Lúúkas 4
4
Yésus mápíányɛ́n yɔɔ́pítɛ́n
(Mat 4.1-11; Mál 1.12-13)
1Yésuse waatɔk é Sulutɛ́ŋ, pukaaka pú Emfúnukufúúmɛ kɛ́ɛ́yɛ́ kɔ́ ɔtɛ́m táásɛ lééŋ. Emfúnukufúúmɛ wanúŋun wɔ waayɔɔk nɛɛyɛ́ ɔ́ kiɔ́sɔ́kɔlíɔ. 2Metúk etín áandɛ́ Okóyikoyi, Sáátanɛ, píɔ́pitɔn wɔ́.
Metúk makáánɛ́ kitikit Yésuse tɛ ɛ́ɛ́ únya; Á mamaná, insaná yɛɛtikɛn wɔ. 3Okóyikoyi kɔk kɛ́ɛ́yɛ́ ɛ́ɛ́: «Índɛ anyɛ Muɔ́nɔ́ u Támbák, ɛlɛ́ á nitányi enie ɛ́ɛ́ níɛ́yi púkunya.» 4Yésuse woondinyi wɔ́ ɛ́ɛ́: «Mekélíe má Támbák ɔ́ɔ́kɔɔyɔ ɛ́ɛ́: Mɔɔnd tipá usɔ́tɔn yá na múkunya.» 5Okóyikoyi waayɔɔk nɛɛyɛ́ kɔɔ́mɔ kámaápá manyáŋ kányaŋ; ɔ́ mɔnɔ́ kisikɛl, weetíínyi wɔ́ pitɔŋ pí kúúsí kitikit. 6-7Wɔ́ kɛ́ɛyɛ́ ɛ́ɛ́: «Ɛmɛɛ́n pukaaka na punɛ́m pú pitɔŋ pikáánɛ́ kitikit á? Yeékuekenyi pí piim índɛ esinsukin tunúú;» á kiákí ɛ́ɛ́ iŋúɛ pámíndál maandá makáánɛ́ kitikit kí imbɔk. Inyɛ pékueki mɔ́ á mɔɔnd kitikit yɔɔyɔɔnɛ́ɛ. 8Yésuse woondinyi wɔ́ ɛ́ɛ́: «Mekélíe ma Támbák ɔ́ɔ́kɔɔyɔ ɛ́ɛ́: kúmési Ɔkɔ́n, Támbákɛ́ɛ waawɔ, wééŋényí ekeényíluke wɔ́.» 9Okóyikoyi wɔɔkɔ́l wɔ́ andíkɛ́k waayɔɔk nɛɛyɛ́ Yelúsalɛm; waamákat nɛɛyɛ́ kɔ́ ɔtíndíɔ ú insɛkɛ i kitamb kí Támbák, wɔ́ é Yésus ɛ́ɛ́: «Indɛ kémuémue anyi Muɔ́nɔ́ u Támbák, kilín; 10á kiákí ɛ́ɛ́ Mekélíe má Támbák ɔ́ɔ́kɔɔyɔ ɛ́ɛ́: Támbák kɛɛl é Peéŋele pɛ́nyɛɛ́ ɛ́ɛ́ pákukííka, 11Mekelíe áand kuɔyɔ ɛ́ɛ́: Peéŋele kɛkupínɛ́ɛ́kɛn ɛ́ɛ́ kikɔ́nd kíáwɔ tifɔndɔlɛt á nitányí.» 12Yésuse woondinyi wɔ́ ɛ́ɛ́: «Mekélíe ma Támbák ɔ́ɔ́kɔɔyɔ ɛ́ɛ́: Ɔtíɔ́kɔɔ́pítɛ́n Ɔkɔ́n, Támbákɛ́ɛ waawɔ.»
13Úmáaman kupíɔ́pitɔn Yésuse piáyí piim tɛ ɛ́ɛ́ wáámininɛ, Okóyikoyi waapíátɔn Yésuse; waayɔɔk é kuepétényí kisikɛl kílotí.
Yésus mɛ́pɛnyɛ́k puóli Kalilée
(Mat 4.12-17; Mál 1.14-15)
14Yésuse woond Kalilée, owóónón kuwɔ́ónon na pukaaka pú Emfúnukufúúmɛ. Nukúm núɛ́yɛ núásak Kalilée kitikit. 15Woónyonyi á piansi pí Pɛyúútɛn pí imbísókólí, pɛɛnd kitikit ɔ́ɔ́yɔ nuúmu núɛ́yɛ́.
Pɛɛnd pá Nasalɛ́t tipá páátapan
(Mat 13.54-58; Mál 6.1-6)
16Yésuse waayɔɔk Nasalɛ́t, kɔɔ́mɔ pémeélépé wɔ́. Puɔ́sɛ́ pú sápat, tuɛyítuɛyɛ́ɛ, weepíkin á kiansi kí Pɛyúútɛn kí imbísókóli; waatukɛn á kuanuna Mekélíe má Támbák. 17Pééki wɔ ɔmbɔp Isayí, eŋémímekélíe má Támbák, mɔɔ́ŋ. Woolun wɔ, wɛɛ́n kɔɔ́mɔ Isayí mɔɔ́ŋ ɛ́ɛ́:
18Kiliínditié kí Ɔkɔ́n Támbák nyɛ káámɛ
á kiákí ɛ́ɛ́ wuúyɔ́ɔ́n,
ó kuól kúɔ́yɔ́n pɔsúkɔsukɔ Insɔ́m yí indámb.
