Lúúkas 5
5
Kisíme kí ɔ́lɔk, Popiónyi pe Yésus pakutúan
(Mat 4.18-22; Mál 1.16-20; Isŋ 21.1-11)
1Epué puɔ́s, Yésus mapá etényi á kiŋɛndɛŋɛnd kí asaá ú Senésalɛt; embúl ú pɛɛnd mapá kɔ́ɔk ɔ́ kupítɔ́likɔn mekélíe má Támbák. Pɛɛnd títikenin, siki mɔɔndɛ áamba ɛ́ɛ́ insí umépisíítin Yésuse ɔ́ kupítɔ́likɔn wɔ́ peseékése. 2Wɛɛ́n pítóóŋ pí ɔ́lɔk píandɛ́ á kiŋɛndɛŋɛnd kí asaá; pɛɛ́t pitóóŋ mapá e kúúsí pásuka moolí mɔ́ɔ́p. 3Yésuse waamákat ó kitóóŋ kímoómí, kímɔɔ́pinɔ́n Símune. wɔ́ é Símun ɛ́ɛ́ úpínyáŋɛt na kiŋɛndɛŋɛnd, úpísíit pukéti ó moomb; wɔɔnyɔ́mbɛt woond ó kuónyonyi pɛɛnd pɔ́mɔɔ́lɔpɔ́ á kiŋɛndɛŋɛnd. 4Úmááman kuónyonyi, wɔ́ é Símun ɛ́ɛ́: «Yɔɔk no kitóóŋ ó moomb mé kuyuum, naawɔ ne peelímoóli pááwɔ ánutɔ́ɔ́t moolí máánɔ́ ɛ́ kuɛtikin muɔpɔ́.» 5Símune wondinyi wɔ́ ɛ́ɛ́ «Oŋónyóonyi, tumɔ́kɔtɔ́ putúum putúum tɛ ɛ́ɛ́ tumɛ́ɛ́tikɛ́n yɔɔpúɔ́p ímoómí; maná, kááwu á nukál, yaátúútan moolí.» 6Páátɔ́ɔt moolí mɔ́ɔ́p ó moomb. Pɔ́kɔ́ɔ́kitɛ, moolí kanyi mowóónón nɔ muɔpɔ́ táásɛ lééŋ, móond á kulafalaf. 7Pɛ́ɛ́kɛl pɔ́kúɔ́p pámaápá ó kitóóŋ kílotí pulinsí ɛ́ɛ́ pɔ́ɔ́siɔ́yíkínɛ́n pɔ́ɔ; pɔ́ɔ́siɔ́yíkínɛ́n pɔ́ɔ póówónyi pitóóŋ piim píandɛ́, púésíen pukétí ɛ́ɛ́ pínyím ó moomb. 8Símun Piɛ́l ɛ́ɛ́nɛn anakáánɛ́, waakɔn Yésuse ɔ́ pikɔ́nd, wɔ́ kɛ́ɛ́yɛ́ ɛ́ɛ́: «Ɔkɔ́n, ímbinyaŋɛt, á kiákí ɛ́ɛ́ inyɛ afalfál.» 9Púnyɛɛ́ ɛ́ɛ́ puwaá mɛ́ɛ́tíkɛ́n wɔ́ nɔ pɔsɔ́k pɔ́mɔɔ́kɔtɔ́ nɛɛyɛ́ aná pɛ́mɛɛ́n kitáám kí muɔpɔ́ pɛ́mɛɛ́tikɛn; 10puandá pumoómí na Sáak ni Isáaŋ, paán pé Sépété, pamaápá pekúlíkuli pé Símun. Yésus ɛ́ɛ́pí é Símun ɛ́ɛ́: «Etitííni, kutúm ínanɔ, pɛɛnd okoónyóól ɔlɔ́kɔ.» 11páákaasiám no pitóóŋ á kiŋɛndɛŋɛnd póond pááyap puandá kitikit, pɔ́ɔ́kɔŋ é Yésus.
