Umak 12
12
Ityang gbe le bendi abe be nde gbe le utia
(Mat 21:33-46; Luk 20:9-19)
1Ujeso a ma bun ityang de be le, “Ungikye ususo a maa nam utia ivine, u kung ugbe kaa fe-e kel-kel, u tem kania he kipi be shọ agbe ikwan ana kung umbwo angi, u shi udye angwu bendi be kwu kang utia ugyang. A kung utia ana ke bendi le be nde gbe-e le he. A ha bo ndo litan gye he kubọng kususo. 2Kunyọng ku ma fel ahwu bendi be bung agbe ikwan, a sọm ubọyi uma hwaa le bendi abe be nde gbe-e le utia le u le kpe ukpo uma be ke-e. 3Bendi abena be kwu-e kpam, be ndo he tem abubwo. 4Ugyang utia a mbee sọm ubọyi ususo te. Bendi abena be kwu-e kpam nem, shi-e a fel ibia-ibia. 5A mbee sọm ufee ususo te. Be kwu-e gwu. Be shi ifee gbam kitaa ken, be kpam isuso, be gwu angi i teng.
6“Ki teng kagbung unwaama ufe-ufe angwu ki nyin he le he a. A ma gim le be ba ka unwaama ufe ife. He umbee-likel a kung sọm he hwaa le be.
7“Bendi abe be maa nde gbe-e le utia ana be de bende le, ‘Angwun na u be zi lishi, ma li gwu-e, ma utia angwun u fel utyan.’ 8Be kwu unwaama ana gwu ha he utia, be kung likwọm lima le tyang gye he igye.”
9Ujeso a ha kung bii abe le, “Ugyang utia u nya sha na a?” A tem le shi fan le, “U la gwa bendi abena, u tem kpe bendi besuso le be nde gbe-e le utia. 10Ityang angi be ma fee he kushia Unim le-iti i, ma wa bo angi ngye ye a? Be ma fee le:
“ ‘Kukọ ahwu bendi abe be tye ushọm be swan
kufe na ku tem fel kwu ushọm naa gen.
11Ada Unim na a shi ashin.
Ki kwu li he kuhwo kaang.’#12:11 Agyam 118:22, 23 ”
12Bekandi bishang Unim le bitisha Iten le bekandi kubọng be fel kee kukwo ahwu be kwu-e, likọye be ngye le Ujeso a bun ityang anyin gbe le befe a. Ukpọ be maa shel liwu bendi, be tyang he gbe le ha.
Atyele ukpanda kusu ke Usiza
(Mat 22:15-22; Luk 20:20-26)
13Be sọm Iferesis isuso le bendi Uherọd le be le kung Ujeso le he kusi he be be gyo le u mbwa le he lingbam a. 14Be be hwaa le he de-e le, “Itisha, li ngye le wo yi undi angwu u kọng kigyang a. Bendi puu be yi a kitaa ken. Wo maa anung gba le kiwọm ashi bendi be gim ye. Wo hwọ bendi kigyang gba le ashi Unim a kee le bendi be shi. Iten ityan i bọng le be tye ukpanda ke Usiza, usu ukandi angwu he Urom a, ha be tye ke-e ye? 15Li tye a, ha li tye ye?”
Ukpọ Ujeso a ngye beshu bebel. A kung de be le, “Kibang a, ma kung mi le he kusi? Ma be le ukwudi mi nde.” 16Be be le he. A kung bii abe le, “Lishi ayang le lizen ayang, be fee fe nyin?”
Be fan he le, “Usiza usu ukandi angwu he Urom a.”
17Ujeso a ha de be le, “ashi ki yi ashi Usiza, ma kung ke Usiza, ashi ki yi ashi Unim, ma kung ke Unim.”
Ki ma kwu abe he kuhwo kaang gbe le Ujeso.
Libee he kunyọng awum-ale le he lihwu
(Mat 22:23-33; Luk 20:27-40)
18Bendi Isadusis be bọng le undi u wum le he lihwu ye, be be hwaa le Ujeso le kibibi. 19“Itisha, Umosis a ma fee uten ndọ li le, ‘Gbe undi a hwo tyang ungye faale unwaa, unwaa-nam u kpeb kung ungye-uhwuu he ubu unwaa-nde angwu a hwo u nim ye.’ 20Ki ma yi le bengikye bedyọng-ifee abe be ma yi bebwaa-nam bende. Angwu gbel a kpeb ungye. A hwo tyang he faale unwaa. 21Angwu a pwọm le he a kpeb kung ungye-uhwuu ana. Ufe ọ a hwo tyang he faale unwaa. 22Ki shi fe angwu lekie le abe be teng nya kitaa ken. Puu ubel, bendi bedyọng-ifee, be kpeb ungingye umen ana, hwo tyang he faale unwaa. He umbee-likel angwu ungingye ọ a hwo. 23He kunyọng ahwu bendi puu be be wum le he lihwu, ungingye angwun u ba kwa ungye ayang a, gbe puu ubel, bendi bedyọng-ifee, be ma kpeb he?”