Wuúndɔ́m ɔ́ kuɔyɔn epé pɛ́nyɛɛ́ á piansɛ pí imbíne kiáŋuna kíɔ́p máásiám
pepútepute, pɔ́ɔ, ɛ́ɛ́ pákaand kuɛ́ninɛn,
wuúndɔ́m ɛ́ɛ́ epé péénesíé pɔ́ɔ iŋɛ́n, yɔ́ɔ́k pɔ́ɔ,
19ɛ́ kuɛl ɛ́ pɛɛnd ɛ́ɛ́ kisikɛl máásíám Ɔkɔ́n keényítíínyi pɔ́ɔ aná unyɛɛ́ ɔtɛ́m peseé.
20Úmááman kuanuna, Yésuse waákalɛt ɔmbɔp, woondinyi eŋelímasɔ́m u kiansi kí imbísókólí, woond wɔɔnyɔ́mbɛt; pɛɛnd kitikit pámaápá á kiansi kí imbísókólí páátámb wɔ́ eŋis. 21Yésuse kɔ́ɔ́p ɛ́ɛ́: «Ínanɔ ewe, puandá númɔ́nyiŋɔ́p yaanuna akɛ áámaná opíwóónyi á panɔ́ epé nupítɔ́likɔnɛ́ɛ.» 22Pɛɛnd kitikit kála peseé kɛ́ɛ́yɛ́ ó pusíó, póond pésimile mekélíe maatámb mámaámán kɛ́ɛ́yɛ́ é niít; póond pópíówon ɛ́ɛ́: «Utipá muɔ́nɔ́ u Yúsɛp wɔ́ á?» 23Yésus ɛ́ɛ́pí kɔ́ɔ́p ɛ́ɛ́: «Yeémenyen ɛ́ɛ́ nukaná kundúmin insap eye: Epúkí, píéŋúkí aŋúɛ muɛ́t. Nuond nuɛlɛ ɛ́ɛ́: Tuɔ́p maandá kitikit ɛ́nyɛɛ́lɛ Kapɛlɛnawúum, tuépéétenyi ɛ́ɛ́ ɛ́ɛl mɔ́ andíkɛ́k akɛ kááwɔ á pálɛ́k.» 24Wɔɔ́yikɛn, wɔ́ kɔ́ɔ́p ɛ́ɛ́: «Yɔɔ́núɔ́yɔn kémuémue ɛ́ɛ́ tɛ eŋémímekélíe má Támbák omoómí pátipá pókólosi wɔ́ peseé kɛ́ɛ́yɛ́ á pálɛ́k.
25Yɔɔ́núɔ́yɔn kémuémue ɛ́ɛ́
Á kisikɛl kí eŋémímekélíe má Támbák umaápá kisiɛ́n ɛ́ɛ́ Elie,
tuɔŋ tútátɔ́ ne kiénsi nupɔ́l tɛ ɛ́ɛ́ núkua ɔ́ kitɔŋ kí Isilayɛ́ɛl.
Ɔndumɔ́ wáápá táásɛ. Pisík pí pakáandɔ́ mapá kutek ɔ́ kitɔŋ kí Isilayɛ́ɛl ɛ́ kiɛ́tɛ kisikɛl;
26tɛ ɛ́ɛ́ kɔk Támbák mátɔ́m Élie ku womoómí,
waatɔ́m wɔ́ ku kisík kí akáandɔ́ kímaápá ɔ́ kitɔŋ kí melukú pámaápílán ɛ́ɛ́ Sitɔ́ɔŋ, kínyɔ́mbitɔn á pálɛ́k kisiɛ́n ɛ́ɛ́ Salɛ́pɛta.
27Pekúnúkun mapá kutek ɔ́ kitɔŋ kí Isilayɛ́ɛl á kisikɛl kí eŋémímekélíe má Támbák kisiɛ́n ɛ́ɛ́ Elisé;
Elisé tɛ ɛ́ɛ́ wééŋuki táŋ omoómí,
ɛsiɛ́ mɔnɔ́ melukú, u kitɔŋ kí Silí umaápá ni iŋún, kisiɛ́n ɛ́ɛ́ Naamanɛ.»
28Peem mapá á kiansi kí imbísókólí pɛ́mɛɛ́l nɔ kuɔ́p anakáánɛ́, ilópi yɛ́ɛ́tikin pɔ́ɔ. 29Páátukɛn, póond é kutítiken Yésuse, péémi wɔ́ á pálɛ́k pááyɔɔk nɛɛyɛ́ é pund pú imbɔl pámaáwááká pálɛ́k wɔɔpɔ́ á yɛ́ɛ, ɛ́ɛ́ pétítikin wɔ́ wáakandákáand ni imbát. 30Yésuse woól úsáyúná pɔ́ɔ, wɔɔpíɔk kɔ́ɔ́p, tóŋgí mɛ́ɛ́yɛ́.
