Isáaŋ 3
3
Kilumén kí Yésus no Níkotɛ́m
1Mɔɔnd omotí, kɔ́ ɔlɔŋ ú Pafalisiɛ́ŋ, kisiɛ́n ɛ́ɛ́ Nikotɛ́mɛ, umapá ɔkɔ́n olotí u Pɛyúútɛn. 2Woól ne putúk ku Yésus, wɔ́ kɛ́ɛ́yɛ́ ɛ́ɛ́: «Oŋónyóonyi, tuémenyen ɛ́ɛ́ Támbákɛ́ɛ wáányíkutɔ́m ɛ́ɛ́ óósitúónyonyi, á kiákí ɛ́ɛ́ mɔɔnd tipá ukuɛl pisey ɛɛlɛnɛ́ɛ kati ɛ́ɛ́ Támbák nyɛ nɛɛyɛ́.» 3Yésuse kɛ́ɛ́yɛ́ ɛ́ɛ́: «Kémuémue kémuémue aŋúɛ kati kupípíén kuukɔ́siɔkɔ́siɛ ɛtiɛ́nyɛɛ́n Pufuŋ pú Támbák.» 4Níkotɛ́mɛ kɛ́ɛ́yɛ́ ɛ́ɛ́: «Tiɛkíɛ́ pɛ́nyɛɛ́ kuand epíen kilunú kí mɔɔnd? Unyɛ ukuand kuond é nipundí ní yóótí ɛ́ɛ́ wáand epíen wɔ́ á?» 5Yésuse kɛ́ɛ́yɛ́ ɛ́ɛ́: «Yɔɔ́kuɔyɔn kémuémue: mɔɔnd na mɔɔnd tipá ukupíkin é Pufuŋ pú Támbák kati ɛ́ɛ́ upípíen no moomb ne Emfúnukufúúmɛ. 6Ewú ɛnúmɛndɔ́ na akáandɔ́ ményipíén nyɛ mɔɔnd, epú pupípíénené ké Emfúnukufúúmɛ ɔ́ɔ́kɔɔ́pinɔn Emfúnukufúúmɛ. 7Otipíówón ɛ́ɛ́ kiákí iŋuɔyɔnɛ́ ɛ́ɛ́: Ɛɛ́kɛsikɛnɛn kupípíén kuukɔ́sikɔ́siɛ. 8Emfún ééfúke kiáyí wɔ́ɔyɔnɛ́ɛ, ɔɔ́pɔn wɔ́ úfúke etimenyí tɛ niólín tɛ niondín. Yá anakáánɛ́ púnyɛɛ́ ɔ́ sɔ́k ewú Emfúnukufúúmɛ menyipíén wɔ.» 9Nikotɛ́mɛ kɛ́ɛ́yɛ́ ɛ́ɛ́: «Tiɛkíɛ́ púnyɛɛ́ kupíɛl?» 10Yésuse kɛ́ɛ́yɛ́ ɛ́ɛ́: «Aŋúɛ oŋónyóonyi ewú Ísilayɛ́ɛl kitikit menyenée, eéleeme nɔ́ á? 11Yɔɔ́kuɔyɔn kémuémue, tuɔ́kɔyɔ epú tumenyenée, tuond tutétunyenyi epú túmɛ́nyiɛ́n, maná nutipá nuátapan epú tuɔyɔnɛ́ɛ. 12Índɛ nutipá nuátapan aká inúɔ́yɔnɛ́ maandá mé kúúsí, tiɛkíɛ́ nukaányáátap aká íŋɔɔ́nyínúɔyɔn mɛ́ mɛnɛ́mɛnɛ́ɛ? 13Mɔɔnd na mɔɔnd mapása utimákát mɛnɛ́mɛnɛ́ɛ, ɛsiɛ́ Muɔ́nɔ́ u mɔɔnd umoónyoólín kɔ́ɔk! 14Yá aná Moyíis maátɔ́ŋ inyɔ́k i núɛ́yɛ́ á nuandá e kúúsí kú kiándɔ́l, yá anakáánɛ́ púɛsikɛnɛnɛ́ ɛ́ɛ́ pátɔ́ŋ Muɔ́nɔ́ u mɔɔnd, 15ɛ́ɛ́ ewú ne ewú úmányaátáp wɔ́ úpia kusɔ́t kú teeníík. 16Támbák mosol kuɔyɛt punya pɛɛnduɛ fío kúúkɔ́ umeékí kinsuúŋulɛ kíɛ́yɛ́ kí Muɔ́nɔ́, ɛ́ɛ́ ewú ne ewú upíóndonyé ɔtɛ́m nɛɛyɛ́ tiyím, maná útáŋap kusɔ́t kú teeníík. 17Támbák timatɔ́m Muɔ́nɔ́ wɛɛyɛ́ e kúúsí ɛ́ɛ́ wɛ́ɛsipɛnɛ́ punya pɛɛnduɛ, maná umoól ó kuosisótí pɔ. 18Pátipá pɛ́pɛnɛn ewú waátapanɛ́ɛ, maná ewú utiányípá waátapan kanyi ɛpɛnɛ́n ó pusíó ɛ́ɛ́ utimáatáp kisiɛ́n kí kiŋsuúŋulɛ kí Muɔ́nɔ́ u Támbák. 19Imbakɛ́ eye: kisie moól e kúúsí, punya pɛɛnduɛ pɔ́ɔyɛt imbíne kukányɛn kisie, ɛ́ kuɛlɛɛ́ meelínyélínyé mɔ́ɔ́p mapá kilɔk. 20Ewú ne ewú wɛɛlɛnɛ́ kilɔk ɛ́ɛ́fɛmɛ kisie, utipá upísíítenin kɛ́ɛ emenyí pilɔk píɛ́yɛ́ pí maandá ɛ́ɛ́nikɛnɛk. 21Mɔɔnd wɛndɛnɛ́ é kémuémue óókoólon é kisié, ɛ́ɛ́ pɛɛnd ɛ́ɛ́n ɛ́ɛ́ meelínyélínyé mɛ́ɛ́yɛ́ óókoólinon ku Támbák.»