Yésus mééŋuki ekúnúkun
(Mat 8.1-14; Mál 1.40-45)
12Epué puɔ́s, Yésus maápá á pálɛ́k omotí, mɔɔnd omotí kɔ́ɔk, iŋún núma wɔ. Umɛɛlɛ́ nɛ kuɛ́n Yésuse, waakɔn wɔ́ ɔ́ pikɔ́nd, pusíó pulɔŋɛ́ e kúúsí woopísókoliti wɔ́, wɔ́ kɛ́ɛ́yɛ́ ɛ́ɛ́: «Ɔkɔ́n, índɛ ɔɔ́kɔyɔ, anyi pékuŋéŋuki ɛ́ɛ́ imbá asukuná.» 13Yésuse waakaanun ɔmbɔk, wekíik wɔ́, wɔ́ kɛ́ɛ́yɛ́ ɛ́ɛ́: «yɔɔ́kɔyɔ nɔ, éŋuk,» iŋún yaasákɛn nɔ niɔ́kɔ́tɔ́n. 14Yésuse wakálɛt kɛ́ɛ́yɛ́ ni imɛ́nyi, wɔ́ kɛ́ɛ́yɛ́ ɛ́ɛ́: «Ɔtiɔyítɛ́n mɔɔnd epú púmányikuámɛ́n. Yɔɔk keepitíínyi ku afunúfɔn u Támbák úkufialɛt óond ééki kifunɔ́ aná kikotí kí Moyíis ɔ́ɔ́yɔnɛ́ɛ, é kutíínyi mɔɔnd kitikit ɛ́ɛ́ emééŋuk, akanyi asukúná.» 15Nuúmu nú Yésus kuyuukanɛɛ́ kuyuukan nó pusíó, imbúl si pɛɛnd yuukan ɔ́ kuɔpítɔ́líkɔ́n wɔ́, epé pánúmanɛ́ é kuéŋuken. 16Yésuse, wɔ́, uyuukan ɔ́ piɔ́sɔ́kɔlíɔ, upísókolonyi.
Yésus mééŋúkí kinsɛ́kɛlinɛ
(Mat 9.1-8; Mál 2.1-12)
17Epué puɔ́s, Yésus mapá woónyonyi. Pafalisiɛ́ŋ ne pemenyí pikotí mapá kɔ́ɔk pɔ́pítɔ́likɔn wɔ́; pómoólínón ɔ́ pitɔŋ kitikit pínyɛɛ́ é piénsi pí kúúsí pí Kalilée ne Yuté, pómotí moólín Yelúsalɛm. Pukaaka pú Ɔkɔ́n, Támbák, é Yésus ɛ́ɛlɛ ɛ́ɛ́ wééŋukesi pɛɛnd pámaánuma. 18Pɛɛnd kɔk pómotí páásiám nɛ kinsɛ́kɛlinɛ, papítúkán kɛ́ɛ á nuambálɛ́n; páamba ɛ́ɛ́ insɛ́ɛ pémépíkín nɛɛyɛ́ á kiansi ɛ́ kuɛtɛ́k wɔ́ ó pusíó pú Yésus. 19Aná pɛ́mɛɛ́lɛ́ pɛ́tiɛ́n nipíkínín, á kiákí ɛ́ɛ́ embúl mapá asakán kusakan kɔɔ́mɔ, páámákatɛn á muyáp, póofolun punɛ́k kɔɔ́mɔ Yésus maápá, pééseli kinsɛ́kɛlinɛ á nuambálɛ́n núɛ́yɛ́ kɛ́ɛ́yɛ́ ó pusíó. 20Yésuse wɛɛ́n pipíóndínyí ɔtɛ́m píɔ́p, wɔ́ ɛ́ kinsɛ́kɛlinɛ ɛ́ɛ́: «Imákuyapɛ́n á pifal píáwɔ.» 21Pemenyí pikotí na Pafalisiɛ́ŋ póond á kupítááka kɔ́ɔ́p kí itɛ́m, pɛ́ɛlɛ ɛ́ɛ́: «Mɔɔnd unín ewe usikanɛ́ Támbákɛ́ɛ? Ɛ́nyɛ́ omotí unyɛɛ́ ukuyapɛn mɔɔnd á pifal kati Támbákɛ́ɛ wééŋényi?» 22Yésuse weemenyi imbítáákitɛ́n síɔ́p, wɔ́ kɔ́ɔ́p ɛ́ɛ́: «Kiákí nunyɛɛ́ na sikáánɛ́ imbítáákitɛ́n? 23Púnín punyɛɛ́ sutusɔt ɔ́ kuɔyɛt: Imákuyapɛ́n á pifal píáwu éyí púnyaánɛ: Atúkɛ́n pálá ambaná? 24Ɛ́ɛ́ numenyée iŋúɛ, Muɔ́nɔ́ u mɔɔnd inyɛ na numíánsina nú kuyapɛn pifal pí mɔɔnd. kinsɛ́kɛlinɛ, yɛɛ́pí káawɔ ɛ́ɛ́, atukɛ́n, kɔ́l nuambálɛ́n núáwu ondó kuawɔ.» 25Kɔ́ɔk nɔ kɔ́ɔk, pɛ́mɛɛlɛ́ pɛ́ɛ́ninɛ: kakat, kinsɛ́kɛlinɛ máátúkɛn, kímɔ́kɔ́l nuambálɛ́n núɛ́yɛ́ kímóónd kuɛyɛ́ kíól kílémbesi Támbákɛ́ɛ. 26Pɛɛnd péésímile táásɛ. Póond ó kuómokosi Támbákɛ́ɛ, itɛ́m siwóónón na puwaá, pɔ́ɔ́yɔ ɛ́ɛ́: «Tumɛ́ɛ́n iŋetekelíkí ínanɔ.»
