugyam pee Unim, be gbe gye he ukwel angwu be ko le Olif.
Ujeso a kọng ndọ le Ipita u ba swan he
27Ujeso a de bendi-utung bema bemen ana le, “Men puu ma ba paa he abwo tyang mi.” “Be ma fee he kushia Unim le,
“ ‘Unim u ba gwa ukang-itia,
ma itia i paa he abwo.’#14:27 Uzakariya 13:7
28Ukpọ kunyọng ahwu mi be wum le he lihwu, mi ba gya he Ugalili teng amen.”
29Ipita a fan he le, “Ma abe be teng puu be buu tyang-a ọ, mi ba tyang-a ye.”
30Ujeso a de-e le, “Mi da-a kigyang, kunyin kugyang i, ma ukpọng nyin kigia ukwuo ki ha ko kugbe kafee, wo swan kugbe kakie le wo ngye-m ye.”
31Ipita a kung fan he zam le, “Mi ha ndu swan le mi ngya a ye ye. Ma ki yi le lihwu ọ, mi hwa utung ha awo.” Bendema puu be kọng kitaa a ken.
Ugesemeni
(Mat 26:36-46; Luk 22:39-46)
32Be be he kiteng ashi be ko le Ugesemeni, Ujeso a de bendi-utung bema le be kwu nyin nyọng he, he u le kọng ha Unim. 33A kung Ipita le Ujems le Ujọn utung he ahe. Ufung a maa waa he, u fel tyang kunyọng ishu ken kafee. 34A kung de be le, “Kutọ ahwu ku yi-m he lityam ku dyam kpe ahwu le ku gwa-m. Ma kwu nyin kang.”
35A mbee die te he kushu zang, le tim anung he itang keb akọng-ale ha Unim le, gbe ki yi pie-pie u kpe kingie ashin ye. 36A de le, “Ada! Atya-tyan! Biwọm puu bi yi-a pie-pie, kung kingie ashin le ha ami. Ki shi na mi kee a ye, ukpọ ki shi na wo kee a.”
37Ujeso a tem le hwaa le bendi-utung bema, a nde be be mbwa kunde. A kung bii Ipita le, “Usaimọn, wo mbwa kunde a? Wo kwa ashinyọng he awa ken ọ mbee ye a?” 38A de be le, “Ma kwu le kakang, ma kọng ha Unim teng ma mbwa he ugil-ale. Kunyọng ku yi le kigyọ aki ashele, ukpọ agwo afe a hwee dyung-dyung.”
39A tem mbee le kọng ha Unim kitaa a ken. 40Nyọng a tem, a mbee le nde bendi-utung bema be mbee tem gbe he kunde. Atọng-shi abel a ma sho le kunde. Be tem ngye ashi be de-e ye.
41Ujeso a tem be kugbe ahwu lekie. A bii abe le, “Ma so he kunde ambwole le kunyọng ashan-ale a? Ma mbu ku kpe. Kunyọng ku fel ha ma. Ma nde, be kung imi Unwaa undi-gye, ke bendi-biban. 42Ma bo li gye. Ma nde, angwu a ndyeb mi zi ha abe a fel i.”
Be kwu Ujeso
(Mat 26:47-56; Luk 22:47-53; Jọn 18:3-12)
43Nya ana Ujeso a maa so-i kọng ashin, Ujudas angwu a ma yi he liwu bendi-utung bema abe lihwo le be befee a be. Bendi gbam be be utung he ahe le isukwagya le ikwan he abwo. Bekandi bishang Unim, le bitisha Iten le bekandi kubọng na be ma sọm abe.
44Undi angwu a ndyeb Ujeso zi ha abe, a ma ke be kitaa le ha. A de be le, “Undi angwu nyin mi gaa he le uko na ma kee, ma kwu-e gye le he, ma kang he.” 45Ujudas a be gbe le hwaa le Ujeso. A ko he le “Itisha ukandi,” u gaa he le uko. 46Be kung kwu Ujeso. 47Undi ken angwu a ma yi naa ha, a waa usukwagya le he kubọ kpi bọ kutyung ubọyi Usu bekandi bishang Unim.
48Ujeso a kung bii abe le, “Mi yi undi ukaa-ukaa a, ma be le ma kwa-m le isukwagya le ikwan he abwo a? 49Mi maa kwa utung ha amen he Ushọm Unim hwọ bendi mbee ati, ukpọ ma kwu-m ye. Ki yi kpe-kpe le ki shi nya ana be ma fee ndọ he kushia Unim le-iti.” 50Bendi-utung bema puu be ma paa he abwo tyang he.
