Isáaŋ 2
2
Nuɔ́ndɔ́n nú Kána
1É kélém kú metúk mátátɔ́, putɔ́mbí pú nuɔ́ndɔ́n mapá á pálɛ́k kisiɛ́n ɛ́ɛ́ Kána, ɔ́ kitɔŋ kí Kalilée. Yóótí Yésus mapá kɔ́ɔk ɔ́ putɔ́mbí. 2Páapílikɛn Yésuse kɛ́kɛ́ɛ́yɛ́ no popíónyí pɛ́ɛ́yɛ́ ɛ́ nuɛ́tɛ nuɔ́ndɔ́n. 3Makɛ́p mɛɛlɛ́ na kuman, yóótí Yésus kanyi kɛ́ɛ́yɛ́ ɛ́ɛ́: «Makɛ́p mɔ́ɔ́p mámaná.» 4Yésuse kɛ́ɛ́yɛ́ ɛ́ɛ́: «Akáandɔ́, kiákí kínyɛ́ naamɛ naawɔ? Kikúlɛ́ kíámɛ manyi kítiasíám.» 5Yóótí kanyi é peelímoólí ɛ́ɛ́: «Ɛ́nuɛlɛ́ puandá kitikit ukaná ɔnuɔ́yitinɛ́ɛ.» 6Musényí mútíndatɔ́ mutúánán ká atányí mapá akáánɛ́. Múúmú Pɛyúútɛn wóónyosié moomb á múu á kupísukan kɔ́ɔk ɛ́ɛ́ pápá pitɛ́fɛk ó pusíó pú Támbák. Isényí ímoómí ɔ́ɔ́kɔ́lɔn pɛlítɛlɛ puandá asi ambak. 7Yésus kanyi é peelímoólí ɛ́ɛ́: «Ónuwóónyí moomb é musényí emue.» Pówóónyi moomb é musényí. 8Yésuse kɔ́ɔ́p ɛ́ɛ́: Ɔ́nupɔ́ŋ, «núupu kuópítónyí eŋendí putɔ́mbí.» Pɛ́ɛkɛl aná umɔɔ́yɛ́t. 9Eŋendí putɔ́mbí wɔɔpíɔ́pitɛn moomb pemeéyí makɛp. Tɛ ɛ́ɛ́ úmenyi niólín ní makɛp (peelímoólí pɔ́ɔ pémenyen, á kiákí ɛ́ɛ́ pɔ́ɔ pémeénuénen moomb); waapílikɛn muɛ́t putɔ́mbí, 10ukanyi kɛ́ɛ́yɛ́ ɛ́ɛ́: «Pɛɛnd peem átúáninan á makɛp maatámb pésúkínen é pilimbenyí kɔ́ɔk pɛɛnd mámaná apúwúan kutek. Aŋúɛ kɔk maatámb ɛmɛ́nɛkɛ́ ɛ́ɛ́ mɔ́ mésúkineé!»
11Índɛ́ kisey kíkutúan kikáánɛ́ Yésus mɛɛ́lɛ́, púmapá Káná é kiénsi kí kúúsí kí Kalilée. Weetíínyi nuúmu núɛ́yɛ́, popíónyí pɛ́ɛ́yɛ́ páátap wɔ. 12Kákáánɛ́ pámaátukɛn, á kuyɔɔk Kapɛlɛnawúm, Yésuse no yóótí na paandimán no popíónyí pɛ́ɛ́yɛ́. Pɔ́timɔnyɔmbɛt kɔ́ɔk metúk kusol.
Yésuse á kitamb kí Támbák
(Mat 21.12-17; Mál 11.15-17; Lúk 19.45-46)
13Putɔ́mbí pú Kiémie kí Pɛyúútɛn Isípit mapá mekúye, Yésuse waamákat Yelúsalɛm. 14Wookóóki petúúsí inday, petúúsí pitúúmbɛ́ɛ, petúúsí pipa ne peséndí muenyí pasakán kitamb kí Támbák. 15Waapákɛt nusoó no tuolí á kukúúŋan petúúsí peem ne melúk mɔ́ɔ́p meem á kitamb kí Támbák. Weesélemendenyi muenyí mú penúkí muenyí, ufɛ́ndunɛ petépéle pɔ́ɔ́p. 16Ukanyi é petúúsí pipa ɛ́ɛ́: «Énuéményí maandá makáánɛ́! Nutiéyí kiansi kí Taatá kí endunyée!» 17Popíónyí pɛ́ɛ́yɛ́ páapítáákɛt aná ɔmfiɔ́ŋ ɔ́ɔ́yɔɔnɛ́ɛ ɛ́ɛ́: «Támbák, iyayɔ́ inyɛɛ́ na yíi ɔ́ kuɔyɔ Kitamb kíáwɔ nyɛ kiandákáand.» 18Pɛyúútɛn kanyi ɛ́ɛ́: «Kayí pulinsí é ɛnyɛɛ́ kuɛl é kutútíínyi ɛ́ɛ́ aápian pukaaka pú kuɛl pilɔŋ pikáánɛ́ ɛɛlɛnɛ́ɛ.» 19Yésuse kɔ́ɔ́p ɛ́ɛ́: «Ánukatá kitamb kí Támbák ekie, metúk mátátɔ́ kɔ́ɔ́m yáand eténikenyi kɛ́ɛ.» 20Pákanyi kɛ́ɛ́yɛ́ ɛ́ɛ́: «Tiɛkíɛ anakáánɛ́? Kitamb kí Támbák ekie nuwáák núɛ́yɛ́ mányipáápɛt tuɔŋ etín áandɛ́ nɔ tuɔŋ tútíndatɔ́ ɔɔyɔnɛ́ ɛ́ɛ́ anyɛ kuténikenyi kɛ́ɛ é metúk mátátɔ́ á?» 21Maná kitamb Yésus mɛɛ́tɛ́tɛ́n mapá nuɔ́l núɛ́yɛ́. 22Aká umɛɛ́nyɔ́k é piku, kákáánɛ́ popíónyí pɛ́ɛ́yɛ́ maápitáákɛ́t ɛ́ɛ́ umɔɔyɛ́t nɔ; páákaátap kémuémue epú Ɔmfiɔ́ŋ ɔ́ɔ́yɔɔnɛ́ɛ, ne mekélíe Yésus maákála.
Yésus émenyen ɔtɛ́m ú mɔɔnd peseéképese
23Yésus mɛɛlɛ́ umanyi Yelúsalɛm ɔ́ putɔ́mbí pú Kiémie kí Isípit, pɛɛnd puólíkóoli pópíondonyi ɔtɛ́m kɛ́ɛ́yɛ́ aná pɛmɛɛ́n pisey umɛɛ́lɛ. 24Tɛ nɔ́ Yésus timopíóndi ɔtɛ́m kɔ́ɔ́p, á kiákí ɛ́ɛ́ umemenyén kitikite wɔɔpɔ́. 25Utimaamba ɛ́ɛ́ pátían wɔ́ epú mɔɔnd nyɛɛ́: umemenyén imbítáákítɛ́n kitikit sí mɔɔnd.
ទើបបានជ្រើសរើសហើយ៖
Isáaŋ 2: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