Yésus mápílíkɛ́n Léfie
(Mat 9.9-13; Mál 2.13-17)
27É kélém kúɛ́yɛ́, Yésuse waám, wɛɛ́n etúúsí lemfué kisiɛ́n ɛ́ɛ́ Léfie, ɔnyɔ́l kɛ́ɛ́yɛ́ é niíti ní puólí. wɔ́ kɛ́ɛ́yɛ́ ɛ́ɛ́: «Ɔŋɔ́ káámɛ.» 28Léfie waatukɛn, waayap puandá kitikit wɔɔŋ é Yésus.
29Epué puɔ́s, Léfie waanámba táásɛ kuɛyɛ́ ó kukóli Yésuse; embúl ú petúúsí lemfúé nɛ pɛɛnd pólotí mapá kɔ́ɔk, panyáan ɔlɔŋ. 30Pafalisiɛ́ŋ ne pemenyí pikotí pɔ́ɔ́p, pámaápá kɔ́ɔk kɔ́kɔ́ɔ́p, péépíŋunye, póówon popíónyí pé Yésus ɛ́ɛ́: «Ó pusíó pú kiákí nunyáanɛ́ nuond nupúwáan ɔlɔŋ ne petúúsí lemfúé na pafalfal é?» 31Yésuse woondinyi pɔ́ ɛ́ɛ́: «Pekilikile tipá insaná ne epúkí, pánúmanɛ́ pɛ́nyɛɛ́ insaná ne epúkí. 32Indiól á kuasipílán pí indɛ́ndɛ́nɛ, pafalfal yóónyóól kɔ́ɔ́p ó pusíó ɛ́ɛ́ pénúkesi kusɔ́t kúɔ́p.»
Iŋówúnín iyoosonée puónyi pú kupíkotosi múkunya
(Mat 9.14-15; Mál 2.18-20)
33Pɔ́ é Yésus ɛ́ɛ́: «Popíónyí pí Isáaŋ Etuúsí na páásɔ́ pá pafalisiɛ́ŋ óópíkotosi múkunyá póond pópísókolonyi, pááwɔ kɔk yá kunyáan kupúwáan.» 34Yésuse kɔ́ɔ́p ɛ́ɛ́: «Nunyi pókukoti ikámbí ɛ́ pɛɛnd pásiápílan pɔ́ ɔ́ putɔ́mbí pú nuɔ́ndɔ́n pɔ́ ɔlɔŋ na mɔɔnd usiápítikɛn á? 35Metúk óókoólon pékeényéŋi muɛ́t nupítíkɛ́n; á maátakáánɛ́ metúk póónyípíkotosie múkunya.»
Puulunén nɔ puukɔ́si
(Mat 9.16-17; Mál 2.21-22)
36Yésuse wand etúmin pɔ́ insap, wɔ́ kɔ́ɔ́p ɛ́ɛ́: «Pátipá pálafa kiénsi kí insunú kiikɔ́si é kukít kilunú kí insunú; indɛ mɔɔnd siɛl nɔ, umɔ́lɔkɔ́ insunú yiikɔ́si, andíkɛ́k ɛ́ɛ́ kiénsi kí insunú yiikɔ́si tíánimíkán ne kilunú kí insunú. 37Pátipá paákan makɛ́p mɔɔkɔ́si é pilunú pí muwáán mú piyɔ; índɛ mɔɔnd siɛl nɔ, makɛ́p kaná epúse, másán muwáán, makɛ́p óótik, wááyɛn muwáán. 38Púɛ́kɛɛsikɛnɛn ɛ́ɛ́ páákan makɛ́p mɔɔkɔ́si á muwáán muukɔ́si. 39Mɔɔnd kitikit ukanyɛɛ́ ɛŋɛ́lɛ́n ne pilunú pí makɛ́p tíákaátáp kupuwá mɔɔkɔ́si. Á kiákí ɛ́ɛ́ wɛɛ́kɛlɛ ɛ́ɛ́: Míínsúá nyɛ peseé kutápɔk.»
ទើបបានជ្រើសរើសហើយ៖
Lúúkas 5: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