24Ujeso a fan abe le, “Ma mbeb, likọye ma ngye igie Unim ọ, nyọng ma ngye ikeb ima ọ ye. 25He kunyọng ahwu be be wum le he lihwu, be ba fel nya ana idengel Unim angi he lifung-atabe a. Bengikye be tem ba kpeb bengye ye, bengingye be tem ba gya abee ye. 26Ma bii mi gbe le awum-ale le he lihwu. Be fee he kushia Umosis, gbe le libeb angi li maa mọ kinde, angi Unim a ma kọng ha Umosis le ha afee. Ma wa bo ashi ye a? He kiteng kimen ana be fee le Unim a ma de Umosis le, ‘Mi yi Unim angwu Ebraham le Azik le Ujekọb a.’ #12:26 Ligye 3:6” 27Ujeso a gye kushu de le, “Unim u yi Unim bendi bewum, u shi Unim bendi abe bendi be de le be hwo, ukpọ be yi bewum he ashi ama a. Ugim umen u yi del-del ye.”
Ujeso a kọng gbe le Uten angwu a dyam hwo puu
(Mat 22:34-40; Luk 10:25-28)
28Undi ken le he liwu bitisha Iten a be gyo ashi be kọng. A gyo le Ujeso a fan Isadusis ngbeb-ngbeb. A ha bii Ujeso le uten angwu kung a dyam hwo puu?
29Ujeso a de-e le, “Uten angwun na a dyam hwo puu, ‘Bendi Izwel, ma gyo. Ada Unim ufe-ufe na u kee-kee yi Atya-tyan#12:29 Iten lefee 6:4. 30Ki nyin a le Ada Unim le lityam ligang puu, le kunyọng kugang puu, le ugim ugang puu, le ikeb igang puu.’#12:30 Iten lefee 6:5; 10:12; 30:6 31Uten angwun na a pwọm le he, ‘Ki nyin a le unde-gang na ki nyin a le kuhwo-gang.’#12:31 Iten ashang-ale 19:18 Ki yi le uten angwu a dyam hwo angi ifee i ye.”
32Ukandi angwu u hwọ bendi Iten a de Ujeso le, “Itisha, wo kọng ngbeb-ngbeb. Wo kọng kigyang a le Atya-tyan ufe-ufe na u yi Unim. Ki yi le Unim ususo pel he ahe ye. 33Ki yi le ki nyin undi le Unim le lityam lima puu, le ugim uma puu, le ikeb ima puu, ki nyin he le undema na ki nyin he le kuhwo-ma. Ki ngbeb le undi u ndọ Iten anyin hwo ashi le u be le kitaa kiwọm kiyang-yang be ting-shi kinde ke Unim, u shang he.”
34He kunyọng ahwu Ujeso a gyo le a fan he del-del, Ujeso a kung de-e le, “Wo yi kpee-kpee gwaa kiteng kusu Unim.” Kung le he kunyọng kumen ana bendi be maa fel shel na be mbee bii he bibibi.
Undi-likpan u yi unwaa ayang a?
(Mat 22:41-46; Luk 20:41-44)
35Nya ana Ujeso a maa hwọ bendi biwọm he Ushọm Unim, a bii abe le, “Kibang ki tan le shi bitisha Iten, be de le Ukristi u yi igia Udebid a? 36Udebid ugyang a kọng he ikeb Ukatia Kunyọng le,
“ ‘Unim a de Ada le,
“Be kwu ha ami kubwo lizen
kpam mi gbe shi bendi-linaa begang
be fel kikpel kidem ashi wo pwọm abee.” ’#12:36 Agyam 110:1
37Udebid ugyang a ko Ukristi le ‘Ada.’ Na ki nya shi nyọng Ukristi u tem fel unwaa ama a?”
Bendi gbam abe be ma sho ha be ma gyo Ujeso, ki nyin abe he lityam.
Kubwo ashwa-ale he kutyung gbe le bitisha Iten
38He kunyọng ahwu a maa hwọ abe biwọm, a de le “Ma baa kuhwo-men le ha bitisha Iten. Ki nyin abe le be shi agbada, tan he ishokwo lite he bendi be kọng le be le ife. 39Be kee bidem abi be ndọ bekandi bendi he ishọm Unim angi be kwu awu ọ, he bipam ọ. 40Be ngyo bengye-uhwuu, be kọng ha Unim gba kigbe he bendi be de le be yi bendi benunung a. Be ba kpa kingie hwa bendi abe be teng puu.”
Kuke ungye-uhwuu
(Luk 21:1-4)
41Ujeso a ma yi kwu gwaa ha kigbọ ashi be fe unde he Ushọm Unim. A nde na bendi be be le unde fe ha. Bendi-kingbeb gbam be fe unde ha kyoo. 42Ungye-uhwuu ken angwu a mbu likaa, a ha be le ideli ifee fe ha.
43Ujeso a ha ko bendi-utung bema be he kiteng ken, kung de be le, “Mi de men kigyang le, ungye-uhwuu angwu u yi likaa-likaa i, a ke hwo bendi abe be teng puu. 44Bendi abe be teng be gia igia be ke, ukpọ undi-likaa angwun a kung kiwọm ashi u yi le shi puu a be ke. A tem teng le ashi u ndyeb lizi zi ye.”
ទើបបានជ្រើសរើសហើយ៖
Umak 12: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.