Ne Yésus ni Isáaŋ
22É kélém akáánɛ́, Yésuse waayɔɔk no popíónyí pɛ́ɛ́yɛ́ é kiénsi kí kúúsí kí Yuté; é metúk umeétépúkí nɔɔpɔ́, utuenen pɛɛnd. 23Isáaŋɛ kɛ́kɛ́ɛ́yɛ́ tuenen pɛɛnd ɔ́ kitɔŋ kí Inɔn, mekúye na Salím á kiákí ɛ́ɛ́ moomb timambaamb kɔ́ɔk. Pɛɛnd óólon, utuenen pɔ́. 24Á kisikɛl kikáánɛ́ Isáaŋ mapá umanyi utiyɔɔ́k á kiansi kí imbíne.
25Popíónyí pí Isáaŋ póond é kupekenyipekenyi ne Yúútɛn omotí ó pusíó pú kisék kí ɔsukɔ́. 26Popíónyí pí Isáaŋ Páányaámɛ́n wɔ, pɔ́ kɛ́ɛ́yɛ́ ɛ́ɛ́: «Oŋónyóonyi, amaápítááka mɔɔnd umaápá naawɔ nakúnɛ u Sulutɛ́ŋ á, sɔ́k ewú emeététúnyényí kɛ́ɛ́yɛ́ ó pusíó á? Wunóónóo utuenené níinúan, pɛɛnd ɛ́ɛ́kɛndɛkɛ kuɛyɛ́!» 27Isáaŋɛ kɔ́ɔ́p ɛ́ɛ́: «Mɔɔnd átáŋapa yá epú Támbák mányifá wɔ. 28Panɔ́ muɛ́t numapá aká imɔɔ́yɛ́t ɛ́ɛ́ indipá níŋúɛ inyɛɛ́ Kilíise, maná ewú pómoófoókí kɛ́ɛ́yɛ́. 29Ewú ɔŋúlɔ ɔ́ɔ́pɔninɛ́ wɔ́ nyɛ ɔnɛ́m. Maná ekúl ɔnɛ́m nyɛ etényi akáánɛ́ á masíá, upítɔ́likɔn ekelú ú ɔnɛm. Wɔ́ɔ́kɔɔ́pɔn kiandá kí anyamɔ́ á kiákí, ɛ́ wɔɔ́kɔɔ́pɔn ekelú ú ekúl wɛɛyɛ́. Anyamɔ́ ukáanɛ́ únyɛɛ́ wáámɛ nyɛ owóónón. 30Wɛɛ́kɛsikɛnɛn ɛ́ɛ́ úfilimina, niŋúɛ ímaninan.
Ewú woólinoné mɛnɛ́mɛnɛ́ɛ
31«Ewú woólinoné mɛnɛ́mɛnɛ́ɛ átápukan pɛɛnd kitikit. Sɔ́k u kúúsí nyɛ mɔɔnd u kúúsí, ukála á mɔɔnd u kúúsí. Ewú woólinoné mɛnɛ́mɛnɛ́ɛ áátápukan pɛɛnd kitikit; 32wɔɔ́kɔɔyɔ epú úmɛ́nyɛɛ́n ne epú úmɔ́nyɔɔ́p, tɛ mɔɔnd u kuátap wɔ. 33Ewú waátapanɛ́ epú wɔɔyɔnɛ́ɛ etíínyenyi ɛ́ɛ́ Támbák nyɛ kémuémue. 34Ewú Támbák maátɔ́m ɔ́ɔ́kɔɔyɔ mekélíe má Támbák, á kiákí ɛ́ɛ́ Támbák meekí wɔ́ Emfúnukufúúmɛ kati iŋetíe. 35Síí ɔ́ɔ́kɔɔyɔ muɔ́nɔ́, weekeeki wɔ́ pukaaka á maandá meem. 36Ewú wɔɔ́pinɔnɛ́ Muɔ́nɔ́ ápian kusɔ́t kú kati nimanínɛ́ɛ. Ewú utiányípá wɔɔ́pinɔn Muɔ́nɔ́ tíɛ́kɛɛ́n kuɛ́tɛ kusɔ́t, maná ilópi í Támbák nyɛ kɛ́ɛ́yɛ́.»
ទើបបានជ្រើសរើសហើយ៖
Isáaŋ 3: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