Yésus nyɛ Kapɛlnawúum
(Mat 7.28-29; Mál 1.21-28)
31Yésuse waayɔɔk á pálɛ́k kisiɛ́n ɛ́ɛ́ Kapɛlnawúum, é kiénsi kí kúúsí kí Kalilée. Woónyonyi pɛɛnd puɔsɛ́ pú sápat, 32pésímile iŋónyítónyí yɛɛyɛ́, á kiákí ɛ́ɛ́ umakálá na pukaaka púmoólinon wɔ́ ku Támbák. 33Kilɔk kí kiliínditíe mapá á Mɔɔnd omotí akáánɛ́ á kiansi kí imbísókólí kɔɔ́mɔ umoónyónyi. Weepékit, wɔ́ ɛ́ɛ́: 34«Hɛ́ɛŋ! Yésus, mɔnɔ́ pa Násalɛt, aátuamba na kiákí? Oól ɛ́ kuɛsitúsɛ́lún. Yékumenyen: anyɛ Kifúúmak Támbák áányítɔ́m.» 35Yésuse waánsitɛn wɔ, wɔ́ kɛ́ɛ́yɛ́ ɛ́ɛ́: «Lúŋ yeéwú, áám á mɔɔnd ewe;» kɔ́ɔk nɔ kɔ́ɔk, kilɔk kí kiliínditíe kíátɔ́ɔt mɔɔnd ukáánɛ́ e kúúsí, ké eŋis yɛ́ pɛɛnd kitikit, kíond kíám á mɔɔnd ukáánɛ́ tɛ ɛ́ɛ́ úpia kiámɔ́k. 36Pɛɛnd péésímile pú táásɛ, pɔ́píɔyɔn pɔ́ɔ nɔ pɔ́ɔ ɛ́ɛ́: «Hɛ́ɛŋ, kasí mekélíe eme! Waákálan pilɔk pí piliínditíe na numíánsina na pukaaka, píɔ́pinɔn wɔ piond píáman.» 37Nuúmu nú Yésus núásak kiénsi kí kúúsí kí Kalilée kitikit.
Yésus ékeéŋukesi pɛɛnd
(Mat 8.14-17; Mál 1.29-34)
38Yésuse waám á kiansi kí imbísókólí, waayɔɔk ku Símun. Ɔsɔ́l mapá alatínán isɔm í eŋiní i Símun, póópísókoliti Yésuse ɛ́ɛ́ wɛ́ɛl puandá kɛ́ɛ́yɛ́ ó pusíó. 39Yésuse weetélimit á masiá mɔ́ kikɔkɔ́ kí akáandɔ́ umaápítáyan, weekutumitin wɔ́ waánsitɛn ɔsɔl, ɔsɔl wáákaám nɔ niɔ́kɔ́tɔ́n. Akáandɔ́ waatukɛn woond ɛ́ kukɛnɛkɛn nɔɔpɔ́. 40Ni insɔkɔpɔlɔ, epé kitikit pámaápián pɛɛnd pámaápítáyán á tunamá á tunamɛ́ɛ, óólon nɔɔpɔ́; Yésus tála imbɔk síɛ́yɛ́ á siki mɔɔndɛ umaánúma, weéŋukesi pɔ́. 41Pilɔk pí piliínditíe ááman ɛ́ pɛɛnd puólíkóoli, píɔ́yɔ ekelú mɛnɛ́mɛnɛ́ɛ ɛ́ɛ́: «Anyi Muɔ́nɔ́ u Támbák!» Yésus ánsan pɛ́ɛ, utiátápínán pɛ́ɛ ɛ́ɛ́ píkálɛt, á kiákí ɛ́ɛ́ pímemenyén ɛ́ɛ́ wɔ́ unyɛɛ́ Kilíise.
Yésus máátɔ́k Kapɛlnawúum
(Mál 1.35-39; Mat 4.23)
42Kuépéli, Yésuse waám waayɔɔk ɔ́ kiɔ́sɔ́kɔlíɔ. Imbúl sí pɛɛnd síond á kuamba wɔ́; simɛɛlɛ́ síɛ́nɛn wɔ́, pɛɛnd tiambá ɛ́ɛ́ úpíátɔn pɔ́, úlɔp nɔɔpɔ́. 43Wɔ́ kɔ́ɔ́p ɛ́ɛ́: «Yɛɛ́kɛɛsikɛnɛn ɛ́ɛ́ yóól iŋgémé Insɔ́m yi indámb i Pufuŋ pú Támbák á papálɛ́k pólotí andíkɛ́k, á kiákí ɛ́ɛ́ púúpɔ́ Támbák áányíndɔ́m á puɔ.» 44Waayɔɔk, woól úkémé Insɔ́m yi indámb á pians pí Pɛyúútɛn pí imbísókólí pí kitɔŋ kí Yuté.
ទើបបានជ្រើសរើសហើយ៖
Lúúkas 4: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