51Ushọmate ususo angwu a ma shi kihwọm kifung kife-kife, a ma pwọm Ujeso. He kunyọng be kwu Ujeso, 52a buu gbe uten-libọng tyang kihwọm fe be he abwo.
Ujeso he kushu Isanhendrin
(Mat 26:57-68; Luk 22:54-55, 63-71; Jọn 18:13-14, 19-24)
53Bendi abena be kwu Ujeso gye le he he ushọm Usu bekandi bishang Unim. Bekandi bishang Unim le bekandi kubọng le bitisha Iten be ma yi sho ha. 54Ipita a maa fel tan pwọm Ujeso le he item kigbe-kigbe. A pwọm he le wu ha he usha-ale Usu bekandi bishang Unim ana. A ngyọ kwu he kudyan usha-ale utung ha bendi abe be kang usha-ale, u gwee kinde.
55Bekandi bishang Unim le bikem upib puu, be kee bendi abe be naa ushada fe Ujeso le a shi kiwọm ki ban he be be gwu-e. Be nde kiwọm ye. 56Be nde kiwọm ye likọye bendi gbam be ma naa ushada iman a fe-e, ukpọ biwọm abi be kọng bi yi igie ken ye.
57Bendi besuso be bo kinaa be uman fe Ujeso le, 58“Li gyo he le kutyung kutyan, a de le ufe u gyeb Ushọm Unim angwu bendi be tye nyin, he ati akie u tya ususo angwu undi na a tye-e ye.” 59Ma na ọ, biwọm abi befe ọ be ma kọng bi ma yi igie ken ye.
60Usu bekandi bishang Unim, a bo kinaa bii Ujeso le, “A shi bendi aben be kọng fa-a i, wo yi le ashi wo fan ye a?” 61Ujeso a kwu kpii, u fan ye.
Usu bekandi bishang Unim umen ana a mbee bii he le, “Wo yi Ukristi, Unwaa Unim ifem a?”
62Ujeso a fan le, “Mi a! Ma ba nda-m mi Unwaa undi-gye, kwa he kubwo lizen Unim angwu u yi le ikeb puu. Ma mbee ba nda-m he kunyọng ahwu mi tem be le he lifung-atabe be he bibu.”
63Usu bekandi bishang Unim ana a fel he ingyo shwa gie kuhwo-ma aliga. U kọng le, “Likọng li mbee, li tem kee ushada ye. 64Ma gyo na a kọng kibibi. Men ma gim le ana?”
Befe puu be de le a zi libi, a kpe agwu-ale. 65Bendi besuso be maa fel sho akung wa Ujeso. Be kung kihwọm bwọ he he ashi. Be tim he kishwia, de-e le, “tye ugie de li.” Bendi abe be kang kipi be keb he akpam-ale.
Ipita a swan Ujeso
(Mat 26:69-75; Luk 22:56-62; Jọn 18:15-18, 25-27)
66Nya ana Ipita a ma so kwu ha he kudyan usha-ale. Unwa-asul angwu u shi aki he usha-ale Usu bekandi bishang Unim, a be u gba. 67A nde Ipita u gwee kinde, a naa nde-e kpọ. A kung kọng le, “Wo ọ titi wo ma yi utung ha Ujeso angwu u be le he Unazaret.”
68Ipita a swan le a ngye Ujeso ye. Mi ngye kiwọm ashi unwa-asul angwun u kọng ọ ye. Ipita a bo le ha le naa he ungwu-likọng naa na, kigia ukwuo ki kung ko.
69Unwa-asul angwu u shi aki he usha-ale Usu bekandi bishang Unim a mbee nde Ipita. A kung de abe be yi naa ha le Ipita u yi undi-utung Ujeso a. 70Ipita a mbee swan.
He kanwaa kunyọng zang bendi abe be yi naa ha, be mbee de Ipita le, “Ki shi na ana wo yi undi-utung Ujeso a, likọye wo ọ titi wo ba le he Ugalili a.”
71Ipita a kpam abwo he itang tam behwu le, “Mi ngye angwu ma kọng ana ye.”
72Nya kukwo-kukwo kigia ukwuo ki kung ko kugbe ahwu lefee. Ipita a ma wel igie angi Ujeso a ma de-e le “Ma ukpọng kigia ukwuo ki ha ko kugbe kafee, nyin wo swan kugbe kakie le wo ngye-m ye.” Ipita a fel he kukye.
ទើបបានជ្រើសរើសហើយ៖
Umak 14: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.